• Os espazos verdes ubícanse na rúa do Viso e no acceso da avenida de Celanova ao Camiño da Igrexa

O Concello de Barbadás vén de finalizar as obras de remodelación de dúas zonas axardinadas ubicadas na Valenzá (concretamente, na rúa do Viso e no acceso da avenida da Celanova ao Camiño da Igrexa). Ambos espazos presumen agora dun aspecto renovado e humanizado, con novas especies arbóreas. “Eran dúas zonas que presentaban un estado deteriorado, sen moita vida, e quixemos embelecelas”, explica Victoria Morenza, tenente alcalde e concelleira de Parques e Xardíns.

Na rúa do Viso, a intervención consistiu na retirada de pedras, na colocación de céspede artificial e na plantación de novas especies. No caso do acceso da avenida Celanova ao Camiño da Igrexa, o Concello decidiu sementar novas especies arbóreas e arbustivas, ademais de pintar, adecentar e ampliar a zona. Por último, neste espazo tamén se colocaron pedras de pequeno tamaño de tipo ornamental.  

Este tipo de actuacións, destinadas á mellora e ampliación das infraestructuras do municipio, enmárcanse dentro da inversión de 1,1 millóns de euros do Plan de Obras 2025 do Concello de Barbadás.