• 80 escolares de 3º de Primaria do CEIP Filomena Dato e do CEIP Plurilingüe O Ruxidoiro participaron na actividade, impulsada dende a área de Educación

O Concello de Barbadás inicia a súa programación do Entroido 2025 da man dos máis pequenos do municipio. A Praza Vella da Valenzá acolleu este mediodía a tradicional Regueifa de Compadres, na que participaron 80 escolares de 3º de Primaria do CEIP Filomena Dato e do CEIP Plurilingüe O Ruxidoiro.

A actividade, impulsada dende a área de Educación do Concello, ten como obxectivo dar a coñecer esta tradición entroideira entre as novas xeracións. “Primeiro aprenden a elaborar os compadres e comadres nos colexios e logo disfrutan da regueifa. É unha tradición que queremos que se conserve e que xa levamos varios anos impulsando”, explica Marga Pérez, concelleira de Educación.

Ao grito de “que morran os compadres”, os participantes fixeron da Praza Vella o escenario dunha colorida e divertida “batalla” entroideira. Integrantes da corporación local, así como axentes da Policía Local e voluntarios de Protección Civil, tamén estiveron presentes na actividade.

A próxima cita: Xoves de Comadres

A programación do Entroido 2025 en Barbadás continuará o vindeiro xoves, coa celebración da Regueifa do Xoves de Comadres. Nese caso, será o alumnado de 4º de Primaria do Filomena Dato e do Ruxidoiro o que se divirta na Praza Vella.