O Concello de Barbadás continúa coa campaña de compostaxe doméstica, coa que busca fomentar a correcta xestión dos biorresiduos nos fogares e promover prácticas máis sostibles no municipio.

A próxima entrega de composteiros terá lugar o luns 27 de xullo ás 12h no Centro Empresarial Transfronteirizo, nunha sesión informativa na que as persoas participantes recibirán formación básica para comezar a compostar no seu fogar.

Esta iniciativa permitirá que os veciños e veciñas con pequeno terreo poidan transformar os seus restos orgánicos en abono natural de alta calidade, reducindo así a cantidade de lixo que chega ao colector e contribuíndo a unha economía circular máis eficiente en Barbadás.

O Concello facilitará aos fogares participantes un composteiro de balde, formación e acompañamento, para garantir unha correcta posta en marcha e seguimento do proceso.

Nas próximas semanas celebraranse novas sesións en diferentes puntos do municipio, que serán anunciadas a través dos canais oficiais do Concello. A inscrición continúa aberta para aquelas persoas interesadas en participar na campaña.

As persoas interesadas poden atopar toda a información actualizada na páxina web: barbadas.ocaminosostible.gal. Tamén poden contactar a través do teléfono 647 521 464 ou do correo electrónico info@ocaminosostible.gal.

Esta iniciativa conta co apoio da Xunta de Galicia e o financiamento do Plan de Recuperación, Transformación e Resiliencia – Next Generation EU, e forma parte da aposta do Consorcio As Mariñas por un modelo de xestión sostible e de proximidade, implicando á cidadanía na redución e valorización dos seus propios residuos.

• “Hoxe damos varios pasos máis na reivindicación do vínculo tan especial de Carmen Martín Gaite con Piñor”, resalta o alcalde, Xosé Carlos Valcárcel

O Concello de Barbadás homenaxeou esta mañá, por partida dobre, á escritora Carmen Martín Gaite, “Carmiña”, coa celebración do IV Paseo Literario “O Piñor de Carmen Martín Gaite” e a inauguración da exposición permanente “As palabras en fila. O álbum da infancia de Carmiña en Piñor”. A cita reuniu a numerosos veciños e veciñas, así como amantes da literatura e das novelas de Martín Gaite, unha das escritoras máis destacadas do século XX na literatura española. 

“Hoxe damos varios pasos máis na reivindicación do vínculo tan especial de Carmen Martín Gaite con Piñor coa celebración deste paseo literario e coa inauguración da exposición permanente, da sinalización da ruta e do percorrido GPS”, resaltou o alcalde, Xosé Carlos Valcárcel, ao inicio da actividade. O rexedor tamén quixo agradecer o “gran traballo” realizado polo investigador e docente David G.Couso, quen realizou unha tese e varias publicacións sobre a relación da escritora con Piñor, e quen se encarga de guiar a ruta literaria. Asemade, puxo en valor o esforzo realizado polo xornalista Luis Congil, comisario da exposición, para “recoller e reunir todas as fotos de infancia dos veráns de Carmiña en Piñor”. O concelleiro de Cultura, José Manuel Morgade, así como Cecilio Santalices, xefe da área provincial de Turismo en Ourense, tamén estiveron presentes na cita. 

Durante o paseo, David G.Couso foi guiando ao nutrido grupo por varias paradas en puntos estratéxicos, como as casas nas que vivían os familiares de Martín Gaite, os espazos que reflectiu nas súas novelas adicadas a Piñor ou os lugares onde desfrutaba do verán cos seus familiares e amizades. Na última parada da ruta, os participantes visitaron a exposición fotográfica no local social de Piñor, onde Luis Congil detallou o proceso de recollida de imaxes e a organización da mostra, na que se recollen fotografías da infancia, escritos ou fragmentos de entrevistas á autora, entre outros documentos. Para rematar, o grupo desfrutou dun ágape no bar O Regueiro, cortesía do Concello.

• A programación arranca mañá e inclúe o concerto de Mercedes Peón, funcións do Centro Dramático Galego, circo, humor e proxección de películas
• “É unha proposta diversa que achega a cultura a veciños e veciñas de diferentes idades e de todos os puntos do municipio”, apunta o alcalde, Xosé Carlos Valcárcel

O Concello de Barbadás, a través da Concellería de Cultura, impulsa o seu Verán Cultural máis extenso con preto dunha vintena de actividades de música, cine, teatro, circo, maxia e humor. “Por primeira vez, a programación repartirase por todo o municipio, aínda que vai seguir estando centrada no Parque dos Patos”, explicou esta mañá Xosé Carlos Valcárcel, alcalde de Barbadás, na presentación do ciclo cultural. 

A oferta, totalmente gratuíta, inclúe propostas para todas as idades e para os diferentes núcleos de poboación, xa que percorrerá Sobrado do Bispo, Bentraces, Piñor e Finca Fierro, ademais do Parque dos Patos da Valenzá. “Este ano imos ter máis actividades que nunca e non só os xoves, senón tamén os venres”, destacou José Manuel Morgade, concelleiro de Cultura, quen animou a poboación a desfrutar da cultura e do talento dos artistas participantes. 

O Verán Cultural contará con artistas de renome como Mercedes Peón, funcións do Centro Dramático Galego, ou a proxección da película “Rondallas”, nominada aos Goya 2026, ademais de grupos no propio concello como a Escola Nova Fronteira, a Banda Infantil da Escola de Música de Barbadás ou a Banda de Música Cultural de Barbadás. “Agardamos que a veciñanza se achegue e participe porque temos propostas de gran calidade”, apuntaron. 

A programación arranca mañá

O ciclo cultural comeza mañá coa exhibición de fin de curso de Danzas do Mundo Danzari da Escola Nova Fronteira. A cita terá lugar no Parque dos Patos ás 21,00 horas.

O venres será a quenda de MVT Galicia, que tamén realizará a súa actuación de fin de curso ás 21,00 horas no Parque dos Patos. 

A próxima semana, as citas correrán a cargo da Banda Infantil da Escola de Música de Barbadás (luns, 22 de xuño) e a Banda de Música Cultural de Barbadás (martes, 23 de xuño). Ambos concertos serán ás 21,00 horas no Parque dos Patos.

A actuación de Circo de Sue Moreno inaugurará o mes de xullo co espectáculo “5.0” o xoves 2, ás 21,00 horas no Parque dos Patos. A banda ourensá Brañas Folk actuará o xoves 9, tamén ás 21,00 horas no Parque dos Patos. 

O venres 10 de xullo comezarán as proxeccións da película “Rondallas”. Neste caso, será no parque Fidalguiño de Sobrado, ás 22,30 horas. O ciclo fílmico continuará o venres 17 de xullo na Praza do Pumar de Bentraces, o venres 14 de agosto no Campo de Roma de Piñor e o venres 21 de agosto na explanada detrás dos edificios da rúa Milladoiro, en Finca Fierro. Todas as citas serán ás 22,30 horas. 

A compañía bilbaína Orainbi presentará o seu espectáculo “Mute”, que une circo e moito humor, o xoves 16 de xullo, ás 21,00 horas, no Parque dos Patos. A seguinte semana será o grupo ourensán Tetas Van quen protagonizará a cita no Parque dos Patos coa presentación do seu último traballo, “15 revoltas”. 

O xoves 30 de xullo, ás 21 horas no Parque dos Patos, o Centro Dramático Galego, en coprodución con Espectáculos Valente, representarán a obra “Ñique Ñaque”, baseada nun texto do recoñecido dramaturgo Cándido Pazó. 

O mago ourensán Fernando Moreno traerá o seu espectáculo “Superpoderes máxicos” o xoves 6 de agosto, ás 21,00 horas no Parque dos Patos.O seguinte xoves, 13 de agosto, será a compañía Teatro ó Cubo quen aterre no Parque dos Patos coa representación da obra “De Vilatriste a Vilalegre”, unha peza dirixida a público de todas as idades. 

O grupo Dr.Slump, un dos grandes referentes das bandas de versións galegas, ofrecerá o seu concerto o xoves 20 de agosto, ás 21,00 horas, no Parque dos Patos. 

A recoñecida música, instrumentista e cantante Mercedes Peón porá o broche de ouro á programación cultural co seu concerto do xoves 27 de agosto. A artista presentará o seu último traballo discográfico, “Déixaas”. A cita é ás 21,00 horas no Parque dos Patos.

• O alcalde, Xosé Carlos Valcárcel, destaca como principal novidade a instalación dunha cadeira que permite o baño autónomo de persoas con mobilidade reducida
• O Concello puxo a punto o recinto coa renovación dunha das bombas do sistema de filtración, o pintado do bordo da piscina de adultos, a reparación de lousas e o replanteo de zonas de céspede

O Concello de Barbadás inaugura mañá a temporada estival coa apertura das piscinas municipais. O goberno local levou a cabo nas últimas semanas a posta a punto das instalacións, que permanecerán abertas ata o 13 de setembro. As melloras do espazo incluíron o cambio dunha das bombas do sistema de filtración, o pintado do bordo do vaso de adultos, a reparación de lousas e o replanteo de zonas de céspede.  

Xosé Carlos Valcárcel, alcalde de Barbadás, destaca como principal novidade a instalación dunha cadeira para persoas con mobilidade reducida no bordo da piscina de adultos. “Deste xeito, todas aquelas persoas con mobilidade reducida que queiran bañarse e refrescarse de xeito autónomo o poderán facer”, resalta. 

O sistema, de uso sinxelo, funciona coa axuda dunha mangueira de auga. Unha vez sentada, é a propia persoa quen manexa os movementos da cadeira cun mando. “Estamos moi satisfeitos de incorporar esta mellora para facer accesible a piscina a toda a veciñanza”, engade Daniel Rey, tenente alcalde, quen agradece o traballo realizado polos operarios municipais nas últimas semanas. 

Por outra banda, o Concello de Barbadás vén de recibir unha subvención da Xunta de Galicia para a renovación íntegra dos vestiarios das piscinas municipais. As obras realizaranse unha vez remate a actual temporada estival. “O próximo ano, a poboación poderá desfrutar duns vestiarios completamente renovados”, apunta Valcárcel.

As entradas e bonos pódense adquirir a través da APP do Concello ou da páxina web. 

O Concello de Barbadás inaugura a temporada estival coa apertura das piscinas municipais o sábado 13 de xuño.

O enlace para compra de entradas e bonos realízase a través do seguinte enlace: https://adminv2.appgalileo.com/reservas_galileo/dc66c88d-6dc3-4576-aa4a-93e58d3a0c49/

22/05/2026

LISTADO DEFINITIVO DE NEN@S ADMITID@S PARA O CURSO 2026-2027 NA ESCOLA INFANTIL MUNICIPAL DE BARBADÁS

07/05/2026

LISTADO PROVISIONAL ADMITIDOS/AS NA ESCOLA INFANTIL CURSO 2026/2027

30/03/2026

Dende o día 6 ao 17 de abril de 2026,  estará habilitada a recepción de solicitudes de matrículas novas para o curso 2026-2027 para a Escola Infantil Municipal de Barbadás.

O impreso de solicitude  estará dispoñible en

• Oficinas municipais da Casa do Concello
• Oficinas municipais de A Valenzá
• Na páxina web barbadas.es

PRAZOS

• Inscricións do 6 ao 17 de abril
• Listado provisional de admitidos: 7 de maio
• Listado definitivo: 22 de maio
• Formalización de matrícula do 25 de maio ao  5 de xuño

Unha vez cuberto, o impreso de solicitude poderá entregarse polos seguintes medios:

• No Rexistro das oficinas municipais da Casa do Concello
• Nas oficinas municipais de A Valenzá
• ou a través da Sede electrónica 

• A cita, organizada polo Concello de Barbadás en colaboración coa asociación cultural Moureán, terá lugar este sábado no Parque dos Carrís
• Xisco Feijóo, Axeigo, Comando Curuxás, Ailá e Compañía Galega de Bailables participan no evento, así como as agrupacións musicais do municipio

O Concello de Barbadás, en colaboración coa asociación Moureán, impulsa este sábado a II Foliada Moureán, unha cita que celebra as Letras Galegas e enxalza a cultura tradicional galega. “Trátase dunha xornada que pon en valor a nosa música, a nosa tradición, a nosa danza e a nosa gastronomía”, resaltou esta mañá Xosé Carlos Valcárcel, alcalde de Barbadás, na presentación do evento. 

A II Foliada conta este ano cun cartel de luxo, no que sobresae a figura de Xisco Feijóo, que impartirá un obradoiro de baile tradicional, e os grupos Axeigo, Comando Curuxás, Ailá e Compañía Galega de Bailables. “Queremos que cada edición supere á anterior para asentarnos no calendario de foliadas que se espallan por toda Galicia”, apuntou José Manuel Morgade, concelleiro de Cultura. 

As agrupacións musicais de Barbadás tamén terán un papel importante na xornada, xa que inaugurarán a II Foliada cun pasarrúas pola avenida de Celanova. Ás 12,00 horas, Nova Fronteira e a Banda de Música e Cultura de Barbadás percorrerán a rúa central da Valenzá para rematar no parque dos Carrís, onde tocarán na sesión vermú. O xantar popular, a base de porco ao espeto, comezará ás 14,00 horas. 

“Pola tarde comezamos co obradoiro de baile de Xisco Feijóo, de 16,00 a 18,00 horas, completamente gratuíto”, detallou Pablo García, de Moureán. A partir das seis da tarde actuarán Axeigo, Comando Curuxás, Ailá e Compañía Galega de Bailables e, unha vez rematen, arrancará a foliada, aberta a músicos e bailadores. 

O teniente alcalde, Daniel Rey, aproveitou a ocasión para poñer en valor a colaboración do Concello con colectivos culturais como Moureán, que dinamizan a vida cultural e social de Barbadás. “O parque dos Carrís e un espazo tremendo para realizar este tipo de eventos, para que a poboación os coñeza e os desfrute”, apuntou. 

“Teremos unha tarde chea de cultura e música e animamos a toda a poboación a que veña e desfrute con nós”, convidaron desde Moureán. 

O Concello de Barbadás conmemora e celebra o Día das Letras Galegas este 17 de Maio de 2026 compartindo o recoñecemento público á Begoña Caamaño, xornalista e escritora, cunha vida e obra profundamente marcadas polo seu compromiso local e social. A autora representa moi ben o espíritu da celebración: calidade literaria, defensa do galego e compromiso coa sociedade. 

A corporación local celebra dedicarlle o Día das Letras Galegas a unha persoa cunha clara influencia local, moi vinculada as súas dúas cidades vitais: Vigo e Santiago de Compostela. 

Nada en Vigo en 1964, Begoña Caamaño comezou alí a súa traxectoria profesional como xornalista, deixando unha pegada indeleble desde os seus inicios en Radio Popular e Radio do Noroeste, ata a súa definitiva incorporación á Radio Galega en 1989.

Catro ano despois proseguiu o seu labor na Radio Galega xa dende Santiago de Compostela ata 2012, sendo unha gran defensora dos medios públicos galegos e da súa función de proporcionar á cidadanía información e contidos precisos para poder decidir con liberdade e responsabilidade. Defendeu unha información de calidade e condicións laborais xustas, sendo a presidenta do Comité Interempresas da CRTVG de 2000 a 2003.

Como escritora, Begoña Caamaño destacou polo seu innovador labor nas súas novelas, “Circe ou o pracer do azul” (2009) e “Morgana en Esmelle” (2012), que foron pioneiras na reinterpretación feminista dos mitos. Nesa liña, cabe destacar o seu compromiso social e feminista, xa que o seu traballo estivo moi ligado á defensa da igualdade entre homes e mulleres, aos dereitos civís e á xustiza social. Nas súas historias, sempre apostou por mulleres protagonistas e cuestionou os relatos tradicionais. 

Coa súa homenaxe, Begoña Caamaño convértese na sétima muller á    que se lle adica o Día das Letras Galegas desde 1963, un número moi inferior ao dos homes distinguidos co maior recoñecemento da literatura galega. Rosalía de Castro, Francisca Herrera Garrido, María Mariño, María Vitoria Moreno, Xela Arias, Luísa Villalta, e agora Caamaño, son as escritoras homenaxeadas ata o de agora.

Na conmemoración do Día das Letras Galegas, o Concello de Barbadás atende o seu obxectivo de promover a cultura e a lingua galega no marco das competencias que o ordenamento xurídico lles atribúe ás corporacións locais de Galicia.

Historicamente, o municipalismo galego tivo un protagonismo decisivo na reivindicación do galego e na defensa da súa extensión social, participando activamente, xa en democracia, na “Declaración do Hostal dos Reis Católicos”, subscrita en 1984, en Santiago de Compostela, por 184 alcaldías de todas as tendencias políticas e de todos os puntos da xeografía galega.

Defendían a implantación do galego nas administracións públicas en Galicia, tanto no seu uso, como no seu coñecemento para o acceso ao emprego público.

Na actualidade, Barbadás continúa a defender a vixencia e a extensión do galego, garantindo a convivencia harmónica, e potenciando a presencia do galego nas novas canles derivadas do desenvolvemento das novas tecnoloxías da información e da comunicación.

Por mil primaveras máis para o galego.

O Concello de Barbadás, a través do Servizo Municipal de Deportes, organiza mañá a primeira edición da Cavernícola Race Kids, unha divertida carreira de obstáculos dirixida aos máis pequenos da familia. Preto de 200 nenos e nenas de máis de 4 anos participará mañá na proba deportiva, de 1,5 quilómetros de distancia.

Ao longo do percorrido, cativos e cativas terán que superar distintos tipos de obstáculos, como inchables, probas en auga e barro, porteos e suspensións. A proba comezará ás 11,00 horas diante do Polideportivo Municipal, con saídas sucesivas por quendas de idade. Por cuestións de seguridade, os máis pequenos terán que ir acompañados dun adulto durante a carreira.

Todos aqueles que cheguen a meta recibirán unha braga e unha medalla de finisher como agasallos, en agradecemento ao seu esforzo e espírito de superación. A carreira contará con dous speakers profesionais, Rosa Bolaño e Marcos Areas, quen animarán aos cavernícolas durante a experiencia. 

A carreira conta co patrocinio de Mapfre A Valenzá e coa colaboración de numerosas entidades e empresas como Xunta de Galicia, Deputación de Ourense ou Tecnotronic.

• O cuarto Campus Multideporte ofrece fútbol, fútbol sala, piscina, xogos polideportivos e saídas recreativas
• “Trátase dunha proposta moi saudable na que os nenos e nenas practican exercicio físico, socializan e aprenden valores como o compañeirismo e a deportividade”, apunta Xosé Carlos Valcárcel, alcalde

O Concello de Barbadás aposta polo deporte como ferramenta de conciliación das familias durante as vacacións escolares. Por cuarto ano consecutivo, o Concello colabora coa Academia Futsal no Campus Multideporte, unha actividade que non só inclúe exercicio físico, senón tamén moita diversión. “Trátase dunha proposta de conciliación moi saudable na que os nenos e nenas practican exercicio, socializan e aprenden valores como o compañeirismo e a deportividade”, apunta Xosé Carlos Valcárcel, alcalde de Barbadás, quen destaca a importancia de ofrecer alternativas ás familias. “A conciliación da vida laboral e familiar é unha gran preocupación da nosa veciñanza, e por iso este tipo de colaboracións entre institucións e entidades é clave”, resalta. 

Desde a Academia Futsal agradecen a colaboración do Concello e destacan a boa resposta das familias e dos participantes nas pasadas edicións. “Temos fútbol, fútbol sala, piscina, xogos polideportivos, saídas recreativas…”, detallan. O Campus Multideporte levarase a cabo en dúas quendas: do 29 de xuño ao 3 de xullo e do 6 de xullo ao 10 de xullo. Os prezos para os xogadores da Academia Futsal e para os empadroados en Barbadás é de 60 euros por semana e 100 euros as dúas semanas. Para o resto, 80 e 150 euros, respectivamente. 

As actividades realizaranse no Complexo Deportivo de Barbadás, no Campo de Fútbol, no Polideportivo e na Piscina Municipal. O horario, como é habitual, será de 9,30 a 13,30 horas, con servizo para madrugadores desde as 9,00 horas. Para formalizar a inscrición é preciso poñerse en contacto co 676 700 774 ou 613 404 907 ou a través do email academiafutsal@gmail.com.

• Máis de 530 persoas de toda España están inscritas na proba, que inclúe medio cento de obstáculos nos 8 quilómetros de percorrido 

O Concello de Barbadás, a través do Servizo Municipal de Deportes, ultima os detalles da sétima edición da Cavernícola Race Mapfre Barbadás, a máis participativa ata o de agora. Máis de 530 persoas de toda España se achegarán mañá á Valenzá para competir nalgunha das tres categorías da proba OCR (elite, starter e popular), incluída na Liga nacional AOCO, na Liga do Norte de España e na Aurum Terrae de Ourense. 

Nos 8 quilómetros de percorrido, os participantes enfrontaranse a medio cento de obstáculos, nos que terán que amosar a súa forza, axilidade, resistencia e destreza físicas. O equipo da Cavernícola, composto polo persoal do Servizo Municipal de Deportes e polo Cavernícola OCR Team, xa colocou as diferentes probas, entre as que hai aneis, murallas, cadeas, pirámides, tobogáns, rodas ou pasos na auga. Entre os novos obstáculos destacan os volantes xiratorios e o rocódromo xiratorio. 

A carreira comezará mañá ás 15,30 horas fronte ao Polideportivo Municipal e realizarase en quendas sucesivas das tres categorías. O remate da proba será tamén no mesmo lugar.  

Cabe destacar que este ano, por primeira vez, a Cavernícola tamén conta cunha categoría Kids dirixida a nenos e nenas de máis de 4 anos. A proba, de 1,5 quilómetros de percorrido, levarase a cabo o domingo 17 de maio. 

• “Os catro espectáculos programados colgaron o cartel de invitacións esgotadas días antes das funcións, estamos moi satisfeitos da resposta da xente”, resalta Xosé Carlos Valcárcel, alcalde de Barbadás

O ciclo cultural Noites Bárbaras, impulsado desde o Concello de Barbadás, remata este venres coa actuación dos belgas OkiDok tras unha gran acollida por parte do público, que esgotou as invitacións para todos os espectáculos programados durante os meses de marzo e abril. “Pablo Meixe, Sonoro Maxín, Leti da Taberna e agora, OkiDok, colgaron o cartel de invitacións esgotadas días antes das funcións”, destaca Xosé Carlos Valcárcel, alcalde de Barbadás. 

O goberno local apostou por recuperar este 2026 o ciclo Noites Bárbaras, e a acollida non podía ser mellor. “Estamos moi contentos da resposta da xente, comprometémonos con recuperar este ciclo e ofrecer propostas diversas e de calidade, e aí está a acollida da poboación ”, asegura o alcalde. José Manuel Morgade, concelleiro de Cultura, pon en valor o esforzo municipal: “Ofrecemos espectáculos de gran calidade de xeito gratuíto, para facelo accesible a todas as persoas, e é algo que nos diferencia de moitos outros concellos”. 

Os belgas OkiDok porán este venres o broche de ouro das Noites Bárbaras co seu espectáculo “Slips Inside”. Pierrot e Marcel subirán ao escenario para amosar o seu gran talento a través da acrobacia, o mimo, o humor e a danza. Trátase dunha proposta de gran calidade, premiada a nivel internacional no Clown Festival de Milán e con máis de 500 representacións en diferentes puntos da xeografía mundial. A función comeza ás 20,30 horas na Casa da Cultura.

• “A música fomenta a colaboración e a solidariedade”, resalta o alcalde, Xosé Carlos Valcárcel
• A gala, organizada pola Escola de Música Municipal de Barbadás (EMMB), terá lugar este sábado no auditorio do Conservatorio de Música de Ourense

O Concello de Barbadás colabora un ano máis no XI Festival Solidario, un evento organizado pola Escola de Música Municipal de Barbadás (EMMB) co obxectivo de fomentar a concienciación social da poboación. “A música fomenta a colaboración e a solidariedade”, resaltou esta mañá o alcalde, Xosé Carlos Valcárcel, na presentación do evento. 

Esta undécima edición está adicada á asociación Morea de familiares e persoas con trastorno mental grave, polo que os beneficios recadados irán destinados integramente ao seu traballo. “O traballo que realiza Morea, dirixido en corpo e alma ás persoas con trastorno mental grave, é moi importante”, apuntou Valcárcel. 

Alfonso Díaz e Carlota Díaz, director da asociación e coordinadora dos recursos de Morea en Ourense, agradeceron á EMMB a iniciativa solidaria. “Traballamos na integración social das persoas con enfermidade mental co obxectivo de que poidan estar nas súas casas, na súa comunidade, coa mellor calidade de vida posible”, explicou o director. “Estamos moi agradecidos de que nos escollesen para este festival, a visibilidade da saúde mental é moi beneficioso para nós e para toda a sociedade”, resaltou Carlota Díaz. 

Pola súa parte, Xohán Manuel Xil Paxaro, director da EMMB, convidou á poboación a asistir ao evento, que terá lugar este sábado, día 18 de abril, ás 19,00 horas no auditorio do Conservatorio de Música de Ourense. “Cambiamos un pouco o formato que viñamos facendo e este ano construímos unha historia que nos vai levar por Escocia, Irlanda e Galicia, da man dun curioso personaxe”, detallou. O concerto contará coa participación de máis dun cento de músicos, entre alumnado e profesores. Nesta liña, o alcalde destacou o traballo e esforzo da comunidade educativa ao longo destes meses para preparar un concerto de gran calidade. 

A vicedirectora do Conservatorio de Música de Ourense, Naiara Acuña, destacou a importancia da colaboración entre escolas musicais da provincia, non só para este evento solidario, senón tamén no resto de áreas. “Estamos encantados de ceder o espazo e de axudar para que este festival sexa posible”, asegurou. 

As entradas para o XI Festival Solidario xa están á venda no Centro Comercial Ponte Vella (no punto de información da primeira planta) por un prezo de 5 euros. “Agardamos que a xente acuda e que desfrute do repertorio musical que temos preparado. Nos tempos que corren, a música é un recuncho para desfrutar”, sinalou Xil Paxaro. 

• O goberno local prevé colocar este tipo de estruturas en diferentes zonas de xogos do municipio
• “Deste xeito, os nenos e nenas poderán xogar e desfrutar do espazo infantil independentemente de que chova ou faga moito sol”, apunta Xosé Carlos Valcárcel, alcalde

O Concello de Barbadás vén de realizar unha importante mellora no parque infantil do Campo de Roma, en Piñor, coa colocación de velas protectoras sobre os bambáns. A estrutura, composta por catro soportes e dúas teas de gran tamaño, protexe por completo a zona de xogos das inclemencias meteorolóxicas.

“Deste xeito, os nenos e nenas poderán desfrutar do parque independentemente de que chova ou faga moito sol”, apunta o alcalde, Xosé Carlos Valcárcel. A protección deste espazo permitirá que as familias fagan uso do espazo lúdico durante todo o ano, “non só durante as épocas de bo tempo”. 

O goberno local investiu preto de 18.000 euros na instalación das velas, que se poden desmontar e recolocar en caso de fortes temporais para evitar danos. O parque do Campo de Roma trátase da primeira zona infantil de Barbadás que conta con este tipo de estrutura, pero o Concello prevé estendelas a outros espazos do municipio. “Xa se tomaron medidas noutros parques para instalar máis velas, e segundo dispoñibilidade orzamentaria, irémolas colocando”, sinala Daniel Rey, tenente alcalde. 

• As entradas, de balde, pódense recoller desde hoxe na Casa da Cultura 

O Concello de Barbadás continúa co ciclo cultural Noites Bárbadas, recuperado recentemente polo goberno local. Este venres, 10 de abril, será Leti da Taberna, a famosa cómica galega, quen suba ao escenario da Casa da Cultura Manuel María. 

A compostelá Leticia Miraz, quen saltou á fama en 2020 grazas aos seus vídeos de TikTok, é unha das referentes actuais do humor galego. Co seu espectáculo “Enredada”, presentará ante o público de Barbadás un divertido monólogo no que reflexiona sobre a nosa relación coas redes sociais. Con ironía e perspectiva feminista, a cómica fará que os espectadores se vexan representados e acaben por rir de si mesmos. 

A función comeza ás 20,30 horas. As entradas, de balde, están dispoñibles desde hoxe e ata esgotar existencias na Casa da Cultura. O horario para recollelas é de 8,30 a 14,30 horas. 

Despois do espectáculo, o público poderá desfrutar dun petisco cortesía da hostalaría local de Barbadás. 

• Preto dun cento de rapaces e rapazas de 3 a 15 anos participaron estes días no Campus Multideporte e no Campus UD Barbadás
• A Casa da Mocidade acolle hoxe a última xornada do V Barbadás Gaming

O Concello de Barbadás aposta pola actividade deportiva e as novas tecnoloxías para a conciliación das familias durante a Semana Santa. As instalacións do Polideportivo Municipal e do campo de fútbol Os Carrís acolleron este mediodía o peche do Campus Multideporte e Campus UD Barbadás, no que participaron estes días preto dun cento de nenos e nenas de 3 a 15 anos.

“Son dúas actividades que funcionan moi ben e teñen moi boa acollida”, destaca o alcalde, Xosé Carlos Valcárcel. O Campus UD Barbadás contou coa visita do adestrador ourensán Fran Justo, así como de Zulema González, árbitra ourensá de Primeira División Feminina. 

Por outra banda, a Casa da Mocidade acolle hoxe a última xornada do V Barbadás Gaming, ao que pode asistir de balde a rapazada de máis de 12 anos. “Os nosos mozos e mozas poden probar o último en videoxogos e simuladores ao mesmo tempo que socializan e coñecen xente da súa idade”, apunta Valcárcel. O horario desta tarde é de 16,30 a 20,30 horas. Onte, na primeira xornada, a Casa da Mocidade recibiu a preto de medio cento de rapaces e rapazas ao longo da xornada. “Xa imos na quinta edición porque é unha proposta que lles gusta moito aos máis novos”, resalta o alcalde. 

• A intervención, valorada en 54.000 euros, inclúe o cambio das antigas tubaxes de fibrocemento por tubos de PVC

O Concello de Barbadás vén de iniciar as obras de renovación da rede de abastecemento de auga no entorno da Glorieta da Familia, na Valenzá. A actuación supón un investimento de 54.000 euros e inclúe o cambio das antigas tubaxes de fibrocemento por tubos de PVC en parte da rúa Areal (desde a Glorieta da Familia ata a rúa Salgueiriños) e rúa Salgueiriños. “Queremos que a nosa poboación teña un mellor servizo de abastecemento, moderno e nas mellores condicións posibles”, resalta Xosé Carlos Valcárcel, alcalde de Barbadás. 

Segundo a previsión do goberno municipal, as obras estenderanse durante as próximas tres semanas. “Trátase dunha mellora importante, xa que o fibrocemento estaba a provocar continuas roturas e fugas que conlevaban trastornos no abastecemento das vivendas da zona”, explica Daniel Rey, tenente alcalde e concelleiro de Obras. As novas tubaxes de PVC son máis resistentes, duradeiras e flexibles ca as antigas, ao mesmo tempo que contan cunha maior capacidade hidráulica.

• O programa levarase a cabo de luns a venres, de 9,00 a 14,00 horas, en 11 vilas do municipio

O Concello de Barbadás reforza o seu compromiso coa conciliación familiar cun campamento de verán durante os meses de xullo e agosto. A Concellería de Educación lanza a convocatoria do Barbadás Concilia Verán cun total de 240 prazas cada quincena, distribuídas entre 11 vilas distintas do municipio. “Desde o Concello sabemos da necesidade de conciliar, sobre todo durante os meses de verán, polo que facemos un esforzo importante para que un bo número de familias poida acceder a este servizo”, apunta Xosé Carlos Valcárcel, alcalde de Barbadás.

O programa levarase a cabo na Valenzá, en Barbadás, As Lamas, Piñor, Sobrado, Bentraces, Parada, Loiro, Finca Fierro, Fonsillón e Santa Uxía. No caso da Valenzá, haberá dúas quendas cada quincena, debido á elevada demanda. O campamento inclúe actividades lúdicas variadas, que se desenvolverán de luns a venres en horario de 8,00 a 14,00 horas. 

O prazo de inscrición permanecerá aberto ata o día 10 de abril, e as solicitudes poderán entregarse a través da sede electrónica do Concello de Barbadás ou de forma presencial no rexistro municipal (Casa Consistorial ou oficinas municipais da Valenzá). O campamento está dirixido unicamente a nenos e nenas nacidos entre 2014 e 2022. O custo da praza é de 20 euros por menor e quenda solicitada. 

O Concello publicará a lista provisional de admitidos o 20 de abril, a continuación abrirase o prazo para o pago do servizo ata o 5 de maio e o 8 de maio darase a coñecer o listado definitivo. 

O Concello de Barbadás, a través da Concellería de Igualdade, organiza este sábado un obradoiro de autodefensa para mulleres enmarcado na programación do 8M. As participantes aprenderán diversas técnicas de autodefensa durante a actividade, que estará guiada por persoal cualificado. O obxectivo é traballar na autoprotección das mulleres, ademais de crear un espazo seguro no que compartir experiencias. 

O prazo de inscrición está aberto ata este xoves, día 26 de marzo. Para anotarse é preciso enviar un correo electrónico a igualdade@barbadas.gal ou chamar ao teléfono 988 222 251. A actividade é gratuíta e levarase a cabo este sábado, día 28 de marzo, na Casa da Mocidade de Barbadás en horario de 11,30 a 13,30 horas. 

A programación do 8M en Barbadás continúa o venres 17 de abril na Casa da Cultura Manuel María coa representación da obra de teatro “As alumnas”, dirixida por Fina Calleja. Por outra banda, durante marzo e abril, estanse a desenvolver obradoiros de igualdade no CEIP Filomena Dato, CEIP O Ruxidoiro, CPR Luis Vives e IES Xesús Ferro Couselo. 

• “É un evento xa consolidado durante a Semana Santa para o desfrute da nosa mocidade”, apunta o alcalde, Xosé Carlos Valcárcel
• A participación é totalmente gratuíta

A Casa da Mocidade de Barbadás prepárase para acoller a quinta edición do Barbadás Gaming durante a Semana Santa. A cita, impulsada desde o Concello de Barbadás, propón diversión, competición e o último en videoxogos durante as xornadas do 31 de marzo e 1 de abril. “É un evento xa consolidado durante a Semana Santa para o desfrute da nosa mocidade a partir dos 12 anos”, apunta o alcalde, Xosé Carlos Valcárcel, que convida á participación. 

O V Barbadás Gaming ofrece competicións e xogo totalmente gratuítos, como é habitual, realidade virtual, simuladores de condución e as últimas novidades en Play Station 5. “Queremos que se divirtan en comunidade e que compitan de xeito san nun espazo pensado para eles”, sinala Valcárcel. O horario será de 11,00 a 14,00 horas e de 16,30 a 20,30 horas durante o martes 31 de marzo e o mércores 1 de abril. “Durante o evento haberá persoal municipal para responder calquera dúbida ou inquedanza dos mozos e mozas”, engade.

O rexedor municipal recorda a importancia de programar actividades dirixidas para a poboación nova, que moitas veces carece de oferta lúdica. “Por iso queremos que coñezan a Casa da Mocidade, para que saiban que poden facer uso das instalacións durante todo o ano”, resalta.  

As rúas da Valenzá enchéronse de cor rosa este domingo na III Carreira pola Igualdade e Contra a Violencia, organizada desde a Concellería de Igualdade de Barbadás. A cita deportiva, que rexistrou récord de participantes con 400 persoas inscritas, comezou ás 11,00 horas na Glorieta da Familia. 

O alcalde, Xosé Carlos Valcárcel; o tenente alcalde e concelleiro de Igualdade, Daniel Rey, e Silvia Arce, referente do deporte feminino en Barbadás, dirixíronse aos corredores antes do inicio da proba para agradecer a súa participación e recordar a importancia de seguir avanzando na igualdade plena entre homes e mulleres en todos os ámbitos da vida. 

A proba discorreu polas principais rúas da Valenzá e contou cun dispositivo de seguridade no que participaron axentes da Policía Local, Garda Civil, Protección Civil de Barbadás e agrupacións de Protección Civil doutros concellos da provincia. 

Técnicos de telecomunicacións reparan estes días a rede de Barbadás, despois de que o Concello solicitase a intervención do organismo competente, a Secretaría do Estado, ante os frecuentes problemas detectados nos últimos meses. 

Os técnicos comprobaron que existían fallas en torres de comunicación afectadas polas caídas de tensión durante os temporais, así como redes subterráneas inundadas. Actualmente, traballadores das empresas privadas de telecomunicación (en especial, Vodafone e R) están encargándose da reparación dos equipos afectados. 

O tenente alcalde, Daniel Rey, mantén contacto diario coas empresas e coa Secretaría do Estado para coñecer a evolución da situación. “Nos vindeiros días, os problemas da rede estarán solucionados”, avanza. 

O Concello de Barbadás conmemorou esta mañá o Día Internacional da Muller, 8 de marzo, cun acto institucional nas inmediacións da Glorieta da Familia. O tenente alcalde e concelleiro de Igualdade, Daniel Rey, aproveitou a ocasión para poñer en valor a importante tarefa das traballadoras do CIM de Barbadás, que traballan diariamente coas mulleres máis vulnerables do municipio. 

Silvia Arce, referente de deporte feminino en Barbadás, e Eva Rey, veciña integrante da Asociación Galega de Covid Persistente, deron lectura dos manifestos, nos que se reivindico a igualdade de oportunidades e a fin da discriminación de xénero.

A veciñanza puido achegarse durante toda a mañá ao posto informativo do CIM, onde recibiron información sobre o servizo municipal de atención ás mulleres. 

• A programación inclúe música, monólogos e humor na Casa da Cultura os meses de marzo e abril
• “Ao remate de cada espectáculo haberá un ágape de distintos bares e restaurantes”, explica o alcalde, Xosé Carlos Valcárcel

O Concello de Barbadás recupera o ciclo cultural “Noites Bárbaras” e incorpora como novidade a colaboración dos negocios hostaleiros do municipio. Ao remate dos espectáculos na Casa da Cultura Manuel María, o público poderá gozar de ágapes cortesía de distintos bares e restaurantes de Barbadás. “Queremos acompañar a cultura do impulso do tecido económico e social do municipio”, explicou o alcalde, Xosé Carlos Valcárcel, na presentación do ciclo. 

O concelleiro de Cultura, José Manuel Morgade, convidou á poboación a desfrutar da oferta, que inclúe música, humor e monólogos. “Comezamos o 13 de marzo con Pablo Meixe, un monologuista galego que ten moito éxito tanto en Galicia como no resto de España”, destacou. A programación continúa o venres 27 de marzo co concerto do grupo ourensán Sonoro Maxín, e o 10 de abril co espectáculo “Enredada” de Leti da Taberna. “Rematamos o 24 de abril cos belgas Okidok, unha das mellores compañías a nivel europeo”, apuntou Morgade. 

As citas comezarán ás 20,30 horas e a entrada será de balde. As invitacións poderán recollerse na Casa da Cultura durante a propia semana do espectáculo. 

Día do Pai

Na liña de colaboración entre cultura e tecido económico local, o Concello de Barbadás propón o “Conssertasso na Horta” de Brais das Hortas para apoiar a compra local. “Aquelas persoas que compren no comercio local entre o 5 e o 19 de marzo por importe total de 30 euros recibirán un ticket familiar para acudir ao concerto”, detallou o concelleiro. 

O concerto levarase a cabo o día 28 de marzo ás 17,30 horas no Museo da Gaita de Fole de Barbadás. 

• O pleno aprobou o expediente de subvencións nominativas para colexios, ANPAs, clubes e asociacións culturais do municipio

O Concello de Barbadás mobiliza preto de 120.000 euros para impulsar actividades educativas, culturais e deportivas no municipio. O pleno aprobou esta tarde, en sesión ordinaria, o expediente presentado polo goberno local de subvencións nominativas para colexios, asociacións de pais e nais, asociacións culturais e clubes deportivos. O alcalde de Barbadás, Xosé Carlos Valcárcel, destacou que estas axudas permitirán que as entidades sigan realizando a súa importante tarefa no tecido educativo, cultural e social de Barbadás.

En particular, o ANPA Filomena Dato, o ANPA O Ruxidoiro, o ANPA IES Ferro Couselo, o Club Veteranos Sobrado e o Club Veteranos Barbadás recibirán 1.000 euros respectivamente; o CEIP O Ruxidoiro e o CEIP Filomena Dato percibirán 1.500 euros cada un; a Asociación Cultural Música e Cultura de Galicia recibirá 2.250 euros; a Asociación Cultural Loiro Na Memoria e a Asociación Fonval recibirán 3.000 euros cada un; a Asociación Cultural Nova Fronteira e a Asociación Cultural Ritmos Musicais recibirán 4.000 euros respectivamente; a Unión Deportiva Barbadás recibirá 35.000 euros e Asociación Deportiva Parada de Piñor, 60.600 euros. O goberno local explicou que a subvención á Asociación Deportiva Parada de Piñor está motivada porque mentres a titularidade do campo de fútbol non se traspasa ao Concello, é necesario facer obras de calado para reforzar a seguridade da instalación e evitar riscos aos usuarios. 

O expediente aprobouse cos votos a favor do grupo de goberno, Partido Galego e PSdeG-PSOE, a abstención do BNG e os votos en contra do PP. 

A Praza Vella da Valenzá pasa a chamarse Praza Alfonso Rodríguez Castelao

O goberno local tamén levou a pleno os expedientes de cambio de denominación de rúas na Valenzá e nas Lamas. No caso da Valenzá, a Praza Vella pasará a chamarse Praza Alfonso Daniel Rodríguez Castelao, na honra do escritor, dramaturgo, ensaísta, político e debuxante galego. O goberno local, logo de atender as propostas dos distintos grupos políticos, optou por esta praza para evitar os prexuizos que conlevaría á veciñanza e aos negocios o cambio de denominación do seu enderezo habitual. “Temos que ser responsables co alcance das medidas e o impacto na veciñanza, e por iso propoñemos a Praza Vella en lugar da avenida de Celanova, na que viven miles de familias”, apuntou Daniel Rey, tenente alcalde de Barbadás. Rey avanzou o proxecto do Concello para incluír un motivo adicado a Castelao, así como humanizar a praza e “facela accesible á xente e non aos vehículos”.

A proposta, vinculada a un acordo plenario do 2025, foi aprobada cos votos do goberno local e do PP, a abstención do PSdeG-PSOE e os votos en contra do Partido Galego e do BNG. Tanto Partido Galego como BNG defenderon que debería ser a avenida de Celanova a vía denominada Alfonso Daniel Rodríguez Castelao. 

No caso das Lamas, a rúa Milladoiro pasa a denominarse “rúa Milladoiro das Lamas”, para evitar confusións coa rúa Milladoiro localizada en Finca Fierro. O tenente alcalde, Daniel Rey, deu conta das queixas da veciñanza ante os erros das empresas de transporte e de reparto. O expediente aprobouse cos votos a favor do goberno local, Partido Galego, PP e BNG e a abstención do PSdeG-PSOE. 

O Concello de Barbadás continúa apostando pola sensibilización ambiental da mocidade a través de accións formativas nos centros educativos do municipio. Neste marco, o CEIP O Ruxidoiro acolleu un obradoiro de reciclaxe dirixido ao alumnado, co obxectivo de promover hábitos responsables na separación de residuos e impulsar unha cultura de reutilización e economía circular desde idades temperás.

Durante a sesión, o alumnado participou en dinámicas prácticas e participativas orientadas a aprender a separar correctamente os residuos, identificar os materiais que poden ser reciclados, evitar erros comúns e comprender o impacto positivo que teñen os pequenos xestos diarios no medio ambiente. A través de xogos e exemplos próximos á súa realidade, os participantes descubriron que reciclar é sinxelo e está ao alcance de todos.

Por outra banda, o pasado venres, o Concello de Barbadás realizou unha nova entrega de composteiros no Centro Empresarial Transfronteirizo (CET), reforzando o compromiso municipal coa sustentabilidade e coa creación de hábitos saudables e responsables cara ao medio ambiente.

Para máis información sobre futuras actividades, pódese consultar a web municipal ou os canais oficiais do Concello.

As persoas interesadas poden atopar toda a información actualizada na páxina web: barbadas.ocaminosostible.gal. Tamén poden contactar a través do teléfono 647 521 464 ou do correo electrónico info@ocaminosostible.gal.

Esta iniciativa conta co apoio da Xunta de Galicia e o financiamento do Plan de Recuperación, Transformación e Resiliencia – Next Generation EU, e forma parte da aposta do Consorcio As Mariñas por un modelo de xestión sostible e de proximidade, implicando á cidadanía na redución e valorización dos seus propios residuos.

O Concello de Barbadás, ABANCA e Afundación inauguraron esta mañá a exposición “Arte e humor. O enxeño de Antonio Mingote” na Casa da Cultura. O acto contou coa presenza de Xosé Carlos Valcárcel, alcalde de Barbadás; Daniel Rey, tenente de alcalde; José Manuel Morgade, concelleiro de Cultura; Mateo Alonso, coordinador institucional de ABANCA en Ourense; Miguel Madriñán, director da oficina de ABANCA na Valenzá, e a coordinadora de Afundación en Lugo e Ourense, Beatriz Fernández-Anguiano. 

A mostra, organizada en colaboración coa Fundación Antonio Mingote, percorre a historia da arte a través da mirada do coñecido debuxante. Poderase visitar ata o 27 de marzo en horario de 8,30 a 14,30 horas e de 16,00 a 20,00 horas. 

Antonio Mingote comezou a súa traxectoria con tan só 13 anos, cando publicou o seu primeiro debuxo en Gente Menuda. Foi colaborador en La Codorniz e, posteriormente incorporouse ao diario ABC. Tamén colaborou en numerosos medios escritos como The New York Times, The Daily Telegraph, Blanco y Negro, Semana, Ínsula ou Interviú.

• A primeira fase consiste na instalación dun ascensor para conectar mecanicamente as dúas plantas do recinto deportivo
• A continuación, a segunda planta dotarase de ximnasio, sala para actividades e vestiarios, co obxectivo de rematar todo en novembro

O Concello de Barbadás vén de activar a primeira fase das obras de ampliación do Polideportivo Municipal, un dos principais proxectos do goberno local no municipio. O alcalde, Xosé Carlos Valcárcel, o e o tenente alcalde e concelleiro de Obras, Daniel Rey, asinaron esta mañá a acta de replantexo da intervención, que comezará ao longo da próxima semana. 

“Esta primeira fase das obras inclúe a construción dun ascensor que conectará a primeira planta coa segunda, onde se colocará unha cuberta e se ubicará o novo ximnasio, a sala de clases dirixidas e os vestiarios”, explica Valcárcel. A actuación, orzamentada en 150.000 euros, permitirá conectar polo interior do polideportivo as dúas plantas, ata o de agora só conectadas por un tramo de escaleiras exteriores. 

Nunha segunda fase, a planta superior, actualmente ao descuberto, cambiará por completo a súa aparencia. Así, construiranse os vestiarios e a estrutura da envolvente do ximnasio, no que haberá unha sala para actividades dirixidas. “Esta ampliación permitirá incrementar o número de socios e mellorar o servizo notablemente, xa que haberá maior frecuencia de actividades ao contar cun espazo propio e a pista central do Polideportivo quedará liberada para eventos deportivos”, engade o alcalde. 

Cabe destacar a elevada demanda de socios das instalacións deportivas municipais, que contan con máis dun milleiro de persoas inscritas. O proxecto de ampliación, que deberá estar rematado a mediados do mes de novembro, conta cun orzamento total de 1,2 millóns de euros.

• Poker Premium Monterrey y Pereiro recibiu o primeiro premio na categoría de comparsas de máis de 10 participantes 
• Fórmula 1 resultou vencedora na categoría de comparsas de 10 ou menos participantes 

Preto dun milleiro de persoas percorreron este martes pola tarde as rúas da Valenzá no Gran Desfile de Entroido de Barbadás. Un total de 32 comparsas participaron na cita entroideira, unha das máis esperadas cada Entroido pola veciñanza. As agrupacións amosaron a súa creatividade e orixinalidade e encheron de cor, diversión e música as rúas da vila. 

Despois do desfile, o xurado, presidido polo concelleiro de Cultura, José Manuel Morgade, e composto por cinco persoas representativas do ámbito da cultura e do asociacionismo no municipio, deu a coñecer o seu veredicto. 

Na categoría de comparsas de 10 ou menos participantes: 

• 1º Premio (550 euros): FÓRMULA 1.
• 2º Premio (450 euros): CHAPA-CHIPS OS DRAGÓNS DA RIBEIRA SACRA.

Na categoría de comparsas de máis de 10 participantes:

• 1º Premio (1.100 euros): POKER PREMIUM MONTERREY Y PEREIRO.
• 2º Premio (800 euros): LA TOMBOLA ANTOÑITOS.
• 3º Premio (700 euros): O ENXAME DA AURIA.
• 4º Premio (500 euros): E CHEGOU O NADAL A FINCA FIERRO ANTES QUE A VIGO.
• 5º Premio (450 euros): TRUMP NON MOVAS OS MARCOS.
• 6º Premio (350 euros): VIKIFARRAS DAS LAMAS.
• 7º Premio (300 euros): DENOMINACIÓN ORIXE A PARADA.
• 8º Premio (250 euros): OS REXOUBEIROS-ALADIN.

Ademais, entregáronse dous galardóns especiais para comparsas non premiadas:

• Especial deseño (250 euros): PERFECTAMENTE IMPERFECTO.
• Especial animación (250 euros): MOVETE ENTRE MEDUSAS.

Por outra banda, tamén se concederon os galardóns aos mellores mecos, elixidos por votación popular nas últimas semanas. 

      – 1º Premio (300 euros): Asociación de Veciños San Martín de Loiro.

      – 2º Premio (200 euros): Asociación de Veciños San Bieito de Bentraces.

      – 3º Premio (100 euros): Comunidade de Veciños Os Carrís 5.

Centos de nenos e nenas participaron este luns pola tarde na Festa Infantil de Entroido de Barbadás, unha das actividades máis esperadas polos máis pequenos do municipio. A música e a diversión foron as grandes protagonistas da cita, que incluíu o xa tradicional Concurso de Desfraces. Pola pasarela de Entroido pasearon superheroes, cantantes, animais, pintores, princesas e moitos outros personaxes.

O alcalde de Barbadás, Xosé Carlos Valcárcel, o tenente alcalde, Daniel Rey, e o concelleiro de Educación, José Manuel Morgade, non quixeron perderse a celebración, que finalmente se levou a cabo no patio do CEIP Filomena Dato debido á previsión de chuvia. 

Centos de familias de Barbadás acudiron esta mañá ao CEIP Filomena Dato, CEIP O Ruxidoiro e CPR Luis Vives para desfrutar dos desfiles infantís de Entroido. Alumnado e docentes deron boa conta da súa creatividade, acompañados de música e moita animación. A cita, impulsada desde a Concellería de Educación, levouse a cabo nos patios dos centros educativos debido á previsión meteorolóxica. 

O alcalde, Xosé Carlos Valcárcel, e o tenente alcalde, Daniel Rey, tamén acudiron aos desfiles. “É un gusto ver a orixinalidade e o traballo detrás dos desfraces de alumnos e profesores”, destaca Valcárcel.

O Concello de Barbadás continúa coa campaña de compostaxe doméstica coa que busca fomentar a correcta xestión dos biorresiduos nos fogares e promover prácticas máis sostibles no municipio.

A próxima entrega de composteiros terá lugar o venres 27 de febreiro ás 19,00 horas no Centro Empresarial Transfronteirizo, nunha sesión informativa na que as persoas participantes recibirán formación básica para comezar a compostar no seu fogar.

Esta iniciativa permitirá que os veciños e veciñas con pequeno terreo poidan transformar os seus restos orgánicos en abono natural de alta calidade, reducindo así a cantidade de lixo que chega ao colector e contribuíndo a unha economía circular máis eficiente en Barbadás.

O Concello facilitará aos fogares participantes un composteiro de balde, formación e acompañamento, para garantir unha correcta posta en marcha e seguimento do proceso.

Nas próximas semanas celebraranse novas sesións en diferentes puntos do municipio, que serán anunciadas a través dos canais oficiais do Concello. A inscrición continúa aberta para aquelas persoas interesadas en participar na campaña.

As persoas interesadas poden atopar toda a información actualizada na páxina web: barbadas.ocaminosostible.gal. Tamén poden contactar a través do teléfono 647 521 464 ou do correo electrónico info@ocaminosostible.gal.

Esta iniciativa conta co apoio da Xunta de Galicia e o financiamento do Plan de Recuperación, Transformación e Resiliencia – Next Generation EU, e forma parte da aposta do Consorcio As Mariñas por un modelo de xestión sostible e de proximidade, implicando á cidadanía na redución e valorización dos seus propios residuos.

• Realizará as prácticas nos meses estivais e sumarase definitivamente ao cadro de persoal en outono
• O procedemento administrativo para a segunda praza xa está aberto a través da modalidade de mobilidade

O Concello de Barbadás incorporará a dous axentes de Policía Local ao longo deste 2026 para reforzar o actual cadro de persoal e a seguridade da poboación. Un dos dous axentes, que xa está formándose na Academia Galega de Seguridade, realizará as prácticas en Barbadás nos meses de verán para incorporarse definitivamente á xefatura nos meses de outono. Así o anunciou Daniel Rey, tenente de alcalde e concelleiro de Emerxencias, no pleno ordinario deste luns. 

Pola súa parte, a segunda praza cubrirase mediante a modalidade de mobilidade. “O procedemento administrativo xa está aberto, non sabemos canto se pode demorar, pero en canto se resolva teremos ao segundo novo axente da Policía Local”, detallou Rey durante a sesión plenaria. 

A chegada dos dous novos traballadores súmase á aposta do goberno local por reforzar os medios persoais e técnicos da xefatura. Nos últimos meses, o Concello de Barbadás renovou a frota da Policía con dous novos vehículos que facilitan os desprazamentos en perímetros urbanos e rurais, así como as tarefas de vixilancia. 

Preto de 148.000 euros para o SAF en 2024

O goberno local tamén deu conta na sesión plenaria do custo do Servizo de Axuda no Fogar (SAF) para as arcas municipais e sinalou a posibilidade de denunciar á comunidade autónoma ou ao ministerio correspondente por non facerse cargo do 100% do servizo. “Estamos vendo a posibilidade de presentar unha demanda conforme ao que nos indiquen os asesores xurídicos”, asegurou Xosé Carlos Valcárcel, alcalde de Barbadás. 

Nesa liña, detallou o gasto do SAF durante 2024. Dos 348.307,25 euros que custou o servizo, o Concello de Barbadás tivo que aportar preto de 148.000 euros. “Desde o goberno imos loitar pola vía xudicial para que os veciños e veciñas de Barbadás teñan melloras na atención a domicilio”, apuntou o rexedor. 

Plan EDIL

No pleno tamén se abordou o Plan EDIL (Estratexia de Desenvolvemento Integrado Local) que supón un investimento de 7,2 millóns de euros a repartir entre Barbadás, Pereiro de Aguiar e San Cibrao das Viñas. O alcalde detallou a prioridade do proxecto: a senda peonil entre A Valenzá e Pontón, que conectará Barbadás con San Cibrao. Tamén apuntou a mellora da accesibilidade do centro de saúde da Valenzá ou a cobertura da pista da Solaina, entre outras actuacións. 

Respecto á intervención no entorno do centro de saúde, Xosé Carlos Valcárcel informou de que a Deputación está a avaliar a mellor opción para salvar a pendente. “Están analizando se é mellor o elevador ou unha rampla”, explicou. 

Proxectos en marcha

O tenente alcalde, Daniel Rey, tamén informou de proxectos que xa están en marcha no Concello de Barbadás, tales como a colaboración da Deputación para mantemento de zonas verdes e reparacións de pavimentos, o convenio con Seaga para a limpeza de vías de titularidade municipal ou a mellora do abastecemento na urbanización Vaamonde por parte da empresa Veolia (antiga Viaqua). 

Na mesma liña, informou da solicitude ante Agader da reparación da escola vella de Piñor, o lavadoiro de Godexás, o lavadoiro de Fonte do Bispo e dun camiño peonil entre Parada e As Lamas. “Tamén estamos traballando para sacar un contrato para a reparación urxente de fochancas causadas pola climatoloxía adversa destas semanas”, indicou Rey. 

O Concello de Barbadás convida un ano máis á poboación a participar no concurso de mecos de Entroido convocado pola área de Cultura. O obxectivo do goberno local é recuperar e poñer en valor esta tradición, propia do Entroido ourensán, que pouco e pouco vai perdendo forza entre as novas xeracións. 

O concurso está aberto á participación de calquera persoa ou grupo de persoas (asociacións veciñais, culturais e formacións musicais, entre outras) que elabore un meco e o expoña nalgún punto xeográfico dentro do municipio. O prazo para anotarse estará aberto ata as 12,00 horas do venres 6 de febreiro, e a inscrición deberá formalizarse a través deste link. 

A veciñanza será quen escolla os tres mecos máis orixinais, creativos e divertidos entre os inscritos. Así, quen o desexe poderá votar de xeito telemático, entre o 9 e o 16 de febreiro, a través deste link. 

O Concello premiará con 600 euros aos autores dos tres gañadores: 300 euros para o meco máis votado, 200 para o segundo e 100 para o terceiro.  

• Trátase de parques, arredores de colexios e zonas deportivas 

O Concello de Barbadás vén de sinalizar nove novos espazos libres de fume e aerosois repartidos entre A Valenzá e Barbadás. A iniciativa, en colaboración coa Asociación Española Contra o Cancro (AECC) de Ourense, pretende reducir o negativo impacto do tabaquismo na poboación. “Trátase de parques, entornos de centros educativos e zonas deportivas moi frecuentadas pola veciñanza e onde queremos evitar a presenza de fume”, explica o alcalde, Xosé Carlos Valcárcel. 

O entorno do CEIP Filomena Dato e O Ruxidoiro, as canchas do Paseo dos Amieiros, o Campo de Fútbol “Os Carrís”, o Parque da Solaina, o Parque dos Patos, o Parque do Tren e os arredores da Casa da Cultura e da Casa Consistorial son os nove espazos onde non está permitido o uso de cigarrillos ou vapeadores. “Esta medida protexe á poboación que non fuma, conciencia aos máis pequenos e disuade aos fumadores de facelo, protexéndoos tamén”, asegura Valcárcel. 

O impacto do tabaco na saúde é claro: o 30% de todos os tipos de cancro están provocados por fumar, segundo os datos de AECC. 

O alumnado de 3º e 4º de Educación Primaria dos CEIP Filomena Dato e O Ruxidoiro participaron estes días nos obradoiros de compadres e comadres organizados pola Concellería de Educación dentro da programación do Entroido. Durante as sesións, impartidas por Sabela Gago, os nenos e nenas puxeron en práctica a elaboración tradicional dos mecos que usarán nas regueifas dos próximos días 5 e 12 de febreiro. 

• A intervención está orzamentada en preto de 58.000 euros 

O Concello de Barbadás vén de iniciar o expediente de licitación da reforma íntegra do muro de contención do Parque da Liberdade, na Valenzá. A actuación, valorada en preto de 58.000 euros, inclúe a demolición do actual muro, o movemento de terras para lograr unha correcta drenaxe das augas de escorrentía, a construción dunha nova cimentación e dun novo muro e o recheo e recuperación da zona verde afectada. O obxectivo do goberno local é que as obras estean rematadas a finais da primavera. “É unha obra moi necesaria por motivos de seguridade”, asegura Daniel Rey, tenente alcalde e concelleiro de Obras. 

A intervención solucionará as deficiencias estruturais, que provocaron un derrubamento na parte máis alta do muro o pasado mes de maio. “A aparelladora técnica municipal informou entón da necesidade de realizar un estudo técnico para avaliar as causas do derrubamento e deu orde de balizar a zona por precaución”, explica Rey. 

O estudo consistiu na realización de catas no parque, na beirarrúa e no propio muro por parte de persoal técnico externo. “O informe resultante indicou que a altura do muro, a capacidade estrutural insuficiente e a acumulación de auga no trasdós por drenaxe deficiente provocaron o fallo”, detalla o tenente alcalde. A actuación realizarase de acordo ás indicacións técnicas para mellorar a capacidade portante da parede e reforzar así a seguridade do entorno, moi utilizado por poboación de todas as idades. 

• “Este ano temos unha programación intensa e extensa”, asegura Xosé Carlos Valcárcel, alcalde de Barbadás
• As inscricións para participar no Gran Desfile do martes de Entroido xa están abertas

O Concello de Barbadás aposta pola tradición na programación do Entroido 2026, onde non faltan os mecos, as regueifas, as charangas e os cantos de taberna. “Este ano temos unha programación intensa e extensa”, asegurou esta mañá Xosé Carlos Valcárcel, alcalde de Barbadás, na presentación do programa. 

O concelleiro de Cultura, José Manuel Morgade, convidou á poboación a desfrutar das actividades, que comezaron esta mesma semana cos obradoiros de compadres e comadres nos CEIP Filomena Dato e O Ruxidoiro. O obradoiro de elaboración da máscara dos Follateiros de Lobios deste sábado, así como as regueifas infantís de compadres e comadres suporán a antesala dos días grandes, que comezan o venres 13 co desfile infantil dos centros educativos. 

“O programa ten certas modificacións respecto a anos anteriores, como o desfile infantil, no que volvemos ao modelo anterior e cada colexio desfila por separado”, detallou Morgade. Nesa liña, lamentou a desinformación vertida polas concelleiras do PSdeG, e fixo fincapé na seguridade dos participantes. “O ano pasado amoreáronse máis de 1.000 nenos e nenas nun tramo moi pequeno”, recordou o alcalde. Pola súa parte, o tenente alcalde e concelleiro de Emerxencias, Daniel Rey, reiterou a importancia de manter a seguridade e evitar alteracións da mobilidade dunha vía con “tráfico denso” en horas punta. 

O mesmo venres, Xusto Calviño e o Grupo defensor do Meco encargaranse de realizar o pregón do Entroido na Glorieta da Familia, que estará acompañado pola actuación musical do Grupo Zoadeira e polos cantos de taberna de Cuncas do Son. Os dous grupos realizarán unha rolda musical de inicio de Entroido polos diversos establecementos hostaleiros da Valenzá ata as 22,30 horas. “O ano pasado, o venres pola noite houbo unha discoteca móbil, pero a estatística fíxonos suspender ese evento. A Policía Local e Protección Civil atendeu numerosos incidentes relacionados con intoxicacións etílicas, vandalismo e pelexas, e este goberno municipal non vai permitir este tipo de situacións”, sinalou Rey. 

O sábado, a música trasladarase ás aldeas do concello grazas á Charanga Big Band, que percorrerá o municipio de 17,00 a 21,30 horas. A Charanga Europa encargarase de poñer a nota musical na Valenzá na mañá do domingo, de 10,00 a 14,00 horas. 

O luns de Entroido será a quenda da celebración para os máis pequenos de Barbadás, que poderán participar na Festa Infantil de Disfraces no Parque da Solaina, a partir das 16,30 horas. 

Inscricións abertas para o Gran Desfile

O martes de Entroido terá lugar na Valenzá o habitual Gran Desfile de Barbadás, unha cita que congrega a milleiros de persoas na Avenida de Celanova. As inscricións para participar permanecerán abertas ata o día 16 de febreiro ás 12,00 horas. Como é habitual, haberá premios para as mellores comparsas. “Este ano fixemos modificacións nas bases para que estean moito máis claras para os participantes”, asegurou Xosé Carlos Valcárcel. 

O Gran Desfile comezará ás 17,00 horas e rematará ás 20,00 horas coa entrega dos premios e animación musical. Ante o elevado número de vehículos que se desprazan ata A Valenzá para desfrutar da cita entroideira, o párking do Carrefour estará aberto para facilitar o aparcamento. “No operativo de seguridade participarán efectivos médicos, Protección Civil, Policía Local de Barbadás, Policía Local de Ourense e efectivos da Guarda Civil”, detallou Rey, quen agradeceu a colaboración de todas as áreas e corpos involucrados para lograr unha celebración segura. 

O Desfile Fúnebre e a Queima do Meco do mércores 18 porán o punto e final á celebración entroideira. Na cita, que arranca ás 20,00 horas, participarán viúvas, bispos, cregos e monxas, que acompañarán ao meco ata a Praza Vella da Valenzá.

Este ano, o goberno local suspendeu o concurso para a elaboración cartel de Entroido debido ás polémicas das dúas edicións pasadas. “Hai dous anos, o suposto artista enviou o mesmo cartel en diversas localidades de España, o que lle quita o elemento creativo e tradicional, e o ano pasado, acusouse de plaxio ao autor”, apuntou Valcárcel. 

O tenente alcalde de Barbadás, Daniel Rey, reuniuse esta semana con parte do voluntariado do programa CER (Captura, Esterilización, Retorno) de colonias felinas do municipio. O encontro permitiu fixar os obxectivos deste 2026 ao mesmo tempo que escoitar as demandas e necesidades do equipo.

A Tenencia de Alcaldía, a través das áreas de Emerxencias e Protección Civil e Medio Ambiente, coordina a preto de 20 voluntarios e voluntarias de diversas asociacións protectoras, que se encargan de proporcionar alimento, esterilización e atención veterinaria ás colonias de gatos. Cabe destacar que a normativa sobre protección animal obriga aos concellos a xestionar as colonias felinas para garantir unhas boas condicións de vida. 

O tenente alcalde pon en valor a “importante labor” realizada polo voluntariado e pide colaboración ao resto da poboación. “A veciñanza debe respetalos e axudalos, están facendo unha labor altruísta en prol do benestar animal e do cumprimento da lexislación”, asegura Rey. 

O Concello de Barbadás inicia esta semana en cinco parroquias os obradoiros anuais de memoria dirixidos a persoas adultas. A actividade, centrada na estimulación cognitiva a través de exercicios lúdicos vinculados coa linguaxe e cos números, ten como obxectivo mellorar a memoria dos participantes ao mesmo tempo que fomentar a súa socialización. “Estes obradoiros, que se veñen desenvolvendo dende hai xa bastantes anos, teñen unha gran demanda”, asegura Daniel Rey, tenente alcalde e concelleiro de Servizos Sociais. 

O alcalde, Xosé Carlos Valcárcel, e Daniel Rey visitaron onte o local social de Loiro, primeira parroquia onde comezou a actividade. Ao longo da semana sumaranse Sobrado do Bispo, A Valenzá, Bentraces e Piñor. As persoas interesadas en inscribirse aínda poden facelo a través do teléfono 988 393 168 ou na área de Servizos Sociais. O custo da actividade é de 40 euros por tempada, que remata a finais de ano.

Os obradoiros están impartidos por persoal da Asociación de Familiares de Enfermos de Alzhéimer (AFAOR) a través dun convenio co Concello de Barbadás.

• As actuacións relacionadas con mantemento, coas áreas sociais do concello e con operativos programados supoñen o groso do servizo
• “Desde 2023, asumimos tanto funcións de emerxencias como de Protección Civil como de incendios forestais, na parte preventiva e na de extinción”, detalla o concelleiro Daniel Rey

A área de Emerxencias e Protección Civil do Concello de Barbadás reforzou a súa actividade durante o 2025 cun notable incremento das súas atencións. Se o servizo rexistrara en 2024 un total de 1.015 actuacións, no 2025 a cifra aumentou ata as 1.774, preto do dobre. O equipo humano, composto por unha trintena de profesionais entre persoal remunerado e voluntario, realizou máis de 10.000 horas de atencións no último ano.

Daniel Rey, tenente alcalde e edil de Emerxencias, dá conta da ampliación dos servizos atendidos pola Concellería nos últimos anos. “Desde 2023, asumimos tanto funcións de atención de emerxencias como de Protección Civil como de incendios forestais, na parte preventiva e na de extinción”, detalla. Rey pon en valor o labor “encomiable” desempeñado polo xefe da agrupación e polo persoal e sinala a gran “profesionalidade” de todo o equipo: “Un profesional é quen sabe exercer o seu traballo dun xeito acaído, sexa voluntario ou remunerado”. 

Actualmente, a Concellería de Emerxencias traballa de xeito transversal co resto de áreas municipais. Nesa liña, en 2025 as actuacións relacionadas con mantemento e coas áreas sociais do Concello foron as intervencións máis comúns, cun total de 460 entre xaneiro e decembro. “Protección Civil colabora con Asuntos Sociais en domicilios, en eventos divulgativos, con Saúde en atención a primeiros auxilios cando os recursos sanitarios están desbordados…”, explica Rey.

Os operativos programados son o segundo servizo máis frecuente, con 392 durante o pasado ano. Esta categoría inclúe os dispositivos especiais de Entroido e Nadal ou de eventos de asistencia masiva como o Rally Mix Barbadás, a romaría de San Bieito de Cova do Lobo, a Cavernícola Race ou as Festas da Valenzá.

As intervencións con animais (277), os operativos preventivos de risco (129) e as atencións en accidentes viais (107) completan o listado das actuacións máis habituais de Protección Civil. 

Por outra banda, cabe destacar o incremento dos servizos vinculados a incendios no 2025, sobre todo durante a vaga de lumes que asoballou a provincia o pasado mes de agosto. Protección Civil acudiu a un total de 73 incendios ao longo do ano, dos que medio centenar eran forestais. As alertas de avespa velutina, pola súa parte, seguen reducíndose no municipio, na mesma liña que en 2024. O servizo atendeu 69 avisos deste tipo o ano pasado, preto dunha vintena menos que no exercicio anterior. 

Equipamentos e vehículos

Ante o aumento da actividade de Protección Civil, o Concello de Barbadás reforza o investimento en equipamentos de intervención e en equipamentos de protección individual. “Ninguén pode axudar aos demais se non está protexido adecuadamente”, recorda Daniel Rey. 

A previsión do goberno local é seguir mellorando as instalacións, vehículos e equipamentos do servizo durante 2026. Nesta liña, o Concello solicitou unha subvención para a mellora da eficiencia enerxética do edificio base de Protección Civil, ademais de contemplar o investimento en sistemas de comunicación e materiais necesarios. “Tamén imos solicitar a colaboración da Xunta para renovar os vehículos”, engade o concelleiro.  

• Os incumprimentos do contrato inclúen a falta de cobertura de baixas e vacacións da plantilla ou a carencia de profesionais cualificados
• O goberno local lembra que a administración autonómica e a estatal están obrigadas a cubrir integramente o custe da atención á domicilio

O Concello de Barbadás pecha o segundo expediente sancionador á empresa do Servizo de Atención no Fogar (SAF), Osventos, debido aos sucesivos incumprimentos do contrato. Unha vez transcorrido o prazo para a presentación de alegacións, dito expediente non recibiu ningunha por parte da adxudicataria, polo que agora será levado á Xunta de Goberno para a aprobación da proposta de resolución, que se traducirá nunha sanción de 12.000 euros. Mentres, o Concello busca fórmulas de mellora deste servizo, fundamental para a atención das persoas máis vulnerables do Concello. 

As carencias no servizo -baixas e vacacións sen cubrir ou mesmo falta de profesionais cualificados- están a provocar o detrimento da atención ás persoas dependentes do Concello. Ante elo, o goberno local iniciou dous expedientes: malia que o primeiro non prosperou na vía xudicial por unha cuestión de prazos, o segundo é do que estamos a falar agora. O informe desta segunda sanción iniciouse nos primeiros días do pasado mes de agosto, despois de que numerosas familias presentasen queixas ante a falta de persoal e o empeoramento do servizo. 

Este asunto foi obxecto de debate no pleno ordinario deste luns, no que o tenente alcalde, Daniel Rey, deu conta dos pasos dados polo goberno municipal en relación ao SAF ante a moción do PSdeG para evitar os incumprimentos da empresa adxudicataria. 

Rey recordou os numerosos requerimentos enviados a Osventos desde que se detectou o detrimento do servizo, así como as sancións e as peticións de reunións coa súa dirección para solucionar a situación. Por outra banda, puxo énfase no infrafinanciamento da administración autonómica e estatal, obrigadas por lei a asumir o 100% da atención a domicilio. “En Barbadás, o Concello financia o 58,7% do SAF, cando deberían encargarse a Xunta e o Goberno Central xa que non é unha competencia municipal”, apuntou. 

De feito, o Concello unirase á demanda anunciada pola Fegamp contra a Xunta pola falta de financiamento autonómico dos servizos de atención no fogar. O pasado mes de agosto, Barbadás xa lle reclamou ao goberno galego que asumira a xestión do SAF. 

Nos últimos meses, o goberno local reuniuse coa asociación galega sociosanitaria para coñecer a situación do sector, marcada pola falta de profesionais cualificados e as dificultades de contratación. Nesa liña, o Concello de Barbadás impulsará neste 2026 un obradoiro de emprego sociosanitario, que facilite a formación e contratación de traballadores no municipio. 

Aprobación do padrón máis elevado da historia de Barbadás

O pleno do Concello de Barbadás tamén aprobou en sesión plenaria a cifra de poboación a data 01/01/2025, 11.201 habitantes. Trátase do padrón máis elevado da historia de Barbadás, o quinto concello máis poboado da provincia ourensá, só por detrás da cidade, Carballiño, O Barco e Verín. O goberno local destacou a importancia de atraer poboación nun contexto demográfico adverso como o actual, no que os concellos galegos, e en especial, os de interior, perden habitantes ano tras ano.

Porén, Barbadás rexistrou na última década un crecemento continuado da veciñanza, só interrumpido no 2021, ano posterior á pandemia, cun pequeno descenso. De feito, desde 2015, o municipio recibiu a preto dun milleiro de novos veciños e veciñas, o que dá conta da boa calidade dos servizos e prestacións municipais, así como da dinamización económica e social do concello.

• O acto de reapertura incluíu a homenaxe de 16 voluntarios da entidade municipal
• “O Banco acaba de experimentar unha remodelación intensa que permitirá traballar mellor e ser máis efectivos”, apunta Xosé Carlos Valcárcel, alcalde de Barbadás

O Concello de Barbadás reabriu este martes o local do Banco Solidario despois da renovación integral das instalacións municipais. A Concellería de Servizos Sociais reforza así a súa aposta pola iniciativa social, que leva 10 anos sendo un apoio fundamental para as familias máis vulnerables de Barbadás. A actuación incluíu o pintado de todo o local (localizado na rúa Ensino da Valenzá), así como a colocación de novo mobiliario (como estantes e percheiros) para almacenar doazóns da veciñanza de xeito máis cómodo e seguro. “O Banco acaba de experimentar unha remodelación intensa que permite traballar mellor cos recursos que temos e ser máis efectivos no ámbito da solidariedade e na atención ás persoas máis vulnerables, algo fundamental para o Concello”, explicou Xosé Carlos Valcárcel, alcalde, durante o acto. O rexedor tamén recordou que o Banco axuda a un total de 150 persoas do municipio.

A concelleira de Servizos Sociais, Elisabet González Nistal, enxalzou o importante papel do Banco Solidario en Barbadás, sobre todo durante a época de Nadal. “Agora mesmo estamos en plena organización de todo o que recollimos durante a campaña de xoguetes para que ningún neno ou nena de Barbadás quede sen agasallo nestas festas”, explicou a edila. Os días 17 e 18 de decembro, os voluntarios e voluntarias do Banco encargaranse de distribuír os lotes de xoguetes e comida non perecedoira entre as familias máis vulnerables do municipio. 

Homenaxe ao voluntariado

A reapertura do Banco Solidario tamén incluíu unha emotiva homenaxe ao voluntariado, que co seu esforzo e compromiso fan posible que a iniciativa siga en pé 10 anos despois da súa creación. Así, a inauguración contou coa presenza de Ana, Corina, Yolanda, Teresa, Isabel, Purificación, Elida, Luis Fernando, Luis Enrique, Sandra, Maribel, Carmen, Marián e Pilar, parte do equipo humano detrás do Banco Solidario. “Todos e todas as que regalades o voso tempo, enerxía e cariño sen pedir nada a cambio sodes a alma do Banco”, resaltou a concelleira na súa intervención, na que tamén se acordou dos voluntarios que xa non están ou que xa non colaboran na entidade. 

“Grazas por cada xesto, por cada día que decidides estar aquí. O que facedes pode parecer pequeno a ollos do mundo, pero para quen o recibe… é todo”, asegurou. O acto contou tamén coa participación do resto do goberno local e da oposición, así como do equipo de Servizos Sociais e de Protección Civil. 

• “Será un Nadal cheo de color, ledicia, música, deporte, cultura e actividades sociais”, resalta o alcalde, Xosé Carlos Valcárcel
• O acendido da árbore deste venres suporá o inicio dos festexos no municipio
• “Este Nadal está centrado na dispersión xeográfica, o alumeado ímolo levar a todos os recunchos do concello”, asegura Victoria Morenza, tenente alcalde e concelleira de Servizos Públicos

O Concello de Barbadás propón unha variada programación para celebrar o Nadal cunha vintena de actividades dirixidas a todos os públicos. A veciñanza poderá desfrutar dunha vintena de propostas lúdicas que inclúen teatro, concertos, obradoiros, festivais ou torneos. “Será un Nadal cheo de color, ledicia, música, deporte, cultura e actividades sociais”, resaltou o alcalde, Xosé Carlos Valcárcel, durante a presentación da programación. O rexedor tamén convidou á veciñanza a escoller para as compras de Nadal o comercio local de Barbadás, unha panca económica fundamental do municipio e un dos principais dinamizadores da vida social. 

Os festexos comezarán este venres pola tarde co acendido da árbore e da iluminación de Nadal. A partir das 18,00 horas haberá animación musical no entorno da árbore (situada na rúa Viso, número 1) para rematar coa tradicional conta atrás do acendido, que se realizará ás 19,00 horas. Para pechar a inauguración, a veciñanza está convidada a unha chocolatada popular. Victoria Morenza, tenente alcalde e concelleira de Servizos Públicos, deu conta do esforzo do goberno local por iluminar todo o municipio: “Este Nadal está centrado na dispersión xeográfica, imos levar o alumeado ata o último recuncho do municipio”. Este ano, as luces son LED, o que permitirá un maior aforro enerxético. 

Ana Peleteiro, concelleira de Cultura, detallou a programación cultural, que inclúe espectáculos de maxia como “Zasca”, do Mago José Rivera, concertos como o da Banda Musical Infantil da Escola de Música Municipal de Barbadás ou o Festival de Panxoliñas, e teatro, como “Os contos do Lobicán” de Rédrum Teatro. “Queremos que os veciñas e veciñas desfruten destas datas, que interactúen e que socialicen entre elas”, sinalou a concelleira. Papá Noel e Os Reis Magos farán parada en Barbadás, como é habitual, e percorrerán distintos puntos e núcleos do municipio para saudar a toda a poboación. A Concellería de Emerxencias, dirixida por Daniel Rey, conta xa con dispositivos especiais para as cabalgatas, ao igual que para o resto de actividades na vía pública.

Entre as propostas para as próximas semanas tamén destacan as deportivas. A concelleira de Deportes, Noemí Pintos, convidou á poboación a achegarse ao torneo benéfico prebenxamín Memorial Javier Carid “Abuelo”, que permitirá recoller alimentos para o Banco de Alimentos. 

Por outra banda, tamén haberá oco para actividades saudables, como o Obradoiro de Doces de Nadal para persoas celíacas. “Poden participar tanto persoas con celiaquía como as súas familias”, detallou Elisabet González, concelleira de Servizos Sociais e Saúde. A Consellería de Servizos Sociais atópase inmersa actualmente na recollida de xoguetes para familias vulnerables, que o Banco Solidario repartirá nas próximas semanas.

Concurso de escaparates e balcóns

A concelleira de Comercio, Marga Pérez, recordou que aínda está aberto o prazo para inscribirse no concurso de decoración de Nadal de escaparates e no concurso de balcóns e portais. “É un xeito de que a veciñanza participe e colabore en facer entre todos máis bonito o noso municipio para estas datas tan máxicas”, apuntou. 

O prazo de inscripción remata este venres ás 14,00 horas para os dous concursos. A solicitude pode presentarse nos rexistros municipais ou na sede electrónica do Concello de Barbadás. A votación será popular -poderá participar toda a veciñanza- e telemática, entre os días 10 e 17 de decembro.

• O goberno local organiza charlas coa veciñanza para dar a coñecer este tipo de reciclaxe e entregar composteiros aos participantes 

O Concello de Barbadás aposta pola implantación da compostaxe doméstica para avanzar na protección do medio ambiente. O goberno local continúa coa campaña de concienciación dirixida a toda a veciñanza que dispón dun pequeno terreo, e no que vai de ano xa son máis de 50 as familias adheridas á iniciativa. 

Nesa liña, o Centro Empresarial Transfronteirizo (CET) acolleu a pasada semana unha nova entrega de composteiros domésticos, ademais dunha charla explicativa das pautas básicas para iniciar correctamente o proceso de compostaxe no fogar. Un total de 17 familias adheríronse á campaña na charla, o que dá conta da importancia de impulsar este tipo de sesións informativas.

O goberno local anima ás persoas que aínda non se teñan sumado a facelo, lembrando que a compostaxe doméstica é unha ferramenta eficaz para reducir biorresiduos, diminuír o volume de lixo que chega a vertedoiro e contribuír a un modelo máis sostible e respectuoso co medio ambiente.

As persoas interesadas poden atopar toda a información actualizada na páxina web (https://www.barbadas.ocaminosostible.gal). Tamén poden contactar a través do teléfono 647 521 464 ou do correo electrónico info@ocaminosostible.gal.

Esta iniciativa conta co apoio da Xunta de Galicia e o financiamento do Plan de Recuperación, Transformación e Resiliencia – Next Generation EU, e forma parte da aposta do Consorcio As Mariñas por un modelo de xestión sostible e de proximidade, implicando á cidadanía na redución e valorización dos seus propios residuos.

O Concello de Barbadás aposta pola implantación da compostaxe doméstica e continúa coa campaña de sensibilización ambiental no municipio. Este venres, día 28, o Centro Empresarial Transfronteirizo acolle unha nova entrega de composteiros domésticos para a poboación, ademais dunha breve explicación coas pautas básicas para iniciar correctamente o proceso de compostaxe no fogar. A charla comeza ás 19,00 horas. 

O goberno local anima ás persoas que aínda non se teñan sumado a facelo nos próximos días, lembrando que a compostaxe doméstica é unha ferramenta eficaz para reducir biorresiduos, diminuír o volume de lixo que chega a vertedoiro e contribuír a un modelo máis sostible e respectuoso co medio ambiente.

As persoas interesadas poden atopar toda a información actualizada na páxina web (https://www.barbadas.ocaminosostible.gal). Tamén poden contactar a través do teléfono 647 521 464 ou do correo electrónico info@ocaminosostible.gal.

Esta iniciativa conta co apoio da Xunta de Galicia e o financiamento do Plan de Recuperación, Transformación e Resiliencia – Next Generation EU, e forma parte da aposta do Consorcio As Mariñas por un modelo de xestión sostible e de proximidade, implicando á cidadanía na redución e valorización dos seus propios residuos.

• “Este ano contamos cun horario máis amplo para axudar ás familias”, resalta Marga Pérez, concelleira de Educación

O Concello de Barbadás aposta unha vez máis pola conciliación das familias durante as vacacións escolares de Nadal. A área de Educación impulsa o Campamento de Nadal, unha proposta que inclúe actividades lúdicas e creativas adicadas a nenos e nenas de 3 a 12 anos. “Este ano contamos cun horario máis amplo para axudar na tan necesaria conciliación familiar e laboral”, resalta Marga Pérez, concelleira de Educación.

O Campamento terá lugar no Espazo Infantil os días 22, 23, 29 e 30 de decembro e o 7 de xaneiro en horario de 8,30 a 14,00 horas. “Haberá xogos cooperativos e obradoiros, pero sobre todo, moita diversión cos novos e novas amigas”, asegura Marga Pérez, concelleira de Educación. Cada día, as actividades serán distintas: desde un obradoiro de creación de adornos de Nadal ata un obradoiro de cociña, cine temático ou caza do tesouro. 

As familias interesadas xa poden consultar as bases e o modelo de solicitude na páxina web do Concello (barbadas.es). As inscricións pódense formalizar do 17 ao 28 de novembro na Casa Consistorial e nas Oficinas Municipais, na Valenzá. 

• Durante a fin de semana, habilitouse un punto informativo na Valenzá para resolver dúbidas, explicar os beneficios da compostaxe e fomentar a participación cidadá

O Concello de Barbadás continúa a avanzar na implantación da compostaxe doméstica e na sensibilización ambiental da veciñanza. Con este obxectivo, o pasado sábado 8 de novembro habilitouse un punto informativo no municipio, que serviu como espazo de encontro para resolver dúbidas, explicar os beneficios da compostaxe e fomentar a participación cidadá.

Ao longo da xornada, o punto informativo recibiu unha excelente acollida, con numerosas persoas achegándose para coñecer máis sobre o proceso de compostaxe, solicitar información práctica e anotarse para participar no programa municipal. A poboación tamén puido recoller cubos para reciclar nos domicilios de entornos urbanos os residuos orgánicos que van ao contedor marrón. Esta acción permitiu acercar a campaña directamente á rúa, favorecendo unha comunicación directa, próxima e personalizada coas persoas interesadas.

Como continuidade da iniciativa, o Concello entregará composteiros domésticos o venres 28 ás 19,00 horas no Centro Empresarial Transfronteirizo. Ademais da recollida do material, ofrecerase unha breve explicación coas pautas básicas para iniciar correctamente o proceso de compostaxe no fogar.

O Concello anima ás persoas que aínda non se teñan sumado a facelo nos próximos días, lembrando que a compostaxe doméstica é unha ferramenta eficaz para reducir biorresiduos, diminuír o volume de lixo que chega a vertedoiro e contribuír a un modelo máis sostible e respectuoso co medio ambiente.

As persoas interesadas poden atopar toda a información actualizada na páxina web (https://www.barbadas.ocaminosostible.gal). Tamén poden contactar a través do teléfono 647 521 464 ou do correo electrónico info@ocaminosostible.gal.

Esta iniciativa conta co apoio da Xunta de Galicia e o financiamento do Plan de Recuperación, Transformación e Resiliencia – Next Generation EU, e forma parte da aposta do Consorcio As Mariñas por un modelo de xestión sostible e de proximidade, implicando á cidadanía na redución e valorización dos seus propios residuos.

• O pleno aprobou a moción presentada por PSdeG e DO en apoio ás reivindicacións de Fadenga e Aedigal

O Concello de Barbadás reclama á Xunta un maior financiamento para as asociacións e entidades de discapacidade intelectual, que levan a cabo unha labor clave no acompañamento, asesoramento e inclusión das persoas afectadas. PSdeG e DO presentaron na sesión plenaria ordinaria deste luns unha moción para adherirse ás reivindicacións de Fademga Plena inclusión Galicia e Asociación Empresarial para a Discapacidade Intelectual e o Desenrolo de Galicia (Aedigal), que alertan do posible peche de centros en toda Galicia debido ao infrafinanciamento das entidades sociais.  

A concelleira de Servizos Sociais, Elisabet González, puxo en valor o traballo que desempeñan diariamente colectivos e asociacións tales como o Centro Ocupacional As Burgas da Valenzá, que conta con máis de 80 persoas usuarias. A edila lamentou a falta de colaboración por parte da administración autonómica, a quen pediu iniciar unha mesa de negociación con Fademga e Aedigal para abordar o tema e buscar solucións. “A responsabilidade de corrixir esta situación recae directamente na Xunta e na Consellería de Política Social”, resaltou. A moción foi aprobada cos votos a favor de PSdeG, DO, Partido Galego e BNG, e cos votos en contra do Partido Popular. 

Transporte metropolitano

O pleno aprobou por unanimidade a moción presentada polo BNG sobre o transporte metropolitano, unha demanda histórica de Barbadás e do resto de concellos da comarca ourensá. A tenente alcalde e concelleira de Mobilidade, Victoria Morenza, deu conta da actual situación do comité de transporte, constituído pola Deputación. “Non ten sentido que sexa a Deputación quen o lidera, xa que é unha competencia da Xunta”, sinalou. 

Morenza detallou as propostas do Concello de Barbadás ao comité, tales como a extensión da liña de transporte urbano do Concello de Ourense ata o Hospital de Piñor, o incremento das frecuencias dos servizos prestados no rural (Loiro, Bentraces, Sobrado, Barbadás, Piñor e Parada) ou a creación dunha liña que una San Lourenzo de Piñor e Parada coa Valenzá. Porén, a tenente alcalde lamentou que o comité non sexa un órgano competente para tomar decisións, e instou de novo á Xunta a liderar o proceso, o que permitiría avanzar no proxecto. 

O pleno tamén aprobou unha moción do PP para apoiar aos autónomos e á economía local, así como unha moción do BNG sobre o reforzo dos servizos públicos adicados á loita contra a violencia de xénero. Por outra banda, a corporación deu luz verde á modificación da ordenanza fiscal número 6 reguladora da taxa pola prestación de abastecemento de auga potable.

• O goberno local destinou máis de 180.000 euros para a actuación, que incluíu a renovación da cuberta, o cambio das carpintarías, cámaras e illamento, o novo chan, a soleira ventilada ou a construción de baños no interior
• “Agora é un local moi luminoso, moi amplo, que vai ser multiusos e no que pode haber todo tipo de eventos”, apunta Xosé Carlos Valcárcel, alcalde de Barbadás

O Concello de Barbadás vén de rematar a renovación integral do local social de Sobrado do Bispo, situado na rúa da Granxa. A intervención municipal, de máis de 180.000 euros, supón a completa modernización do edificio, antiga escola da localidade. Así, a rehabilitación incluíu a renovación da cuberta, a substitución parcial da estrutura do soporte, o cambio das carpintarías, cámaras e illamento das fachadas, a modernización da fontanaría, saneamento, electricidade, iluminación e ventilación, a colocación dun novo chan, a construción de baños interiores e a instalación dunha soleira ventilada. 

A actuación permitiu devolver a vida a un edificio senlleiro que ata o de agora tiña un uso residual como local de ensaio. “Agora é un local moi luminoso, moi amplo, que vai ser multiusos e no que pode haber todo tipo de eventos”, apunta Xosé Carlos Valcárcel, alcalde de Barbadás. Así, o espazo conta cun novo acondicionamento acústico para evitar a reverberación do son, así como con carrís de focos no teito para futuras exposicións. 

O edificio, que data de 1920 segundo os datos do catastro, está completamente adaptado ás normativas actuais e goza de modernos sistemas de ventilación. “Ten un sistema que renova o aire automaticamente, o que favorece que haxa unha temperatura adecuada en todas as estacións do ano”, detalla Victoria Morenza, tenente alcalde e concelleira de Obras. Por outra banda, agora o local é accesible para persoas con mobilidade reducida, ao igual que os baños. “Tamén se instalou un sistema de ventilación do gas radón, adaptado á normativa galega”, destaca Xosé Carlos Valcárcel. 

O alcalde destaca a inversión municipal neste local, que xa pode ser utilizado polos veciñas e veciños, ao mesmo tempo que agradece a colaboración da poboación, que foi insistente en demandar a modernización do espazo.