Que a ilusión inunde os fogares de todos os nenos e nenas de Barbadás neste Nadal. Este é o obxectivo do Concello que, a través da concellería de Servizos Sociais que dirixe Elisabet González, promove unha campaña de recollida de xoguetes. Grazas á iniciativa, os máis pequenos poderán gozar de xogos e libros que xa foron doutros cativos e que poden seguir contaxiando o espírito destas datas.

Tal e como explicou González, a iniciativa pretende que os pequenos e pequenas de familias vulnerables non se queden sen xoguetes nas noites máis especiais do ano. Tamén insistiu en que a campaña “axudará a transmitir valores como a xenerosidade ou a gratitude e a empatía”.

Nesta cadea solidaria será imprescindible que os xoguetes doados se atopen en bo estado e quedarán excluídos aqueles de carácter bélico. Os interesados en colaborar nesta campaña poderán realizar as súas doazóns do 6 ao 20 de novembro no polideportivo da Valenzá, de luns a venres en horario de 10.00 a 13.00 horas e de 16.00 a 20.00 horas. Os martes 7 e 14 de novembro poderán entregarse no Banco Solidario, emprazado na Rúa do Ensino, en horario de 16.00 a 18.00 horas.

Todos os xoguetes doados serán clasificados por idades e serán envoltos polos voluntarios e voluntarias do Banco Solidario do Concello de Barbadás.

Xa o subliñou o alcalde de Barbadás, Xosé Carlos Valcárcel: “Debemos de dar un valor moi positivo ao Obradoiro de Emprego que hoxe clausuramos, xa que se desenvolveu durante 12 meses cando o habitual é que este tipo de iniciativas non se estendan tanto no tempo”. Ao longo de todo un ano, unha vintena de alumnos e alumnas deste concello e de Taboadela, Toén e San Cibrao, recibiron formación que facilitará a súa inserción laboral.

O acto de entrega de diplomas tivo lugar esta mañá no Centro Empresarial Transfronteirizo onde, tal e como asegurou Valcárcel aos participantes no Obradoiro, “sempre teredes a vosa casa”. Asistiron rexedores e concelleiros dos catro concellos que se sumaron á iniciativa e o xefe do Servizo de Formación, Emprego e Orientación Laboral da Xunta de Galicia, Rodrigo de Luis Francisco.  Este último puxo en valor o traballo realizado polos alumnos e alumnas e este tipo de iniciativas que promoven a formación e a inserción no mundo laboral.

Dende o pasado mes de novembro, os participantes no Obradoiro recibiron formación diaria en actividades auxiliares en conservación e mellora de montes e en operacións auxiliares de acabados ríxidos e urbanización. Así, no concello de Barbadás realizaron traballos de acondicionamento, conservación, mantemento e rehabilitación do lavadoiro público situado no lugar de As Quintas, en Piñor ademais da limpeza, despexe e roza da contorna do lavadoiro.

No módulo forestal tamén efectuaron labores de roza e limpeza de terreos, poda selectiva de árbores medianas e grandes, con provisión de material para o seu posterior traslado; limpeza de leitos e desaugadoiros con medios manuais en terreo brando con vexetación media e retirada de elementos que invadiran a calzada.

Unha das iniciativas máis novidosas foi a construción dun “hotel para insectos”, situado no Centro Empresarial Transfronteirizo de Barbadás, co fin de axudar a protexer a especies como, por exemplo, crisopas, mariquitas e abellas, xa que se lles proporciona acubillo ante depredadores e as inclemencias do tempo, ademais de facilitar a polinización das plantas, axudando a incrementar a súa produción.

O Concello de Barbadás segue demostrando a súa aposta pola formación, a importancia da colaboración institucional entre os concellos e a importancia deste tipo de iniciativas para fomentar o emprego e a inserción laboral.

Mellorar as condicións nas que traballan os operarios de Barbadás é un firme propósito do Concello, que vén de adquirir nova maquinaria para facilitar as tarefas en altura e garantir a seguridade. O alcalde, Xosé Carlos Valcárcel, e a concelleira de Parques, Xardíns e Medioambiente, Victoria Morenza, recibiron esta mañá unha nova plataforma elevadora que non só facilitará o mantemento de zonas verdes coa realización da poda de árbores e setos, senón tamén a eliminación dos niños de velutina e as tarefas en zonas de difícil acceso.

Con esta adquisición, o executivo local pretende axilizar as tarefas dos operarios municipais e garantir unha intervención máis segura e eficiente.

A adquisición desta maquinaria, financiada con cargo á liña 2 do fondo adicional do Fondo  de Cooperación Local da Xunta de Galicia, demostra o compromiso do Concello de Barbadás coa mellora dos servizos públicos. Esta acción permitirá un mantemento axeitado dos parques e xardíns, creando espazos acolledores e agradables para a veciñanza, ademais da realización de traballos en zonas altas ata o momento inaccesibles.

O alcalde, Xosé Carlos Valcárcel, subliñou a importancia de que Barbadás conte con este tipo de maquinaria especializada: “Proseguimos con este proceso de modernización que ten por obxectivo mellorar as condicións laborais dos traballadores e axilizar traballos como as podas, importantes para manter os espazos verdes en perfectas condicións. Canto máis se axilicen os traballos, mellor estética terá o noso concello”.

Con máis dunha trintena de parques infantís, moitos deles con zona verde anexa, e numerosas pradeiras, os traballos de posta a punto preséntanse complexos. Por iso, nas últimas semanas tamén se comezou a empregar en Barbadás un tractor rozadora de última xeración que mellora as tarefas de sega e roza da herba.

Os mellores petiscos de Barbadás daranse a coñecer no Salón Internacional de Turismo Gastronómico Xantar que se celebrará do 2 ao 5 de novembro en Expourense. Os pinchos gañadores do concurso Barbadás a Bocados, celebrado o pasado mes de setembro para dar impulso á hostalería, poderán degustarse nun espazo dedicado á promoción do concello. Barbadás ten moito que ofrecer e así quedará demostrado nesta 24 edición de Xantar.

A Cova do Savio, Wakanda Tapería e O Bar dos Patos mostrarán ao público os seus petiscos, gañadores do concurso no que participaron unha vintena de establecementos hostaleiros e no que se serviron preto de 10.000 pinchos. Ademais, no expositor do concello de Barbadás daranse a coñecer os produtos gastronómicos de referencia no concello.

José Manuel Morgade, concelleiro de Promoción Económica e Turismo, asegura que a presenza do concello de Barbadás en Xantar será “unha gran oportunidade para poñer en valor os produtos alimentarios de calidade e sostibles que se elaboran en Barbadás, e tamén un perfecto escaparate para dar a coñecer os servizos profesionais e gastronómicos da variada hostalería que se ofrecen no noso concello”.

Os visitantes que se acheguen ao expositor poderán degustar os pinchos gañadores do concurso Barbadás a Bocados e outros produtos típicos como a mel ou cervexas artesanais.

Exhibición de cociña en directo

Barbadás tamén se dará a coñecer en Xantar cunha exhibición de cociña en directo que fusionará tradición con innovación para crear sabores atractivos. As actuacións de música tradicional tamén amenizarán as visitas do público que se achegue a coñecer os recursos gastronómicos de Barbadás.

Barbadás será esta fin de semana o epicentro do automobilismo. O RallyMix Memorial Gonzalo Belay desenvolverase os días 28 e 29 de outubro e pilotos, afeccionados e organización miran ao ceo para que as intensas chuvias dean tregua e a proba poida disfrutarse en toda a súa espectacularidade. O evento deportivo chega a súa novena edición como decano galego e foi presentado esta mañá no polideportivo municipal. A proba rende homenaxe a Belay, un dos grandes referentes da fotografía de motor que faleceu a mediados do 2018.

Tal e como explicou o director deportivo do RallyMix, Pepe Sampayo, volveuse ao trazado orixinal, centrado no núcleo urbano de Barbadás e cun percorrido de 8,70 quilómetros entre o tramo cronometrado e o parque de asistencia, que se emprazará nas inmediacións da Casa Consistorial.

O alcalde, Xosé Carlos Valcárcel, destacou a importancia do RallyMix, que é un referente dende hai anos e agradeceu o traballo dos corpos de seguridade para que se celebre sen incidencias. Tamén insistiu o rexedor no impacto que terá no municipio: “Dinamizará a economía de concello, eventos deportivos como este teñen un gran retorno a nivel económico”.

No acto de presentación tamén interveu o vicepresidente segundo da Deputación, César Manuel Fernández, que subliñou a traxectoria deste evento deportivo “que chega á novena edición e que demostra que o traballo se fai ben”. Manuel Pérez, jefe do servicio de Deportes da Xunta de Galicia, insistiu en que o RallyMix porá a Ourense no foco do automobilismo e recordou a Gonzalo Belay “por estar sempre a disposición deste deporte”.

Pola súa banda, Juan Carlos Villanueva, presidente da Escudería Barbadás, destacou a condición do RallyMix como decano das competicións galegas e que só deixou de celebrarse coa irrupción da pandemia. Tamén fixo un chamamento á responsabilidade dos afeccionados para que respecten as normas da organización.

Antonio Rodríguez Troitiño, presidente da Federación Galega de Automobilismo, insistiu na relevancia do Rally Mix, un evento asentado no calendario.

Horario e entrega de premios

Se as condicións meteorolóxicas o permiten, o sábado haberá tres pasadas, ás 12.00, 14.00 e 16.00 horas. O domingo serán dúas ás 9.30 horas e ás 11.30 horas. A entrega de premios terá lugar ás 14.00 horas no polideportivo municipal de Barbadás.

O Samaín será moito máis que unha festa terrorífica en Barbadás. Co fin de dinamizar o sector comercial e a hostalería, o Concello de Barbadás, a través da concellería de Comercio que dirixe Marga Pérez, organizou a campaña “Truco-trato”. Vinte establecementos da Valenzá súmanse a esta iniciativa dirixida aos máis pequenos. Os interesados en participar poden recoller o seu mapa coa ruta no espazo infantil da Solaina ou na biblioteca municipal. A actividade comezará o martes 31 de outubro ás 18.00 horas e os comerciantes repartirán doces aos nenos e nenas.

Tamén o martes, ao finalizar a campaña Truco-trato comezará unha ruta terrorífica pola Valenzá Vella e haberá baile. Aquelas persoas que se sumen á actividade disfrazadas poderán degustar un bolo preñado.

A concelleira de Comercio, Marga Pérez, asegura que con este programa de Samaín preténdese involucrar a toda á familia, ao mesmo tempo que se dinamiza o sector do comercio e a hostalería.

A programación elaborada polo Concello con motivo do Samaín comezará mañá, 26 de outubro, cun obradoiro de decoración terrorífica, a partir das 16.00 horas no espazo infantil da Solaina. O venres 27 de outubro ofrecerase un obradoiro de cociña que terá prazas limitadas, polo que os interesados en participar deberán inscribirse na dirección de correo espazoinfantil@barbadas.gal.

O luns 30 de outubro, tamén no espazo infantil, ofrecerase un obradoiro de cabazas a partir das 16.00 horas.

Os nenos e nenas de Barbadás aprenderán a salvar vidas. O Concello conmemora o Día da Concienciación da Parada Cardíaca cun programa de actividades no que se inclúe un taller de divulgación das técnicas de reanimación cardiopulmonar para escolares e profesorado. Será mañá no CEIP O Ruxidoiro e no CEIP Filomena Dato. Para a mesma xornada organizouse, ás 17.00 horas na carpa de emerxencias de Protección Civil, unha actividade de adestramento e concienciación nas técnicas de soporte vital.

O mércores 18 de outubro está previsto un taller práctico de soporte vital básico para nenos, nenas e bebés. Diríxese a familias da Escola Infantil Municipal. A iniciativa dará comezo ás 19.00 horas e instruirase aos asistentes sobre a desobstrución da vía aérea, a activación do sistema de emerxencias e a reanimación cardiopulmonar en nenos e lactantes menores dun ano.

Co lema “As túas mans salvan vidas”, o Concello de Barbadás organizou un amplo programa de concienciación sobre a parada cardíaca con actividades formativas para que a poboación poida enfrontarse ás situacións de emerxencia.

Mellorar a calidade de vida dos veciños e veciñas é o principal obxectivo do Concello de Barbadás, que vén de poñer en marcha a campaña “Ti tes a chave”, que fomentará a compostaxe e a implantación do colector marrón pechado a pé de rúa. O municipio será así pioneiro na provincia en promover a recollida da materia orgánica en colector marrón para os residentes no casco urbano e para os grandes produtores.

Un total de 700 familias da Valenzá poderán implicarse na recollida separada de materia orgánica. Para facilitar a súa participación, nas accións a pé de rúa repartiranse cubos aireados de 10 litros e 2.100 atados de bolsas compostables, xunto co folleto explicativo e unha chave. Ditas accións levaranse a cabo mañá nunha carpa que se instalará na rotonda da Familia en horario de 10.30 a 13.30 horas e ao principio da Valenzá de 15.30 a 18.30 horas.

Os veciños e veciñas recibirán toda a información para poder colaborar con esta iniciativa ambiental. Explicaráselles que para abrir o colector marrón precisarase unha chave que permitirá acceder aos colectores que estarán pechados para conseguir un reducido número de impropios que permita levar a materia orgánica a unha planta de compostaxe para convertelos en abono.

Para a posta en marcha deste proxecto contouse cunha axuda da Xunta de Galicia e dos fondos do Plan de Recuperación, Transformación e Resilencia do Goberno de España por un importe de arredor de 50.000 Euros dos que o Concello aporta o 10%.

Planta de tratamento

A implantación do colector marrón no concello de Barbadás está condicionada pola posta en marcha dunha planta de tratamento para converter a materia orgánica en compost, e na actualidade as instalacións anunciadas pola Xunta de Galicia para este fin aínda non están en funcionamento. Tal e como explican dende o executivo local, polo momento levarase a materia orgánica ata a planta privada mais próxima que está no concello de Leiro.

O colector marrón está pensado para zonas con edificios de vivendas, pero o Concello tamén conta cunha solución para o rural cos composteiros individuais, dos que xa se entregaron nos últimos anos máis de 300 unidades. Todas aquelas familias que conten cunha parcela poden solicitalo e seralles entregado de xeito gratuíto.

As persoas que queiran darse de alta poderán facelo tamén a través da páxina web do concello www.barbadas.es , nas oficinas municipais da Valenzá no 988 39 31 68 ou no Concello no 988 36 00 00.

As familias que o soliciten recibirán a visita dos técnicos que o montarán e lles explicarán como poñelo en funcionamento para conseguir un compost de calidade que poderán aplicar nos seus propios cultivos, unhas semanas despois recibirán unha segunda visita de seguimento.

O delegado do Goberno, Pedro Blanco, valorou a proposta do alcalde de Barbadás para o desenvolvemento do parque empresarial do concello, unha das prioridades do Goberno local para este mandato. Na súa visita ao concello ourensán, Blanco pechou co alcalde de Barbadás, Xosé Carlos Valcárcel, a celebración dunha próxima reunión coa xerente de Suelo Empresarial Atlántico (SEA), Beatriz Sestayo, para estudar as fórmulas que permitan o futuro desenvolvemento desta área industrial, que pretende acoller empresas do ámbito tecnolóxico e que xa conta con senllos estudos de viabilidade e mesmo cun orzamento de execución cifrado en 7 millóns de euros.

Ademais, Pedro Blanco, que estivo acompañado polo subdelegado do Goberno en Ourense, Emilio González, tamén se comprometeu a trasladar ante o Ministerio de Cultura o proxecto Martín Gaite, que aspira a converter este concello ourensán, no que a escritora pasou parte da súa infancia, na capitalidade do centenario do seu nacemento, que terá lugar no 2025.

Na visita ao concello, o delegado aproveitou para supervisar o funcionamento da Unidade de Orientación Profesional (UOP), un novo servizo do Ministerio de Educación e Formación Profesional no que colaboran o Concello e o Ministerio e que se enmarca no Plan de Recuperación do Goberno. Alí, na Aula Tecnolóxica do Parque da Solana (A Valenzá), comprobou os servizos que ofrece esta unidade, asociada á “Aula Mentor” do concello ourensano.

Barbadás é o único concello ourensán en contar con este tipo de unidades de acompañamento e de formación e que o Ministerio de Educación puxo en marcha este ano. No caso de Barbadás, o Goberno subvenciona o seu funcionamento con 28.500 euros e o Concello ofrece os medios técnicos e o local.

A Unidade de Orientación Profesional posibilita a tramitación do “Certificado de Profesionalidade”, unha titulación oficial que se consigue a través da experiencia laboral ou da formación non regrada. Para iso, o servizo conta cunha orientadora que ofrece apoio e acompañamento durante todo o proceso administrativo.

Pedro Blanco e o alcalde reuníronse na Casa do Concello, onde repasaron os proxectos do Goberno en Barbadás e que se traducen en investimentos de 250.000 euros en distintas partidas. O delegado reiteroulle ao alcalde o compromiso do Goberno de Pedro Sánchez coa administración local para ofrecer novos servizos e avanzar na dixitalización e na sustentabilidade dos municipios.

Entre os investimentos do Goberno, o delegado destacou os 171.118 euros que posibilitaron a renovación da práctica totalidade dos puntos de luz pública do Concello; o esforzo para levar internet de alta velocidade a preto de 120 fogares e negocios de Barbadás co Programa UNICO do Ministerio de Asuntos Económico ou os 43.900 euros para a loita contra a violencia de xénero que o Concello recibiu desde o 2021 do Ministerio de Igualdade.

Por último, o delegado aproveitou tamén o encontro para felicitar o Concello polo recén acadado premio María Moliner de animación á lectura que lle outorgou o Ministerio de Cultura á biblioteca municipal de Barbadás.

O saneamento dos leitos fluviais é un asunto que preocupa ao Concello de Barbadás que, a través da concellería de Disciplina Medioambiental que dirixe Daniel Rey, solicitou á Confederación Hidrográfica Miño-Sil, entidade encargada da supervisión destas zonas, a execución dos traballos de eliminación de especies invasoras a de tala de vexetación arbórea con risco de caída en zonas non urbanas.

As zonas nas que se están actualmente acometendo os traballos son o regato das Lamas no entorno dos Carrís, no que se eliminaron especies invasoras (plumas), o río dos Muíños na zona dos Carrís, Ponte Bagoi e Muíños, nas cales se procedeu á tala e entresaca de vexetación arbórea desarraigada, seca ou tumbada que tiña risco de caída sobre o propio leito ou sobre edificacións agrícolas situadas nas ribeiras.

O concelleiro de Disciplina Medioambiental, Daniel Rey, asegura que ao mesmo tempo estase a traballar para levar a cabo unha campaña de sensibilización sobre os cauces fluviais coa comunidade educativa: “Efectuaranse limpezas dos ríos e regatos, contando ca participación dun biólogo que explicará cales son os elementos de flora e fauna autóctonos dos nosos ríos e regatos e tamén se promoverá o coñecemento da historia hidrográfica do noso concello”.

A biomasa retirada é tratada por parte dos especialistas. Ademais, a leña será almacenada en instalacións municipais coa idea de ser utilizada en casos de necesidade apreciada polo departamento de Servizos Sociais.

No treito de río considerado urbano por parte da CHMS, que é o comprendido entre os Carrís e o límite municipal con Ourense, o Concello poderá actuar de oficio comunicando á CHMS, nos casos nos que sexa necesaria a retirada de vexetación arbórea ou arbustiva que non forme parte do leito fluvial, para evitar riscos tales como caídas, inundacións ou pragas.

Optimizar o mantemento dos espazos verdes de Barbadás é o principal obxectivo que levou ao Concello a adquirir nova maquinaria especializada. Con máis dunha trintena de parques infantís, moitos deles con zona verde anexa, e numerosas pradeiras, os traballos de posta a punto preséntanse complexos. Coa recepción, esta mesma mañá, dun novo tractor rozadora de última xeración, que será empregado para a sega e roza da herba, obterase máis eficiencia nos traballos e mellores resultados que coas máquinas tradicionais.

A previsión é que o novo tractor rozadora comece a ser empregado nos próximos días. Cómpre destacar que conta cun mecanismo automático para o vaciado, polo que facilitará en gran medida as tarefas dos operarios.

A adquisición desta maquinaria, financiada con cargo á liña 2 do fondo adicional do Fondo  de Cooperación Local da Xunta de Galicia, demostra o compromiso do Concello de Barbadás coa mellora dos servizos públicos e o coidado dos espazos verdes do municipio. Esta acción permitirá un mantemento axeitado dos parques e xardíns, creando espazos acolledores e agradables para a veciñanza.

O alcalde, Xosé Carlos Valcárcel, subliñou que Barbadás é un dos concellos que máis traballa na concienciación medioambiental: “Somos pioneiros na utilización de vehículos eléctricos e de enerxía verde”. Ademais, lembrou que o goberno local renovou nos últimos anos a flota de vehículos, adquirindo tres de gas licuado, un eléctrico, unha desbrozadora e o tractor que acaban de recibir.

A concelleira de Parques, Xardíns e Medioambiente, Victoria Morenza, tamén insistiu na importancia da renovación deste parque de vehículos e destacou que con esta nova adquisición de maquinaria “incídese na aposta pola eficiencia no mantemento das zonas verdes do Concello de Barbadás”.

O centro social de Sobrado do Bispo, único en Barbadás polas súas características, cambiará significativamente de imaxe. O Concello levará a cabo a súa rehabilitación cun orzamento de 151.957 euros e un prazo de execución de 6 meses. Na sesión plenaria celebrada esta tarde aprobouse a financiación do proxecto mediante o acceso ao fondo de cooperación da Xunta de Galicia.

O obxectivo é mellorar as posibilidades reais dun inmoble ao que se achegan numerosos veciños e veciñas e que presta gran cantidade de servizos. Nas súas instalacións pódense ler diarios e revistas, realizar o visionado de recursos audiovisuais, actividades de estimulación cognitiva, programas de promoción da saúde, prevención da dependencia e mantemento físico, alfabetización informática e manexo de novas tecnoloxías. Coa rehabilitación e a mellora da accesibilidade, favoreceríase a participación de persoas de maior idade nestas propostas.

As intervencións a realizar serán a modificación do acceso na fachada nordeste, a construción dunha nova escaleira e zona exterior que protexa aos usuarios do tráfico rodado, creando un espazo de descanso como antesala ao edificio.

Para mellorar a accesibilidade tamén se crearán novos aseos no interior e a mellora da entrada sureste. Na cuberta renovarase a cubrición e substituirase parcialmente a estrutura soporte. Tamén se prevé intervir nas fachadas con novas carpinterías, cámaras e illamento e renovaranse as instalacións de fontanería e saneamento, así como as de electricidade e iluminación e unha nova instalación de ventilación.

Con esta intervención, o Concello de Barbadás pretende poñer en valor un inmoble que presta gran cantidade de servizos non só aos veciños de Sobrado do Bispo, senón de todo o municipio.

Os mellores petiscos teñen premio en Barbadás. O concurso Barbadás a Bocados, que contou coa participación dunha vintena de establecementos hostaleiros, serviu 10.000 pinchos na terceira fin de semana de setembro e premiou a tres locais pola calidade das súas propostas gastronómicas nun acto celebrado esta mañá no salón de plenos da Casa Consistorial.

Así, o primeiro premio do xurado popular foi para A Cova do Savio co pincho Aine e o segundo para Wakanda coa proposta M´Baku. Este último local tamén resultou gañador do primeiro galardón do xurado profesional, mentres que o segundo recaeu en O Bar dos Patos co seu Taco de orella. Os premiados disfrutarán dunha fin de semana nun hotel da cadena OCA en Oporto e os primeiros de cada categoría tamén recibiron un xamón de Coren. Ademais, entre todos os locais participantes repartíronse lotes do Consello Regulador de la D.O. Ribeiro e da cervexa Esmorga.

Os comensais do xurado popular que votaron para elixir os mellores petiscos do concello participaron nun sorteo que repartiu 6 cheques de 50 euros para mercar no comercio local e algúns deles xa recolleron o seu premio no acto desta mañá.

O alcalde, Xosé Carlos Valcárcel, agradeceu a participación dos hostaleiros e dos comensais e asegurou que o concurso Barbadás a Bocados é unha gran aposta do Concello para dar a coñecer o sector: “Repartíronse pinchos e tamén ilusión, porque se recoñece o gran traballo dos nosos establecementos”.

Na mesma liña, a concelleira de Comercio, Marga Pérez, asegurou que a  valoración desta edición de Barbadás a Bocados foi “moi positiva” e destacou a gran afluencia que se rexistrou nos establecementos hostaleiros participantes, tamén de veciños e  veciñas doutros concellos.

Constantino Iglesias, hostaleiro que interveu en nome do xurado profesional, agradeceu ao Concello a organización deste evento “que recoñece o traballo dos hostaleiros” e asegurou que para elixir aos premiados valorouse a presentación, sabor, aroma, dificultade, materia prima e punto de cocción. Insistiu tamén en que “os profesionais debemos aproveitar estas oportunidades para dar a coñecer o noso negocio”.

O concurso de pinchos “Barbadás a Bocados” consolídase como proposta gastronómica de referencia e nesta sexta edición aumentaron ata 18 o número de establecementos participantes: La Carabela, Claret´s Food, Oren Express, A Cova do Sabio, O Muiñeiro, Cacho Pizza, A Solaina, Brétema, Tarona, Wakanda, Estilo 46, O Bar dos Patos, O Chicote, As Catro ás, A Nova Farola, O Carrabouxo e Estambul Kebab.

Xa o destacou o alcalde, Xosé Carlos Valcárcel: “Barbadás ten moita poboación nova con inquedanzas innovadoras”. O deseñador Josu Santos é un dos exemplos de que a mocidade ten moito que ofrecer e o Concello fai unha gran aposta polo seu talento ao promover un desfile de moda no que dará a coñecer as súas creacións. O evento terá lugar mañá, a partir das 20.30 horas na Casa da Mocidade.

Precisamente potenciar a programación deste centro no que se reúne a xuventude é outro dos obxectivos que se persegue co desfile e así o afirmou o rexedor: “Pretendemos potenciar a Casa da Mocidade con actividades que enganchen aos mozos e mozas e enfocadas a todo tipo de sensibilidades. Ao mesmo tempo facemos unha aposta transversal para dar a coñecer valores vencellados ao emprendemento e por parte de veciños e veciñas de Barbadás que cren neste concello, como Josu Santos”.

Tal e como explicou o deseñador, no desfile presentará unha vintena de creacións nas que destacará o encaixe de Camariñas e diferentes texturas “nun gran abano de corpos diferentes porque todos merecemos subirnos á pasarela nalgún momento”. Asegura que os seus deseños falan por si mesmos e anima a toda a poboación a coñecelos.

Josu Santos xa ofreceu desfiles no seu pobo, Sobrado do Bispo, causando gran expectación entre os veciños e veciñas ata converterse nun dos principais atractivos das festas parroquiais.

Os auténticos sons de Galicia pódense escoitar na Rúa a Carreira de Barbadás, onde se empraza o Museo da Gaita de Fol. Trátase dun centro cultural único destas características e co fin de dar a coñecer todo o seu potencial o Concello decidiu ampliar o seu horario. Dende o 26 de setembro abrirá de martes a venres de 16.00 a 19.00 horas e os sábados de 11.00 a 13.00 horas.

Os visitantes terán a oportunidade de afondar no coñecemento da gaita, o instrumento referente en Galicia, e repasar a súa historia dende a Idade Media ata a actualidade. Neste sentido, cómpre destacar que o museo conta cun taller onde se poden ver as ferramentas que empregaban os artesáns en épocas pasadas e os materias cos que se constrúe este instrumento de música tradicional.

Tamén se ofrecerán aos visitantes obradoiros e outras actividades que se realizan ao longo de todo o ano no museo. Tamén as asociacións e as escolas poden concertar visitas guiadas enviando un correo electrónico á dirección museodagaita@barbadas.gal.

O Museo da Gaita de Fol conta con grandes atractivos para os visitantes que agora poderán achegarse a este centro cultural nun horario máis amplo. Barbadás consolídase así como un referente da música tradicional.

Barbadás será un concello referente na recollida de biorresiduos. Tal e como se informou no pleno ordinario celebrado onte á tarde, modificarase o contrato con Geseco para implantar o quinto contedor marrón para a recollida deste tipo de residuos que estará pechado con chave co modelo Sogama.
Barbadás será así o primeiro municipio da provincia en dispoñer deste servizo e estableceuse a entrega de 700 cubos domésticos. No rural do municipio xa hai 400 composteiros para os residuos orgánicos.

• Tamén na sesión plenaria se anunciou que o Concello de Barbadás xa conta cun proxecto para mellorar a rede de pluviais dende o paso de peóns de entrada á praza das Labercas ata pozo da avenida de Celanova para separar tubaxes de diferentes zonas. Tal e como se especifica no documento, independizarase o pozo da rúa San Bernabé para evitar que a auga entre nos garaxes da zona. Así se deu a coñecer no pleno ordinario celebrado onte e no que se trataron outros asuntos de interese.

• Do mesmo xeito, explicouse que mañá, 13 de setembro, remata o prazo dado polo Concello de Barbadás á empresa Sodein para a retirada de entullos na baixada ao campo de fútbol, baixo a ponte da autovía. O paso seguinte é comunicar da incidencia á Consellería de Medio Ambiente, que podería impoñer multas de alta contía.

• O proxecto para mellorar a rede de pluviais e evitar que a auga cause danos na zona de San Bernabé e as medidas que tomou o Concello para a retirada de entullos na baixada ao campo de fútbol foron dados a coñecer pola concelleira de Infraestruturas, Victoria Morenza, ante sendas mocións do PP e BNG que foron aprobadas por unanimidade.

• Durante o pleno deuse luz verde, co apoio do equipo de goberno, as abstencións do Partido Popular e do concelleiro de Partido Galego e os votos en contra do BNG á aprobación do suplemento de crédito de 12.000 euros de subvencións a clubs e eventos deportivos e a aprobación de crédito extraordinario para a subvención do Rally de Ourense de 2022 e 2023 por 12.000 euros.

• Co voto a favor do equipo de goberno e Partido Galego e as abstencións do PP e o BNG saíu adiante a aprobación da transferencia de crédito para facer fronte a actualizacións salariais de relación de postos de traballo e incrementos marcados dende a administración central para o funcionariado.

• Tamén se decidiu na sesión plenaria que os festivos locais no concello para o próximo ano 2024 serán o martes de Entroido, 13 de febreiro, e San Martiño, 11 de novembro.

Relación de participantes  no campamento de  verán en Boiro

 Indicacións para os pais/nais e/ou titores/as

• O horario durante o mes de xuño, será de 16:00 a 21:00 h.
• Nos meses de xullo, agosto e setembro (ata o día 3), o horario de apertura será:
  •  De 12:00 h a 15:00 h.
  •  De 16:00 h a 21:00 h.

Mañá celébrase en Piñor o I Paseo Literario de Carmen Martín Gaite, que dará comezo ás dez e media da mañá no Centro Social de Piñor e percorrerá os lugares descritos pola prestixiosa escritora na súa obra, tras pasar os veráns da súa Infancia en Piñor.

O itinerario comeza do Centro Social de Piñor, pasando pola Rúa dá Pipileira e a Rúa do Cruceiro, con vista a Ousande, ata chegar ao Cruceiro de Zama,  onde os participantes poderán escoitar o  “Antigo himno de Galicia”.

A continuación, entrarán ao cemiterio de Piñor pola porta Sur, visitarán o panteón dos Gaite,  e sairán pola Rúa Florencio Quintas ata a Encañada  seguindo polo Camiño dá Longra, cara ao Barrio do Hospital, onde volverán gozar de pezas musicais e un descanso.

Logo pasarán pola Fonte do Regueiro e o Pazo de Lemos, onde escoitarán máis pezas musicais,  para logo ir cara á casa da familia, Campo de Roma,  e a Rúa Carmen Martín Gaite, onde a andaina rematará coa peza musical “A Camposa”.

O Concello recomenda aos participantes na andaina que  deixen os coches no aparcadoiro do Tanatorio de Piñor e logo se dirixan ao Centro Social de donde sairán para facer o percorrido.

Ubicación de tanatorio de Piñor para estacionar vehículos:

https://www.google.com/maps/place/42%C2%B020’02.4%22N+7%C2%B053’47.1%22W/@42.334,-7.8986054,17z/data=!3m1!4b1!4m4!3m3!8m2!3d42.334!4d-7.8964167?hl=es

Ubicación do local social de Piñor de Campo de Roma, inicio da ruta:

https://www.google.com/maps/place/42%C2%B019’47.6%22N+7%C2%B054’00.9%22W/@42.3298755,-7.9024251,17z/data=!3m1!4b1!4m4!3m3!8m2!3d42.3298755!4d-7.9002364?hl=es