A Corporación de Barbadás celebrou esta mañá un pleno extraordinario no que se trataron asuntos de carácter económico. Por unanimidade aprobouse á aportación de 700.000 euros de fondos do Estado, o que eximirá ao Concello de solicitar o crédito previsto nos orzamentos para a realización de diferentes inversións.

Tamén aprobou o pago de 207.000 euros en facturas a diferentes provedores, apoiado igualmente por todos os grupos políticos coa excepción do concelleiro do BNG, que optou por absterse.

O primeiro grupo destas facturas relaciónase coas prestacións de servizos relacionados con empresas provedoras de servizos informáticos e asistencia técnica en materia de contabilidade. Noutro grupo atópanse as facturas emitidas por empresas comercializadoras de produtos combustibles e carburantes.

A aportación extraordinaria do Goberno Central ás arcas municipais motivou á celebración do pleno extraordinario, xa que a resolución foi notificada o día 31 do mes pasado e o expediente alongaríase no tempo de agardar á celebración da sesión ordinaria.

O alcalde de Barbadás, Xosé Carlos Valcárcel, destacou a contía recibida por parte do Goberno Central “fronte ao importe que aporta a Xunta de Galicia a través do Fondo de Cooperación Local e que permanece sen incrementos dende hai 13 anos”.

Animar ás nenas a practicar fútbol sala nunha época na que aínda hai barreiras que romper no deporte é o obxectivo co que nace o equipo feminino de fútbol sala sénior Concello de Barbadás-Academia Futsal F.S.F. Adrián Moure, con dilatada experiencia en futsal feminino provincial, será o adestrador e ao conxunto incorporaranse xogadoras con experiencia e xuventude. No acto de presentación interviñeron o alcalde de Barbadás, Xosé Carlos Valcárcel; o concelleiro de Deportes, Cristian Rodríguez, e o presidente da Academia, Eulogio Pérez.

O rexedor explicou que “hoxe é un día importante para o noso Concello e para o deporte feminino porque así avanzaremos nunha canteira neste ámbito deportivo”. Tamén insistiu en que “temos que seguir traballando para que o deporte feminino se poña en valor, non só o fútbol senón todos os deportes nos que as mulleres queiran ter presenza”.

O concelleiro de Deportes, Cristian Rodríguez, sinalou que este proxecto é unha ilusión que se fai realidade e que “sentará as bases para chamar a atención das nenas do concello para apostar por un futuro no fútbol sala”.

Academia Futsal vai camiño de converterse nun referente do fútbol ourensán e galego e apostando polo equipo sénior, coa colaboración do Concello de Barbadás, pretende poñer a primeira pedra para nun futuro crear equipos base femininos en diferentes categorías do club. “Queremos que as nenas da provincia teñan a posibilidade de animarse a xogar nas nosas categorías inferiores pero, á vez, poidan seguir nun equipo sénior”, afirmou o presidente da Academia Futsal, Eulogio Pérez.

Academia Futsal comezou a súa andaina o pasado ano e logrou na súa primeira temporada 3 títulos de liga, 4 ascensos a liga galega e 2 Copas Deputación, entre outros títulos. Agardan seguir colleitando éxitos, “pero sobre todo que os nenos e nenas do club sigan disfrutando deste deporte”, engadiu Eulogio Pérez.

O Concello de Barbadás vén de adxudicar dúas obras moi demandadas pola cidadanía e que contan coa financiación do Plan Provincial de Cooperación de Obras e Servizos da Deputación de Ourense. Os traballos para a mellora do firme foron adxudicados á empresa Extraco, que actuará na Rúa Alvaredo, en Loiro, e na Rúa Lameiro do Mato, na zona do río da Valenzá.

As obras de rexeneración da Rúa Alvaredo en Loiro  consisten no fresado do firme existente para aplicar un rego asfáltico de imprimación e a lonxitude do tramo afectado de estrada é de preto de 200 metros.

No caso da Rúa Lameiro do Mato da Valenzá, prevese o fresado do firme nas conexións do tramo afectado co sistema viario existente para a continuación aplicar tamén un rego asfáltico de imprimación. Estas dúas actuacións contan cun orzamento de 38.600 euros e o prazo de execución tamén será de tres meses.

Obras moi demandadas pola veciñanza

Estes obras sumaranse ás de pavimentación que se levarán a cabo no Camiño do Barro cun orzamento de 123.000 euros para renovar a rede de pluviais e o pavimento e que tamén contemplan a ampliación do ancho da vía nalgúns puntos. Este ambicioso proxecto faise eco das inquedanzas dos residentes e solucionará un problema de anos atrás.

Mediante estes proxectos, o Concello de Barbadás mantén o seu empeño de dotar aos núcleos do municipio do equipamento mínimo en infraestruturas, mellorando a calidade de vida dos veciños e veciñas e a mellora das condicións mediambientais destes lugares.

O Concello de Barbadás tramita de forma simultánea a licitación de tres importantes obras, que no seu conxunto suman preto de 278.000 euros, e que serán adxudicadas a final deste mes.

Trátase do Centro Social de Sobrado do Bispo, a mellora dos camiños Hervideiro, nesta mesma localidade, e A Carreira, en Barbadás, e a urbanización da Calzada Romana.

Centro social de Sobrado do Bispo: 151.957 euros.

Modificación do acceso, construción dunha nova escaleira e zona exterior. Novos aseos no interior. Renovación da cubrición da cuberta e substitución parcial da estrutura soporte. Novas carpinterías, cámaras e illamento na fachada. Renovación das instalacións de fontanería e saneamento, así como as de electricidade e iluminación e unha nova instalación de ventilación.

Calzada Romana. 70.000 euros.

Construción de beirarrúas nos tramos nos que non existen. Colocación de baldosas e instalación de elementos necesarios tendo en conta os pasos a camiños e a adecuación de pendentes á normativa. Reforma dos tramos deteriorados. Limpeza con auga a presión das baldosas existentes e limpeza da vexetación ao longo de toda a beirarrúa. Construción dun camiño, previa limpeza e roza. Colocación de varandas na parte da marxe dereita do río Barbadás.

Camiño a Carreira en Barbadás e Hervideiro en Sobrado. 56.200 euros.

Ampliación, mellora e mantemento de ambos camiños, de 305 e 110 metros respectivamente, que dan acceso a parcelas agrícolas destas dúas localidades.

Esta obra forma parte do Plan de Mellora de Camiños Municipais de Acceso a Parcelas Agrícolas 2024 – 2025, financiado co Fondo Europeo Agrícola de Desenvolvemento Rural “Europa inviste no Rural”.

Comeza a conta atrás para a mellora na rede de sumidoiros de San Lourenzo de Piñor, cuxas obras xa están sendo executadas. A empresa adxudicataria traballa na execución deste proxecto do Concello de Barbadás cuxa financiación se realiza a través  do Fondo Provincial de Cooperación do pasado ano, cunha inversión de 48.000 euros.

En concreto, a actuación localízase na rúa Travesía de Piñor, entre As Quintas e Roma, na parroquia de San Lourenzo de Piñor. Consiste na mellora da rede de saneamento en dita rúa, ampliándoa ata conducila durante preto de 130 metros ata o punto máis alto, onde será conectada a rede de saneamento existente na estrada OU-0519. Inclúe tamén un pozo de bombeo con sistema de impulsión para salvar o desnivel da propia canalización, a construción de seis pozos de rexistro e un pozo de bombeo.

Mantendo a liña de actuación do Concello de Barbadás durante os últimos anos, esta obra enmárcase dentro de plan para dotar aos núcleos do municipio de infraestruturas que melloren a calidade dos seus habitantes ao mesmo tempo que as condicións medioambientais do seu entorno, segundo explica Victoria Morenza, tenente alcalde de Barbadás, e se recolle no mesmo proxecto.

O alcalde de Barbadás, Xosé Carlos Valcárcel, sostén que este proxecto, “como outros moitos que están en fase de licitación ou redacción”, pretenden facer xustiza aos veciños e veciñas que carecían duns servizos básicos esenciais e sostibles medioambientalmente por mor da desatención de anteriores gobernos

O prazo de execución para este traballo é de tres meses.

A seguridade dos veciños e veciñas ante o lume é unha prioridade para o Concello de Barbadás. Durante o día de hoxe comezan a levarse a cabo os traballos da brigada de prevención e extinción de incendios, formada por un capataz, tres peóns, un peón condutor e dous condutores motobomba.

A función principal deste equipo é a prevención, polo que se levará a cabo a roza manual nos camiños públicos que se detallan nun plan de actuación que foi previamente elaborado polo Concello de Barbadás.

Co fin de intensificar os traballos para evitar o lume, este ano como novidade realizarán a inspección do cumprimento da lei de prevención de incendios en parcelas das faixas secundarias, ao redor dos núcleos de poboación. O traballo da brigada prolongarase durante un período de tres meses.

O alcalde, Xosé Carlos Valcárcel, a tenente de alcalde, Victoria Morenza, e o concelleiro de Emerxencias, Dani Rey, deron a benvida aos membros da brigada no primeiro día de traballo. Tal e como explicou Rey, “o Concello de Barbadás aposta por crear estas brigadas de prevención e extinción de incendios para dotar de maior seguridade aos veciños e veciñas”.

Os profesionais deste equipo coordinados co distrito 12 de incendios que marca as quendas de traballo e así se coordinan con outras brigadas de outros concellos e da Xunta para que haxa sempre efectivos do servizo de extinción a disposición da poboación.

A Corporación de Barbadás uniu os seus votos no pleno ordinario desta tarde para alzar de novo a voz ante unha demanda histórica. Todos os grupos políticos votaron a favor da moción do BNG para a construción dun instituto no concello. O alcalde, Xosé Carlos Valcárcel, indicou que esta proposta é fundamental para que Barbadás siga avanzando, polo que tamén propuxo unha emenda para solicitar á Xunta de Galicia un informe por escrito sobre a idoneidade dos terreos que se puxeron a súa disposición hai anos, así como o compromiso de que se executará a súa construción, indicando o prazo. No pleno púxose de manifesto que Barbadás é a única poboación galega de más de 10.000 habitantes sen un instituto.

Na sesión plenaria tamén se trataron outros asuntos. A moción para elaborar unha ordenanza reguladora de instalacións deportivas en Barbadás e para solicitar a modificación das tarifas de entrada á piscina que presentou o Partido Popular non saíu adiante, rexeitada polos votos dos concelleiros e concelleiras de PSOE, DO e Partido Galego. Votaron a favor PP e BNG.

O concelleiro de Deportes, Cristian Rodríguez, defendeu os novos prezos de acceso ás piscinas, que pasaron “de abrir dous meses a abrir tres, incorporando unha cafetería que está funcionando moi ben” e que mellora notablemente o servizo prestado. Destacou que tanto as entradas individuais como os bonos están adaptados aos diferentes tipos de usuarios, de tal xeito que se ben a entrada diaria é de 2 euros, máis baratas que en outras vilas de provincia, cos bonos rebaixase a 0,50 euros por día para adultos, 0,25 para cativos e mesmo entre 0,37 e 0,20 euros no caso das familias en función de que estean formadas por 3, 4 ou 5 persoas, dado que o bono familiar non ten límite de beneficiarios.

Ademais, Cristian Rodríguez subliñou que mentres noutras instalacións hai problemas por falta de socorristas, “o de Barbadás é un servizo eficaz e garantido durante todo o verán”.

O alcalde defendeu o actual modelo de xestión, a través dunha concesión, tal e como se fixo sempre no concello, negando polo tanto que as piscinas foran privatizadas. Tamén puxo en valor que as de Barbadás son das poucas piscinas de Ourense que permanecen abertas durante tres meses, sendo as primeiras que abriron este ano na provincia.

Co voto de calidade do alcalde aprobouse a derrogación da ordenanza de servizos educativos, por non axustarse á normativa vixente, mentres que o PP e o BNG votaron en contra.

Tamén co voto a favor do grupo de goberno e do concelleiro do Partido Galego, a abstención do PP e o voto en contra do BNG deuse luz verde á modificación do regulamento interno da Escola Infantil Municipal. A concelleira de Educación, Marga Pérez, explicou que a redución en media hora do horario do centro permitiría axustar o tempo de atención entre as aulas para mellorar a atención dos nenos e nenas.

Na sesión plenaria tamén se deu luz verde, con empate nas votacións e o voto de calidade do alcalde, á modificación da ordenanza reguladora do funcionamento da Escola Municipal de Música de Barbadás, que tamén debe adecuarse á normativa actual, pois incumpre o principio de equivalencia. O alcalde insistiu en que “este goberno traballa arreo para que se xestionen correctamente os servizos públicos” .

Co apoio de todos os grupos saíu adiante a adhesión do concello de Barbadás á Central de Contratación da FEGAMP e a modificación da porcentaxe de gastos plurianuais.

Tamén prosperou cos votos a favor de todos os partidos, excepto os dous concelleiros do BNG o edil de Partido Galego, que se abstiveron, a moción do Partido Popular que alerta da falta de persoal no Concello de Barbadás. O edil de Persoal, José Manuel Morgade, anunciou que se cubrirán as baixas nos servizos de atención ao público e Rexistro nas oficinas da Valenzá e na Casa do Concello. Das 12 existentes xa se cubriron 8.

Todos os partidos agás o Partido Popular apoiaron a moción do grupo dos socialistas de Barbadás e Democracia Ourensana sobre a supresión da Secretaría Xeral de Igualdade. A concelleira de Igualdade, Elisabet González, explicou que esta supresión demostra “a pouca importancia que o PP lle dá ás políticas de igualdade”. A moción reclama que estas políticas e as de violencia de xénero volvan a estar integradas no mesmo órgano superior e de dirección. “Barbadás conta con un CIM, agora descoñecemos de cal das dúas direccións xerais depende”, engadiu González.

Preto de 400 veciños e veciñas do rural de Barbadás xa recibiron os equipos de compostaxe para a xestión de residuos orgánicos. O Concello mantén unha firme aposta polo desenvolvemento sostible e esta mesma tarde entregáronse no CET medio cento destes packs que inclúen o composteiro e o aireador. Foi despois dunha interesante sesión informativa sobre a reciclaxe na que se explicaron datos curiosos como que os caracois son aliados da compostaxe ou que as arañas actúan como a policía de control de pragas dentro do composteiro.

Á charla asistiu o alcalde, Xosé Carlos Valcárcel; a tenente de alcalde, Victoria Morenza; a concelleira de Participación Veciñal, Ana Belén Peleteiro, e o edil de Disciplina Mediomabiental, Dani Rey. O rexedor animou á poboación a unirse a esta campaña e destacou que Barbadás é pioneiro na compostaxe doméstica repartindo dende o 2017 case 400 composteiros. Morenza insistiu en que Barbadás é o primeiro concello da provincia en implantar o contedor marrón na zona urbana e fixo un chamamento á concienciación.

Durante a sesión tamén se anunciou que os veciños e veciñas de Barbadás poden solicitar o uso da biotrituradora da que dispón o Concello para obter o estruturante para a compostaxe e o edil de Disciplina Medioambiental, Dani Rey, anunciou que os restos das podas, ao redor de 10 metros cúbicos de biomasa, trituraranse para poñelos a disposición da veciñanza.

Todas as persoas que desexen recibir o seu equipo de compostaxe deben inscribirse previamente a través da web https://barbadas.rsu.gal/, reservando así o material. A iniciativa tamén incluirá un seguimento ao longo do ano 2024.

Esta campaña conta coa financiación da Consellería de Medio Ambiente e Ordenación do Territorio e do Plan de recuperación, transformación e resiliencia do Goberno de España, financiado pola Unión Europea-NextGenerationEU.

Máis información a través do teléfono 647 521 464 ou do correo residuos@barbadas.es.

A aposta do Concello de Barbadás polo desenvolvemento sostible volve a quedar patente. O Centro Empresarial de Barbadás acollerá mañá, 26 de xuño, unha sesión formativa sobre a compostaxe doméstica. Será a partir das 19.00 horas e finalizará coa entrega do material necesario (manual de compostaxe, composteiro e aireador) para levar a cabo a reciclaxe dos residuos orgánicos. Nesta ano 2024 entregaranse ao redor de 200 destes packs dirixidos a todos aqueles veciños e veciñas que conten cun terreo dun mínimo de 50 metros cadrados.

Todas as persoas que desexen recibir o seu equipo de compostaxe deben inscribirse previamente a través da web https://barbadas.rsu.gal/, reservando así o material. A iniciativa tamén incluirá un seguimento ao longo do ano 2024.

Ademais, no marco da campaña de implantación do colector marrón, dedicado á reciclaxe dos residuos orgánicos, o Concello de Barbadás levará a cabo unha serie de visitas aos grandes produtores da Valenzá do 24 ao 28 de xuño. Esta iniciativa ten como

obxectivo fomentar a correcta xestión dos residuos orgánicos e promover prácticas

sostibles entre os negocios da zona.

Durante estas visitas, os grandes produtores (cafeterías, restaurantes, hoteis, entre

outros) recibirán:

-Asesoramento especializado sobre a reciclaxe de residuos orgánicos.

-Un manual de reciclaxe con información detallada e consellos prácticos.

-Un caldeiro para facilitar a xestión dos restos de comida.

-Bolsas compostables indispensables para o uso correcto do colector marrón.

-Unha chave de apertura dos colectores marróns da rúa, destinada a limitar o

uso indebido dos mesmos.

Esta campaña conta coa financiación da Consellería de Medio Ambiente e Ordenación do Territorio e do Plan de recuperación, transformación e resiliencia do Goberno de España, financiado pola Unión Europea-NextGenerationEU.

Máis información a través do teléfono 647 521 464 ou do correo residuos@barbadas.es.

En Barbadás, o verán é cultura. O Concello organizou unha decena de espectáculos de maxia, música, circo ou teatro, entre outras propostas nas que non só o público infantil será o protagonista, xa que para a súa organización pensouse en todos os sectores da poboación. O programa foi presentado esta mañá no Parque dos Patos da Valenzá, que será precisamente o escenario no que se leven a cabo as diferentes funcións.

No acto de presentación interviñeron o alcalde, Xosé Carlos Valcárcel; a tenente de alcalde, Victoria Morenza, e a concelleira de Cultura, Ana Belén Peleteiro, que destacou que esta edición do Verán Cultural traerá propostas “frescas e variadas para involucrar a toda a poboación, porque a cultura non colle vacacións”.

O rexedor destacou “a importancia de sacar a cultura á rúa, que é precisamente o que pretendemos dende o Concello”. Tamén puxo en valor o acto que terá lugar o 28 de xuño polo Día da Diversidade LGTBI “xa que se trata dun colectivo que merece a nosa atención e que ofrece unha gran colaboración ao mundo cultural”.

Victoria Morenza insistiu en que o Verán Cultural levarase a cabo “nun espazo privilexiado como é o Parque dos Patos, ata o que se achegan veciños e veciñas doutros concellos próximos e no que se habilitarán cadeiras para favorecer un lugar de encontro e para que o público poida desfrutar dos espectáculos”.

A programación estenderase do 26 de xuño ao 29 de agosto e os actos comezarán as 21.00 horas co seguinte calendario:

26 de xuño. Concerto da Banda Infantil de Música de Barbadás.

27 de xuño. Concerto da Banda de Música Cultural de Barbadás.

28 de xuño. Concerto do Grupo Guezos polo Día da Diversidade LGTBI.

4 de xullo. Compañía de circo Amontonados por Azar. Espectáculo “H2Olga”.

11 de xullo. Acústico de Carolina Rubirosa. Música de autora e versións escollidas moi persoais.

18 de xullo. Culturactiva. Espectáculo “Máis sabor”.

1 de agosto. Compañía de Circo Marta Iglesias. Espectáculo “Hoxe si”.

8 de agosto. Compañía Teatral Pedras de Cartón. Espectáculo “Quixote”.

22 de agosto. Maxia con Joshua Kennet. “Degustación de imposibles na rúa”.

29 de agosto. Concerto de Gin Toni´s.

O Concello de Barbadás toma medidas contra os actos vandálicos que se produciron na madrugada do domingo no campo de fútbol dos Carrís. Unha vez denunciados os feitos na Policía Local, solicitarase aos axentes da Garda Civil que revisen as cámaras instaladas ao longo da Valenzá para identificar aos culpables dos danos que pretendían a sabotaxe das cinco finais da Copa Deputación de fútbol 8.

Os vándalos actuaron de madrugada nas instalacións deportivas de Barbadás, rompendo unha decena de redes das porterías que se empregarían na competición do domingo pola mañá e danando as portas con silicona para impedir o uso das chaves.

O intenso traballo dos traballadores do Servizo Municipal de Deportes de Barbadás dende primeira hora da mañá permitiu que se puidesen desenvolver as cinco finais da Copa Deputación de fútbol 8 previstas. Substituíron as redes danadas antes de que comezasen os encontros e o concelleiro de Deportes, Cristian Rodríguez, agradece enormemente o seu esforzo: “Traballaron incluso en día de descanso para reparar os danos e substituír os materias en tempo récord, tamén grazas a que contamos con redes de reposto para calquera imprevisto”.

En canto ao custo económico dos actos vandálicos nas instalacións, calcúlase que ascende a preto de 1.500 euros. A investigación continúa en marcha para identificar aos culpables, xa que se cree que non foi unha soa persoa a que causou os incidentes.

Que todos os nenos e nenas, tamén aqueles con mobilidade reducida, teñan un espazo adaptado no que xogar. Este foi o obxectivo que levou ao Concello de Barbadás a acometer a construción da área infantil que se empraza na Rúa da Presa, detrás da escola infantil. Os elementos de xogo inclusivo e a accesibilidade son as súas principais características, ademais do colorido pavimento de caucho que aporta seguridade.

Para garantir a accesibilidade a este parque infantil construíronse tres plataformas, comunicadas entre elas por un sendeiro e escaleiras cunha diferencia de cota menor a 60 centímetros entre elas. Nestas plataformas instaláronse elementos de xogo inclusivos que permiten o disfrute de todos os nenos e nenas. O sendeiro, cunha pendente do 6%, foi executado con adoquíns de formigón mentres as escaleiras que comunican as plataformas foron construídas con formigón.

O material do pavimento é de caucho continuo, permeable e uniforme, constituído por gránulos de caucho cohesionados con un ligante con espesor adecuado, de acordo coa norma UNE EN 1177:2009.

O parque tamén dispón de bancadas, así como novas papeleiras, unha renovada fonte bebedeiro e un cartel con indicación das normas. Durante as obras foi necesario reubicar as farolas actuais, adaptándoas á nova configuración do parque infantil.

A tenente de alcalde, Victoria Morenza, explicou que a construción deste primeiro parque inclusivo de Barbadás “supón un avance na integración das persoas con diversidade funcional porque case a totalidade dos elementos son accesibles e incluso conta con xogos de escalada para favorecer a psicomotricidade”. Tamén insistiu Morenza en que o novo parque da Rúa da Presa “será un lugar propicio para que todos os nenos e nenas poidan disfrutar nun espazo común”.

Barbadás constituíu esta mañá no salón de plenos da Casa Consistorial a Xunta Local de Protección Civil cos integrantes dos grupos operativos que se conformarán no Plan de Emerxencias Municipal (PEMU). Ao encontro asistiu o alcalde, Xosé Carlos Valcárcel; a tenente de alcalde, Victoria Morenza, e o concelleiro de Emerxencias, Dani Rey.

Rey explicou que o obxectivo fundamental da constitución da xunta local “é precisamente a elaboración dun novo PEMU, xa que o actual data do ano 2003”. Tamén sinalou que esta xunta reunirase como mínimo unha vez ao ano, ademais de cando se requira pola elaboración do propio plan.

As funcións da Xunta Local de Protección Civil de Barbadás serán as seguintes:

-Propor a elaboración do Plan de Emerxencias Municipal (PEMU) e os plans especiais que considere necesarios, de acordo cos riscos do concello.

-Emitir informe con carácter previo á súa aprobación sobre os plans de protección elaborados.

-Supervisar o desenvolvemento, a implantación, revisión e realización de simulacros e actualización dos plans.

-Promover e supervisar o cumprimento das medidas de prevención establecidas no PEMU.

-Promover campañas de formación e información cidadá, así como o adestramento daqueles sectores da poboación que se considere necesario, consonte á problemática de risco que os afecte.

-Analizar e avaliar o desenvolvemento do PEMU unha vez conclúa a situación de emerxencia e propoñer as correccións necesarias.

-Promover e impulsar as medidas que considere necesarias no ámbito da protección civil.

-Informar e propoñer as previsións económicas e de infraestruturas que sexan necesarias para o desenvolvemento das súas competencias.

A necesidade de que a Administración autonómica preste máis atención ao Concello de Barbadás foi a principal mensaxe que trasladou o alcalde, Xosé Carlos Valcárcel, ao novo delegado da Xunta en Ourense, Manuel Pardo, nunha reunión celebrada esta mañá na Casa Consistorial. O rexedor reiteroulle a necesidade de levar a cabo diferentes proxectos, entre os que destaca a implantación do transporte metropolitano. Cómpre lembrar que xa pasaron 6 anos dende que se aprobaron nun pleno extraordinario as ordenanzas que esixiu a Xunta para instaurar este servizo sen que se deran pasos en firme para facer realidade esta demanda histórica dos veciños e veciñas.

Mentres tanto, para facilitar o servizo á cidadanía o Concello inviste ao redor de 100.000 euros anuais en bonificacións para o transporte en autobús, cunha rebaixa xeral do 37%, do 55 % no caso dos estudantes e do 48% para os pensionistas. A viaxe é gratuíta para as persoas en risco de exclusión social. Crecemento económico, mellora da mobilidade ou o asentamento da poboación son só algunhas das vantaxes da posta en marcha do servizo e así o reiterou o alcalde.

Outro dos proxectos que puxo sobre a mesa o rexedor foi a construción dun elevador no centro de saúde. O desnivel existente dificulta o acceso das persoas con mobilidade reducida, polo que este elevador que se construiría na parte externa do inmoble melloraría considerablemente o acceso dos usuarios e usuarias.

Xosé Carlos Valcárcel tamén insistiu na necesidade de ampliar o parque móbil da Policía Local e de Protección de Barbadás, que leva case unha década sen incorporar novos vehículos, e o estudo da iluminación da rotonda da N-540 que acaba de construír a Xunta de Galicia e que da acceso á A-52, ao polígono e a Celanova.

Outros asuntos no que insistiu o rexedor foi o compromiso da Xunta de Galicia de financiar a ampliación do polideportivo e trasladoulle algunhas das deficiencias existentes no CEIP Filomena Dato, que ten 25 anos de antigüidade e presenta problemas de humidades e goteiras, entre outros.

O alcalde, Xosé Carlos Valcárcel, insistiu na importancia de ter en conta a Barbadás como “un concello en constante crecemento que merece máis atención por parte das Administracións”.

 Centenario de Carmen Martín Gaite

O  proxecto elaborado polo Concello de Barbadás para erixir á parroquia de Piñor na capital do universo literario e vital de Carmen Martín Gaite xa conta co respaldo do Ministerio de Cultura e o rexedor trasladou ao delegado da Xunta de Galicia a importancia do apoio da Administración autonómica con motivo dos actos que se levarán a cabo polo centenario do nacemento da escritora. Acordouse programar unha reunión co Conselleiro de Cultura para valorar a colaboración.

Os premios da edición número 27 do Certame Literario de Piñor de Narracións Breves entregaranse mañá nunha xornada de exaltación das letras e a música galega que terá a Casa de Cultura Manuel María como escenario. A partir das 18.00 horas agárdanse as actuacións de Cantagalos, Cuncas do Son e Zoadeira, ademais da Banda de Música e Cultura de Galicia.

Que Piñor inspira a grandes escritores volveu a quedar demostrado neste certame literario que leva o nome desta parroquia de Barbadás e que organiza a Asociación Cultural Música e Cultura de Galicia coa colaboración do Concello.

Na categoría A (maiores de idade) os gañadores son Xosé Alfredo Naz e Sandra Fernández. Na categoría de B (de 13 a 17) resultaron premiados Hugo Martínez e Iker Pérez, mentres que na categoría C (alumnado de primaria) foron galardoados Lois González e Álex González.

En total, repartiranse preto de 1.300 euros con dous relatos galardoados en cada categoría. O certame consolídase no tempo e cada vez son máis os participantes, tamén doutras provincias galegas. Este concurso naceu da man da mocidade de Piñor na década dos noventa para potenciar a literatura galega.

A unidade canina da Garda Civil, a “patrulla canina” como a identificaron os nenos e nenas, foron os grandes protagonistas da exhibición dos servizos de emerxencias que tivo esta mañá o Paseo dos Amieiros de Barbadás como escenario e na que participaron un milleiro de escolares dos CEIP O Ruxidorio e Filomena Dato e do CPR Luis Vives, ademais de usuarios de Centro Ocupacional As Burgas. Os cans realizaron unha demostración de como detectan substancias estupefacientes e gañaron os aplausos dos asistentes.

Durante toda a xornada, os nenos e nenas tiveron ocasión de coñecer de preto o traballo dos profesionais que velan pola seguridade da cidadanía e incluso de coñecer algúns dos medios que empregan, como detectores de explosivos ou os equipamentos para manipular materiais radiactivos. Os bombeiros despregaron a grúa máis grande da provincia para simular un rescate no piso máis alto dun dos edificios deste entorno da Valenzá no que durante toda a mañá resoaron as sereas.

Un dos momentos máis emotivos foi a homenaxe que se rendeu a José Nicanor e Antonio Rodríguez, dous bombeiros de Ourense que se xubilan despois de 41 anos e 31 anos de traballo, respectivamente. Recibiron un agasallo das mans do alcalde de Barbadás, Xosé Carlos Valcárcel; da concelleira de Sanidade, Servizos Sociais e Igualdade de Barbadás, Elisabeth González, e do concelleiro de Emerxencias, Dani Rey.

É o segundo ano que Barbadás organiza esta espectacular exhibición e nesta ocasión aumentaron os medios de seguridade e servizos de emerxencias que se deron a coñecer aos escolares e que foron os seguintes: Garda Civil, Policía Nacional, Consellería de Medio Rural, Bombeiros San Cibrao e Ourense, Protección Civil de Barbadás e Ourense, Policía Local del Barbadás, Axega 112, Patrimonio Natural e a Axencia de Doazón de órganos e Sangue.

A Corporación de Barbadás celebrou esta tarde o seu pleno ordinario, no que saíron adiante acordos como a proposta do goberno local para reclamar á Xunta de Galicia que asuma os gastos de conservación e mantemento dos dous CEIP, que no concello ascenden a máis de 200.000 euros anuais. A concelleira de Educación, Marga Pérez, explicou que nesta cantidade non se inclúen todas as actividades que ofrece o Concello para facilitar a conciliación, como as extraescolares ou as saídas didácticas e culturais.

Marga Pérez tamén lembrou que se está incumprindo un acordo do ano 2006 para que a Xunta asuma os gastos de mantemento: luz, limpeza, conserxes, alarmas, e conservación, ademais do pago do persoal de conserxería. “Xa é hora de que a Xunta asuma estes gastos de mantemento, o Concello pode asumir gastos razonables, pero non o pintado e reparación de gretas das fachadas ou problemas de humidades”, engadiu a concelleira.

Tal e como se explica na proposta, ata o de agora son os concellos os que asumen esta “pesada carga económica”, polo que se insta á Xunta de Galicia a que se realice un estudo e análise das necesidades estruturais que teñen os centros, sobre todo os de máis antigüidade, para proceder a súa reforma integral. Ademais, ínstase á Deputación provincial a axudar no cofinanciamento destes gastos “mentres a Xunta non se faga cargo das súas propias competencias e das súas responsabilidades”.

A moción tamén pretende outorgar maior autonomía aos centros educativos para xestionar o seu propio mantemento, “garantindo que se asignen os orzamentos de maneira eficiente e acorde ás necesidades reais de cada colexio”. A proposta saíu adiante cos votos do goberno, o concelleiro do Partido Galego e BNG e o voto en contra do PP.

Tamén prosperou, cos votos a favor de PP e BNG, a abstención do grupo de goberno e o voto en contra de Partido Galego, a moción do Partido Popular para instar ao Concello de Barbadás a colaborar de xeito económico e institucional co proxecto de recuperación do Castro de Trelle e para establecer un convenio de colaboración coa asociación cultural Porta da Cadea.

O goberno local presentou unha enmenda para instar aos Concellos de Toén, Cartelle e Barbadás para que asinasen un convenio de colaboración e solicitouse que se suprimise o segundo punto porque nos últimos anos a asociación Porta da Cadea recibiu subvencións por concorrencia competitiva.  O Partido Popular non aceptou a supresión.

Na sesión plenaria saíu adiante por unanimidade a moción do BNG para o acondicionamento do concello de cara á tempada estival co pintado de varandas, a colocación de embelecedores nas principais illas de contedores, renovación de taboleiros e sinalización e mantemento das xardiñeiras, incluídas as do rural.

Victoria Morenza, concelleira de Obras e Infraestruturas, explicou as actuacións que levou a cabo o Concello: “As varandas téñense pintado progresivamente en todas as poboacións do concello e seguirase executando o pintado, os embelecedores colocaranse en función das dispoñibilidades orzamentarias debido ao gran número deste tipo de illas que hai en todo o concello e respecto da renovación de taboleiros, renováronse nos últimos anos no rural e na Valenzá e colocáronse novos en Loiro, Sobrado, Parada, Pontón e Santa Uxía”.

O goberno de Barbadás aprobou no pleno extraordinario celebrado esta tarde o orzamento máis alto da súa historia. Foi co voto a favor do PSdeG e do concelleiro de Democracia Ourensana e abstención do PP, BNG e do concelleiro do Partido Galego. As contas, que ascenden a un total de 8.494.083 euros, contemplan un incremento da inversión do 257% e esta supera o millón de euros. Inclúense neste apartado as previsións para afrontar a execución de obras de infraestruturas novas, a adquisición de maquinaria, mobiliario, equipos informáticos e a reposición de infraestruturas existentes.

Tamén se establece no orzamento un aumento da partida de persoal para actualizar os soldos dos empregados municipais á Relación de Postos de Traballo (RPT). Os gastos de persoal experimentan un incremento de 342.421 euros na súa dotación con respecto ás contas do exercicio 2022 e este aumento corresponde a diferentes variables.

En primeiro lugar, a situación de prórroga orzamentaria durante o ano 2023 implica o recoñecemento do aumento nunha anualidade da cuantía que habería de reflectirse de xeito escalonado nos anos 2023 e 2024. Ademais, no exercicio 2024 prevense as subas salariais aprobadas polo Goberno de España e nas respectivas Leis de Orzamentos vixentes ao longo deste período.

O alcalde, Xosé Carlos Valcárcel, subliñou que hai dez anos que non se suben as taxas a pesar do incremento do IPC  e insistiu en que “este concello aposta polas familias prestando servizos de calidade”. Tamén lembrou que Barbadás conta cunha taxa de desemprego por debaixo das 300 persoas e que “incluso non podemos acceder a determinadas subvencións por ter unha taxa tan baixa”.

Tamén recalcou que “a metade da contía do sostemento de axuda no fogar é costeada polo Concello, unha competencia impropia” e que en relación ao Fondo de Cooperación local, “a aportación da Xunta de Galicia segue a ser a mesma dende hai 13 anos: 26.000 euros mensuais”.

Incorporouse un punto relativo a unha modificación da subvención á Agrupación Deportiva de Parada. Modificouse de 8.000 euros a 15.000euros co voto favor do PSdeG, o concelleiro de Democracia Ourensana, o concelleiro do Partido Galego e o concelleiro do PP Ramón Lloves. En contra o resto do grupo do PP e BNG.

Por unanimidade saíu adiante o segundo e último punto da orde do día relativo á modificación do plan estratéxico de subvencións do Concello de Barbadás.

Na loita contra a violencia de xénero na provincia de Ourense, o Centro de Información de Barbadás xoga un papel fundamental. Os seus profesionais ofrecen asesoramento a veciñas de toda a comarca e no último ano, dende abril do 2023 ao mesmo mes do 2024, foron un total de 132 mulleres as que recibiron atención, case un 30 % máis que no mesmo período do ano anterior.

O venres pola tarde tivo lugar no salón de plenos a reunión da mesa de coordinación interinstitucional fronte a violencia  de xénero do Concello de Barbadás. O obxectivo deste encontro, que se celebra cada 6 meses, é analizar a situación da violencia de xénero na provincia con todas as institucións implicadas na loita contra a violencia de xénero e no tratamento e atención ás vítimas.

Á reunión asistiu o alcalde de Barbadás, Xosé Carlos Valcárcel; a concelleira de Igualdade, Elisabeth González; e o concelleiro de Emerxencias, Daniel Rey, xunto co persoal do CIM, traballadores dos Servizos Sociais e dos centros educativos do concello, Policía Local e Garda Civil. Propuxéronse medidas de cara a prevención e tratamento dos casos de violencia de xénero, así como para a coordinación das diferentes institucións.

O Concello de Barbadás detectou nos últimos meses un aumento significativo dos casos. As vítimas contan no Centro de Información á Muller (CIM) cun servizo que ofrece asesoramento dende os ámbitos social, psicolóxico de xurídico. Tamén se levan a cabo durante todo o ano diversas campañas e actividades de sensibilización e prevención das distintas formas de violencia.

A loita contra esta lacra social é unha prioridade en Barbadás e a concelleira de Igualdade, Elisabet González, subliña que a gran implicación dos profesionais de Barbadás é moi importante na loita contra este grave problema social.

Dispositivo de seguridade para as vítimas

O concello de Barbadás tamén conta co servizo Atenpro, un dispositivo de protección de seguridade para as vítimas de violencia de xénero que está conectado a unha central de alarma as 24 horas do día. Na actualidade son 14 as usuarias e o CIM encárgase de realizar o seguimento.

Ademais, o Concello de Barbadás está adherido á Rede de Entidades Locais fronte á violencia de xénero, entre outras medidas que se levan a cabo como a posta en marcha da Mesa Local de Coordinación Interinstitucional fronte á violencia de xénero.

A carreira de obstáculos Cavernícola Race de Barbadás gañará en espectacularidade nesta quinta edición na que se inscribiron un total de 391 persoas. A proba foi presentada esta mañá nas inmediacións do Campo de Fútbol dos Carrís, dende o onde sairán os participantes que se enfrontarán este sábado 18 de maio a diferentes probas de barro, auga ou lume cun total de 30 obstáculos.

Tal e como explicou o coordinador de Deportes do Concello, Diego López, serán moitas as novidades desta edición que tamén terá un carácter solidario ao doarse parte do prezo da inscrición á Asociación Española de Pacientes con Mieloma Múltiple. Fernando González, veciño de Barbadás diagnosticado desta enfermidade e que protagoniza unha gran historia de superación, agradeceu a solidariedade dos participantes.

O concelleiro de Deportes, Cristian Rodríguez, asegurou que a carreira é cada ano máis espectacular e gaña en participación e subliñou a importancia “de que nesta edición o 50% dos inscritos sexan mulleres”. Tamén agradeceu o esforzo dos traballadores do polideportivo e animou a todos os veciños e veciñas a animar aos participantes.

O alcalde de Barbadás, Xosé Carlos Valcárcel, puxo en valor unha carreira que medra cada que pasa e que se consolida no calendario deportivo. Tamén agradeceu a Fernando González “á motivación que esperta en moitas persoas” e reivindicou que a natureza que rodea Barbadás fai que o concello sexa o escenario perfecto para este tipo de competicións deportivas.

Na fermosa carballeira do Parque dos Carrís celebrará o Concello de Barbadás este venres 17 de maio a gran Foliada Letras Galegas, que foi presentada esta mañá neste mesmo escenario. Trátase dunha iniciativa que alcanza a súa terceira edición e que este ano estará dedicada á poetisa e ensaísta Luisa Villalta. Case unha decena de agrupacións musicais amenizarán a xornada e está previsto que ao xantar popular asistan preto de 300 persoas.

A Foliada Letras Galegas contará coas actuacións da charanga feminina Bicoia, a Banda Cultural de Barbadás, integrada polo alumnado da Escola Municipal de Música, e de grupos como Lambisqueiras, Zoadeira e Cuncas de Son, con cantos e música tradicional.

Dende o Concello de Barbadás convídase a todos os veciños e veciñas a participar neste evento e desfrutar do xantar popular que comezará ás 14:30 horas. As entradas para o xantar están a venda en Fonval, Rúa da Ensinanza, 11.

Tal e como explicou a concelleira de Educación e Comercio, Marga Pérez, tamén está previsto que no Parque dos Carrís se instalen postos de produtos artesanais e ofreceranse xogos e talleres para os máis pequenos, como un obradoiro de pulseiras de coiro. “Será unha xornada moi especial e convidamos a toda a cidadanía a participar”, engadiu Pérez.

A concelleira de Cultura, Ana Belén Peleteiro, insistiu no carácter interxeracional e popular desta Foliada Letras Galegas que xa acada a súa terceira edición e “que porá en valor un ano máis a nosa música e a nosa gastronomía”.

O alcalde de Barbadás, Xosé Carlos Valcárcel, subliñou que os veciños e veciñas poderán vivir no Parque dos Carrís “a típica romaría galega, na que haberá música, danza, cantos tradicionais e gastronomía e que pretende reivindicar o uso da nosa lingua”.

A Foliada Letras Galegas rematará coa actuación da charanga BBB e unha gran queimada a partir das 18.30 horas. Recoméndase aos asistentes que leven vestimenta tradicional galega para disfrutar desta iniciativa que se consolida no calendario cultural.

O paseo literario “O Piñor de Carmen Martín Gaite” afiánzase no calendario como unha interesante cita cultural para coñecer aqueles espazos de San Lourenzo de Piñor que deixaron unha fonda pegada na poética narrativa da novelista salmantina. A segunda edición celebrarase este sábado 11 de maio e foi presentada esta tarde no local social da parroquia pola tenente de alcalde, Victoria Morenza, a concelleira de Cultura, Ana Belén Peleteiro, e o estudoso David González Couso, que acompañará aos asistentes no paseo literario que arrancará ás 10.30 horas neste mesmo punto.

A procedencia galega da familia materna de Carmen Martín Gaite provocou longas estancias nos veráns da posguerra que foron enchendo de anécdotas e descricións os textos da que sería Premio Nacional das Letras ou Premio Príncipe de Asturias. Nesta segunda edición, como novidade, inaugurarase un panel no que figuran todas as paradas que forman parte do percorrido das tres obras literarias de Carmiña situadas integramente en Piñor: Las ataduras, Retahílas e El pastel del diablo.

O percorrido, no que xa se inscribiron máis dun cento de persoas, comezará no Centro Social de Piñor ás 10.30 horas e concluirá no Campo de Roma, moi preto de onde se sitúa a que foi a casa familia Gaite ata mediados os anos 60 do século XX. Na metade da xornada haberá ocasión para dialogar e degustar uns petiscos no bar O Regueiro. A lectura de textos e a música a cargo de Nova Fronteira Barbadás serán os acompañantes para esta xornada literaria.

A tenente de alcalde, Victoria Morenza, subliñou que de cara ao primeiro centenario do nacemento “é unha honra estar planificando os actos de homenaxe a esta ilustre escritora”. Tamén explicou que “moitos dos lugares que imos percorrer o sábado aparecen nas súas novelas e esta a iniciativa poñerá a Piñor no mapa da literatura universal”.

A concelleira de Cultura, Ana Belén Peleteiro, asegurou que este paseo “será un punto de encontro para os amantes das letras e para poñer en valor a importancia de San Lourenzo de Piñor na vida da escritora, a nosa Carmiña”.

González Couso afirmou que esta homenaxe “pon no lugar que merece a Carmen Martín Gaite e a inauguración do panel supón a antesala de cara a programación dos actos que se levarán a cabo con motivo do centenario”.

A próxima cita para este roteiro será o sábado 1 de xuño, organizada esta vez polo CAFI (Centro Autonómico de Formación e Innovación), e dirixida ao profesorado interesado previa inscrición na plataforma da Consellaría de Educación.

Unha ampla programación para o 2025

A iniciativa englóbase no programa de actos que se prevén cara o centenario do nacemento da escritora que terá lugar no 2025 e do que forman parte tamén dúas novas publicacións do profesor Couso, a realización dunhas xornadas para investigadoras e investigadores e o material didáctico que contribuirá á reivindicación deste espazo como clave no facer literario dunha escritora de recoñecemento internacional.

Que Carmen Martín Gaite, escritora universal, gañadora do premio Príncipe de Asturias e unha das plumas máis recoñecidas en lingua española, teña o lugar que se merece en Barbadás é o obxectivo que levou ao Concello a elaborar un proxecto para o seu centenario que erixirá a Piñor na capital do universo literario e vital da escritora. A iniciativa xa conta co respaldo do Ministerio de Cultura.

O alcalde de Barbadás, Xosé Carlos Valcárcel; a tenente de alcalde e impulsora do proxecto, Victoria Morenza, e a concelleira de Cultura, Ana Belén Peleteiro, reuníronse co secretario de Estado de Cultura, Jordi Martí, e a directora xeral do Libro, María José Gálvez. O encontro foi moi positivo, xa que o Ministerio manifestou a súa aposta por ensalzar a figura de Martín Gaite, especialmente no seu centenario, e con San Lourenzo de Piñor como epicentro.

Evitar os accidentes na  Rúa Calzada Romana é o obxectivo que levou ao Concello de Barbadás a elaborar un proxecto que mellorará a seguridade coa colocación de novas baldosas e unha varanda nas zonas de maior altura e que poden resultar perigosas. A beirarrúa desta vía, na súa separación co río Barbadás e as fincas existentes, atópase sen rematar en moitos tramos. Nalgúns puntos os cortes son abruptos e a falta de varanda pon en risco aos peóns, xa que a altura pode superar o metro e medio, polo que se levará a cabo a súa reforma cun orzamento de 70.000 euros.

No proxecto tamén se inclúe a limpeza e roza do camiño que comunica a Rúa Calzada Romana coa rúa Porto do Río, co fin de facer un novo e facilitar a accesibilidade. Realizarase tamén pendentes para as persoas con mobilidade reducida.

Tal e como se reflexa no proxecto, estas serán as obras que se levarán a cabo na vía:

• Construción de beirarrúas nos tramos nos que non existen.
• Colocación de baldosas e instalación de elementos necesarios tendo en conta os pasos a camiños e a adecuación de pendentes á normativa. Reformaranse os tramos deteriorados.
• Limpeza con auga a presión das baldosas existentes e limpeza da vexetación ao longo de toda a beirarrúa.
• Construción dun camiño, previa limpeza e roza.
• Colocación de varandas na parte da marxe dereita do río Barbadás. Estará formada por postes verticais cadrados de aceiro.

A superficie de actuación na que se colocarán as novas baldosas é de case 500 metros cadrados. O novo camiño que se habilitará terá unha lonxitude de 157 metros cadrados e a colocación da varanda realizaranse ao longo de case 300 metros.

Barbadás contará cun espazo que atenuará o riso de calor extremo e que incidirá na mellora da calidade do aire. Emprazarase no entorno do Regato dos Muíños e mitigará o efecto illa de calor coa construción dunha lagoa para anfibios, a plantación de cerdeiras e a instalación dunha pérgola cunha vide que xerará espazos de sombra. O Concello vén de adxudicar as obras, que contan cun prazo de execución de 4 semanas.

A actuación que se levará a cabo en Barbadás para construír a lagoa e loitar contra as altas temperaturas será unha das sete que subvencione a Xunta de Galicia para a realización de accións de mitigación e adaptación ao cambio climático. Co fin de adiantarse aos efectos do quentamento global e que estes sexan o menos prexudiciais posibles para a cidadanía, o Concello de Barbadás solicitou á Consellería de Medio Ambiente esta subvención e elaborou un proxecto que inclúe tanto a reforma deste espazo público orientada á atenuación do efecto illa de calor urbana, como unha campaña de sensibilización para implicar á cidadanía na loita contra o cambio climático.

Máis en concreto, o espazo urbano no que se actuará para atenuar os efectos das altas temperaturas é o entorno da rúa Regato dos Muíños, na beira do río entre a travesía Tomás Rodríguez Punxín e a rúa da Presa, preto da zona de xogos infantís, no lugar de Vilaescusa. Tal e como se establece no proxecto, levaranse a cabo as seguintes actuacións:

• Creación dunha lagoa para anfibios de 25 metros cadrados, incluíndo plantas acuáticas autóctonas.
• Pavimentación con materiais en acabado permeable nunha superficie de 50 metros cadrados.
• Plantación de 4 cerdeiras autóctonas.
• Instalación de dous bancos e unha papeleira.
• Instalación dunha pérgola de madeira cunha vide.

Coa creación dunha pequena lagoa, a plantación de catro cerdeiras ao seu redor e a instalación dunha pérgola preténdese xerar un espazo fresco pola combinación da humidade da lagoa e a sombra das árbores e da pérgola que axude a combater o efecto illa de calor dos espazos urbanos, potenciando as condicións actuais deste espazo verde.

A tenente de alcalde, Victoria Morenza, subliña a importancia de concienciar a poboación sobre o cambio climático e explicou que este proxecto que contempla a creación da lagoa para anfibios acompañarase con programas formativos para a mocidade: “Haberá visitas para o alumnado da zona e crearanse unidades didácticas para incidir na necesidade de frear o quentamento global”.

Acubillo para anfibios

Coa construción da lagoa tamén se pretende dar acubillo a especies de anfibios e coas cerdeiras dotarase de refuxio e alimentos aos pequenos paxaros, aumentando a biodiversidade da contorna.

Neste mesmo punto instalarase un panel informativo con contidos orientados á conservación da fauna e flora autóctonas e á loita contra o cambio climático. As xornadas de concienciación tamén se trasladarán aos centros educativos.

Barbadás, concello pioneiro na implantación da tecnoloxía LED nos espazos públicos, seguirá avanzando na substitución de vellas luminarias para conseguir a eficiencia enerxética na totalidade do municipio. Así, o Instituto para a Diversificación e Aforro da Enerxía (IDAE) vén de aprobar provisionalmente o proxecto para levar a cabo a substitución de 558 vellas luminarias nos pobos de Barbadás e Bentraces. O investimento ascende a 378.975 euros.

Nos núcleos de Barbadás e Bentraces existen varios alumeados municipais que se encontran deteriorados polo paso do tempo e con equipos obsoletos, polo que se levará a cabo a súa renovación para a redución da potencia lumínica, a minoración do gasto enerxético, a minoración dos gatos de mantemento, a mellora das condicións de confort visual e a redución da contaminación lumínica.

A actuación contempla a instalación de sistemas de regulación de potencia en horario de madrugada, o que reducirá os consumos e os custos económicos. Ademais, a telexestión das luminarias punto a punto permitirá adaptar a iluminación a condicións cambiantes ou eventos especiais.

Cómpre lembrar que Barbadás foi un concello pioneiro na substitución de vellas luminarias por tecnoloxía LED en pobos como Parada, O Fonsillón ou Sobrado do Bispo. Tamén se realizou o cambio nunha terceira parte da Valenzá e en gran parte da localidade de Piñor e Finca Fierro. En total, nos últimos anos levouse a cabo a substitución dun total de 1.500 vellas luminarias por tecnoloxía LED.

A tenente de alcalde, Victoria Morenza, valora moi positivamente a confirmación do proxecto por parte do IDAE, “o que suporá seguir avanzando para cambiar a totalidade das vellas luminarias do municipio e facer de Barbadás un referente en eficiencia enerxética”.

O Concello de Barbadás executará a reforma de catro rúas, tres do rural e unha da Valenzá, coa financiación do Plan Provincial de Cooperación de Obras e Servizos da Deputación de Ourense. Trátase da pavimentación da Rúa do Cruceiro e do Camiño do Barro nas Lamas, a mellora do firme na Rúa Alvaredo, en Loiro, e da Rúa Lameiro do Mato, na zona do río.

A pavimentación da Rúa do Cruceiro das Lamas conta cun orzamento de 21.200 euros e un prazo de execución de tres meses. A actuación contempla a pavimentación con formigón e a mellora da drenaxe das augas de escorrentía.

As obras de rexeneración da Rúa Alvaredo en Loiro  consisten no fresado do firme existente para aplicar un rego asfáltico de imprimación e a lonxitude do tramo afectado de estrada é de preto de 200 metros.

No caso da Rúa Lameiro do Mato da Valenzá, prevese o fresado do firme nas conexións do tramo afectado co sistema viario existente para a continuación aplicar tamén un rego asfáltico de imprimación. Estas dúas actuacións contan cun orzamento de 38.600 euros e o prazo de execución tamén será de tres meses.

Unha obra moi demandada pola veciñanza

Estes obras sumaranse as levará a cabo o Concello de Barbadás no Camiño do Barro cun orzamento de 123.000 euros para renovar a rede de pluviais e o pavimento e que tamén contemplan a ampliación do ancho da vía nalgúns puntos. Este ambicioso proxecto faise eco das inquedanzas dos residentes e solucionará un problema de anos atrás.

A tenente de alcalde, Victoria Morenza, subliña que coa execución destes proxectos “procederase ao reequilibrio territorial tan demandado pola poboación e atenderase a todas as parroquias e ás necesidades da veciñanza ao mesmo tempo que se mellora a accesibilidade e a mobilidade nos diferentes lugares”. As intervencións iranse realizando progresivamente nos núcleos “en función da orde de prioridade polo estado no que se atopan algunhas vías”.

Mediante estes proxectos, o Concello de Barbadás mantén o seu empeño de dotar aos núcleos do municipio do equipamento mínimo en infraestruturas, mellorando a calidade de vida dos veciños e veciñas e a mellora das condicións mediambientais destes lugares.

O Concello de Barbadás está a levar a cabo actuacións en diferentes parques, tanto da Valenzá como nos diferentes núcleos, para ofrecer aos veciños e veciñas espazos de ocio de calidade. Unha das zonas verdes máis frecuentadas polos nenos e nenas é o parque da Liberdade, emprazado ao carón da avenida de Celanova e cun paseo que conta cun firme deteriorado polas grandes gretas que provocan as raíces das árbores. O Concello conta cun proxecto para levar a cabo a súa reparación.

Máis en concreto, as obras que se pretende realizar son a demolición do formigón existente deteriorado, dos sumidoiros  e a retirada parcial das raíces das árbores, o formigonado do paseo e a colocación de novos sumidoiros e levantado de arquetas a cota do formigón. Esta actuación ten un prazo de execución de dous meses.

Outra das deficiencias que se solucionará con esta actuación é o cambio a formigón ao comezo do paseo, ademais de arranxarse tamén os tramos levantados con lastras rotas. O obxectivo é favorecer a accesibilidade neste parque que elixen tantas familias do concello para desfrutar das tardes de bo tempo.

A tenente de alcalde, Victoria Morenza, asegura que esta obra no Paseo da Liberade suporá unha mellora considerable da accesibilidade, “xa que había moitas barreiras dende a súa inauguración para cadeiras de rodas ou carros de bebé, incluso tramos con desniveis”. Subliña, ademais, que a actuación mellorará a mobilidade para o uso e desfrute desta zona de lecer.

Arranca a Semana do Libro en Barbadás con interesantes propostas para todos os públicos e entre as que se inclúe un intercambio co club de lectura portugués “Chá con palavras”. Os visitantes do país veciño realizarán este sábado 27 de abril a ruta literaria da obra “O souto dos catro ventos”, de María Oruña, acompañados polos integrantes do club “Café con letras” do municipio.

Inculcar aos máis pequenos a paixón polos libros é un dos obxectivos do programa e os contacontos sucederanse polas librerías ao longo dos próximos días. Esta iniciativa dirixida a nenos dende os tres anos terá esta tarde as librerías Carlin e Espa como escenario, ás 18.30 e 19.15 horas.

A concelleira de Educación e Comercio, Marga Pérez, anima a todas as familias a participar “nesta proposta que se leva a cabo dende hai anos para incentivar a lectura grazas á colaboración das librerías e tamén trata de dinamizar o sector do comercio coa venda de libros”.

Para mañá, 23 de abril, organizouse un contacontos na Biblioteca Municipal, a partir das 10.00 horas. Neste mesmo escenario, ás 19.30 horas, terá lugar a presentación do libro “A única María Casares”. Recentemente galardoada co premio Mestre Mateo á mellor interpretación feminina de repartición, Berta Ojea, quen tivo o privilexio de coñecer a María Casares, presentará esta obra de ficción baseada na vida e experiencias da recoñecida como a destacada actriz europea do século XX e a quen Albert Camus  denominaba “a única”.

A información é clave para o control das avespas velutinas. Por iso o Concello de Barbadás, no marco do seu plan de prevención desta praga, programou charlas informativas nos diferentes pobos e nas que se darán pautas á veciñanza sobre como reaccionar ante as picaduras e para a elaboración de trampas artesanais. A primeira das oito charlas programadas terá lugar mañá, 23 de abril, ás 19.30 horas no local social de Bentraces.

Nestes encontros tamén se mostrará aos veciños e veciñas o equipamento de actuación co que conta o Servizo Municipal de Emerxencias e a dar avisos de avistamentos. O mércores, 24 de abril, a iniciativa trasladarase ao local social de Piñor e ao resto dos pobos ata o próximo 7 de maio.

Estas charlas informativas son só unha das medidas que porá en marcha o Concello de Barbadás no seu plan de control da avespa velutina que se levará a cabo en dúas fases. Por unha banda, nesta época de primavera colocaranse un cento de trampas con atraínte para capturar as raíñas que saen da hibernación, evitando así a proliferación de niños secundarios.

Escopeta marcadora

Posteriormente, a eliminación de niños terá lugar mediante previo aviso dos particulares aos números de teléfono 012 ou 112. A actuación levarase a cabo mediante o método de eliminación física do niño con spray insecticida e retirada manual, ou ben con escopeta marcadora de nova adquisición, que evitará así o gasto en aluguer de elevadores e minimizará o risco das diferentes intervencións ao non ser preciso realzar traballos en altura.

Este novo sistema de eliminación con escopeta marcadora de aire comprimido permitirá chegar a alturas que sería imposible alcanzar sen grúa e diminuirase o risco de ataque das velutinas.

Coincidindo co Día da Bici, os nenos e nenas de Barbadás pedalearon case 4 quilómetros polas rúas para reivindicar o uso deste medio de transporte, en favor do medio ambiente e dos hábitos saudables. Os alumnos e alumnas de sexto de Primaria dos CEIP O Ruxidoiro e Filomena Dato participaron nunha xornada de convivencia e deporte na que ademais recibiron nocións sobre seguridade viaria e o manexo das bicis por parte do director técnico da Escola de Ciclismo do Concello, Antonio Piñeiro, e a xefa da sección de seguridade viaria da Xefatura Provincial de Tráfico de Ourense, Estrella Garrido. Os escolares tamén estiveron acompañados polo alcalde, Xosé Carlos Valcárcel; a concelleira de Educación, Marga Pérez; o concelleiro de Deportes, Cristian Rodríguez; e o concelleiro de Emerxencias, Daniel Rey.

Dende hai case unha década, o Concello de Barbadás conta cunha ferramenta de apoio aos emprendedores e emprendedoras que teñen un proxecto viable. Trátase dos niños empresariais do CET, que minimizan as posibles barreiras que xorden cando se inicia un camiño empresarial, poñendo ao seu dispor todos os medios técnicos e económicos cos que conta o Concello. A través desta ferramenta, Barbadás consolidouse como incubadora de negocios que despuntan no seu sector.

Unha das últimas empresas que se beneficiou desta iniciativa foi Sanysec, que se converteu nun referente no tratamento de humidades e que despois de tres anos trasladou as súas oficinas, deixando libre un dos niños empresariais. Unha empresa de aceites vexetais, Javier Martínez Aceites, e unha asesoría especializada no sector cultural, Xesta Asesoría, ocupan agora estes niños empresariais.

A primeira das empresas especialízase en aceites vexetais e produtos innovadores como o aceite de aguacate ou sésamo. Xesta Asesoría atende a empresas do sector musical e asociacións do ámbito cultural tradicional coa xestión de trámites administrativos.

Un custo simbólico ao mes

Os dous niños empresariais cédense inicialmente por 12 meses con posibilidade de prórroga ata 36 meses. Os beneficiarios teñen que abonar un custo simbólico ao mes, no que se inclúe mobiliario, equipos informáticos, conexión a Internet, luz, calefacción e servizo de limpeza. Tamén accederase a asesoramento e apoio do persoal técnico do CET.

O Concello ofrece unha oportunidade idónea para novos emprendedores que queren instalarse nun municipio dinámico, cunha situación territorial privilexiada e un dos motores socioeconómicos da provincia.

Ao longo deste mes de abril, o Concello de Barbadás repartirá “porta a porta” na Valenzá os materiais necesarios para o uso dos novos colectores marróns, destinados á fracción orgánica do lixo.

Foi a finais do ano pasado cando se puxo en marcha a campaña “Ti tes a chave”, que fomenta a compostaxe e a implantación do colector marrón a pé de rúa. O municipio é pioneiro na provincia en promover a recollida de materia orgánica mediante este procedemento.

Os paquetes que se reparten entre a veciñanza da Valenzá inclúen os seguintes materiais: chave de acceso ao colector para intentar limitar o uso indebido do mesmo; caldeiro para axudar a separar os residuos orgánicos; bolsas compostables, indispensables no uso do colector marrón e díptico informativo.

Para aquelas persoas que desexen participar na iniciativa e non queiran esperar a visita ou non se atopaban na casa durante a mesma, poden anotarse no programa a través de https://barbadas.rsu.gal/ e recoller os materiais na oficina da Policía Local.

Durante o pasado outono levouse a cabo unha campaña informativa coa instalación de carpas en diferentes puntos do concello A todos os veciños e veciñas que se achegaron ata elas explicóuselles que para abrir o colector marrón precísase unha chave que permitirá acceder aos colectores que estarán pechados para conseguir un reducido número de impropios que permita levar a materia orgánica a unha planta de compostaxe para convertelos en abono.

Se a primeiros deste mes de abril Barbadás se converteu nun dos epicentros das artes marciais co Campionato de Galicia individual escolar de Kung-Fu, o próximo día 20 será a halterofilia a que terá o polideportivo municipal como escenario para dar a coñecer este deporte.

A Liga de halterofilia Lift That Up naceu para asentar esta disciplina na provincia de Ourense e chegará ao concello de Barbadás con 7 equipos e un total de 35 participantes.

Trátase dunha competición que se leva a cabo por equipos mixtos de 4 integrantes e un reserva e só puntúan as 4 mellores marcas. Os puntos son normalizados para lograr a igualdade entre as marcas de mozos e mozas. Está previsto que a primeira quenda comece ás 10.00 horas e a segunda ás 12.00 horas.

A competición está organizada pola Liga de Halterofilia de Ourense, coa colaboración do Concello de Barbadás, e anímanse a todos os afeccionados a este deporte a asistir para desfrutar dunha xornada na que reinará o compañerismo.

O Concello de Barbadás, a través da Concellería de Emerxencias e Protección Civil, encargada da xestión de pragas, e en colaboración coa Tenencia de Alcaldía, vén de activar un plan de control da avespa velutina que se levará a cabo en dúas fases.

Por unha banda, nesta época de primavera colocaranse un cento de trampas con atraínte para capturar as raíñas que saen da hibernación, evitando así a proliferación de niños secundarios.

Posteriormente, a eliminación de niños terá lugar mediante previo aviso dos particulares aos números de teléfono 012 ou 112. A actuación levarase a cabo mediante o método de eliminación física do niño con spray insecticida e retirada manual, ou ben con escopeta marcadora de nova adquisición, que evitará así o gasto en aluguer de elevadores e minimizará o risco das diferentes intervencións ao non ser preciso realzar traballos en altura.

Tal e como explicou o concelleiro de Emerxencias, Daniel Rey, este novo sistema de eliminación con escopeta marcadora de aire comprimido permitirá chegar a alturas que sería imposible alcanzar sen grúa e diminuirase o risco de ataque das velutinas: “Serán os membros de Protección Civil de Barbadás os encargados de realizar a eliminación dos niños con moito menos risco para eles ao facerse con este método”.

Tamén explicou Rey que cando un niño sexa neutralizado coa escopeta quedará no mesmo punto, causando alarma entre a poboación, polo que se instalará un cartel informando de que xa se levou a cabo a actuación.

A tenente de alcalde, Victoria Morenza, subliñou a importancia de non manipular as trampas: “Colocaranse as trampas en lugares públicos nos que se detectou a presenza de avespa velutina xunto a un cartel para advertir as veciños e veciñas que non deben manipulalas”.

Charlas de sensibilización

Co fin de concienciar a poboación, o plan de control da avespa velutina inclúe a programación de charlas de sensibilización nas diferentes asociacións veciñais. Neste encontros explicarase aos veciños e veciñas, entre outras medida, como elaborar trampas artesanais para os domicilios.

Unha única rampla permitirá acceder a dúas instalacións municipais de Barbadás: o campo de fútbol dos Carrís e o polideportivo municipal. Esta infraestrutura que está a construír o Concello ten como principal obxectivo mellorar a mobilidade e a accesibilidade e as obras contan cun orzamento de 48.387 euros.

O alcalde, Xosé Carlos Valcárcel, explica así a actuación: “Trátase de habilitar un único acceso ao campo de fútbol e ao polideportivo. Haberá unha cubrición en parte desa rampla e portas de acceso para cada instalación”.

Tal e como se establece no proxecto, os traballos permitirán unificar o acceso peonil mediante a mellora do cortaventos de acceso ao complexo e a creación dunha rampla accesible exterior sobre o talud existente. A rampla construirase en tres tramos do 8% de pendente sen superar os seis metros de lonxitude para garantir a accesibilidade da mesma.

Ademais, no proxecto inclúese a climatización da zona de vestiarios aproveitando a caldeira existente para a auga das duchas e arranxaranse os problemas de humidades do inmoble. Instalarase un depósito de inercia para auga quente que subministre enerxía aos climatizadores dos distintos vestiarios, coas súas correspondentes válvulas e bombas de circulación para a instalación.

O Concello de Barbadás delega a organización das festas da Valenzá na Asociación Comisión Festas San Berbabé, que se encarga tradicionalmente dunha celebración que este ano terá lugar os dúas 7,8, 9 e 11 de xuño. Trátase da primeira vez que hai máis dun aspirante a organizar os festexos, xa que tamén se interesou unha empresa privada e un particular.

Unha vez elaborados os informes de Secretaría e da Policía Local, o executivo Local tomou a decisión de manter as festas nas mans da entidade que habitualmente as organiza, xa que ademais a súa proposta diversifica os escenarios das actividades e posibilitará que poidan desfrutalas un maior número de veciños e veciñas.

A decisión do Concello tamén se fundamenta no feito de que a lei da prioridade á organización de este tipo de celebracións por parte de colectivos veciñais. A proposta da Asociación Festas San Bernabé, que preside Manuel Martínez, non concentrará os actos nun só punto e este foi un factor decisivo que tivo en conta o executivo local.

O programa de actos comezará o día 7 ao mediodía e xa pola noite prevense actuacións musicais en varios puntos da avenida de Celanova. O día 8 a música tamén estará presente no parque da Liberdade cunha disco móbil. Ao terminar os actos relixiosos do día 9 a banda municipal de Barbadás ofrecerá un concerto na Praza Vella da Valenzá e neste mesmo punto, o día 11 haberá disco móbil durante a noite.

Entre as actividades que se programaron haberá Artilandia na avenida de Celanova, a actuación dun mago no Parque dos Patos, Festa da Escuma na Solaina, concurso de tute e torneo de fútbol sala, entre outras propostas.

Barbadás Enerxía constituíuse esta semana de forma oficial nunha aposta decidida do Concello polas enerxías renovables. Que os veciños e veciñas aforren no recibo da luz, ao mesmo tempo que se contribúe ao coidado do medio ambiente, é o obxectivo que levou ao executivo local a liderar esta comunidade enerxética. Os estatutos desta entidade aprobáronse esta semana nunha reunión á que asistiron unha trintena de persoas, ademais dos técnicos e asesores. Nesta mesma reunión quedou constituída a Xunta Directiva, que está integrada por 7 persoas.

Un total de 24 instalacións municipais foron analizadas para poñer en marcha o proxecto de Barbadás Enerxía. Unha vez realizado o estudio decidiuse levar a cabo a instalación de paneis solares na pista polideportiva cuberta de Sobrado do Bispo, xa que conta con maior capacidade. As placas fotovoltaicas darán servizo á poboación que resida nun radio de 2 quilómetros, é dicir, a esta localidade e a unha parte de Bentraces e Barbadás.

Debido a que nesta instalación de Sobrado do Bispo apenas se rexistra consumo eléctrico, o excedente pasaría a ser utilizado polas persoas que forman parte da comunidade enerxética. O custe de poñer en marcha esta instalación fotovoltaica ronda os 200.000 euros e levarase a cabo con cargo á subvención do Fondo de Cooperación Local da Xunta de Galicia.

Os beneficiarios recibirán a enerxía directamente, previa comunicación á empresa que factura, que reducirá a parte proporcional que se consume co sobrante da instalación. A constitución da comunidade enerxética é un gran avance para fomentar o uso das enerxías renovables e reducir os custos á poboación.

A tenente de alcalde, Victoria Morenza, asegura que para o Concello de Barbadás a constitución desta comunidade é un impulso a prol das enerxías renovables, da eficiencia enerxética e o coidado do medioambiente.

O Concello demostra así o seu compromiso por proporcionar un maior benestar e calidade de vida aos seus cidadáns, ao tempo que fomenta a sostibilidade e a eficiencia enerxética.

Que os veciños e veciñas aforren no recibo da luz ao mesmo tempo que se promoven as enerxías renovables de cara a un futuro máis sostible. Este é obxectivo de Barbadás Enerxía, que se constituirá a próxima semana e demostra o compromiso do Concello de proporcionar un maior benestar e calidade de vida aos seus cidadáns, ao tempo que fomenta a sostibilidade e a eficiencia enerxética.

A constitución oficial de Barbadás Enerxía terá lugar o 3 de abril ás 18.00 horas na Casa Consistorial e a iniciativa, inspirada no modelo de Comunidade Enerxética presentado anteriormente, representa un avance significativo na procura de solucións enerxéticas sostibles e accesibles para os cidadáns de Barbadás.

A asociación “Barbadás Enerxía” ten como obxectivo principal promover o uso de enerxías renovables e sostibles na comunidade, co fin de reducir os custos de enerxía e contribuír ao coidado do medio ambiente.

Durante a reunión de constitución, presentarase un plan detallado sobre como a asociación “Barbadás Enerxía” levará a cabo as súas actividades, así como as oportunidades de participación para os residentes locais. Invítase a todos os asistentes a compartir ideas e contribuír ao éxito desta iniciativa comunitaria.

Para máis información e confirmación de asistencia, os interesados poden chamar ao teléfono 988 360 000 ou enviar un correo a concello@barbadas.es

Os nenos e nenas de Barbadás deron hoxe unha lección de educación ambiental aos maiores. O alumnado dos CEIP O Ruxidoiro e Filomena Dato conmemoraron o Día da Árbore coa plantación dunha trintena de exemplares no parque da Solaina e no entorno de Vilaescusa. Foi unha clase ao aire libre, unha xornada de convivencia e concienciación sobre a necesidade de coidar o medioambiente.

No Parque da Solaina os escolares plantaron unha ducia de magnolias, tilos e érbedos. No entorno de Vilaescusa crecerán, grazas a esta actividade de concienciación ambiental, unha vintena de vimbios e bidueiros. Os nenos e nenos aprenderon a preparar a terra para plantar as árbores e a protexelas e coidalas.

A tenente de alcalde, Victoria Morenza, explicou que se elixiron o Parque da Solaina e o entorno de Vilaescusa “porque son zonas de lecer e punto de entorno cada día para decenas de nenos e nenas”. Insistiu en que a actividade “pretende involucrar ao alumnado no coidado das árbores e da natureza”.

A concelleira de Educación, Marga Pérez, afirmou que “hoxe é un día moi especial na que os nenos e nenas dos colexios de Barbadás participan nunha actividade de contacto coa natureza plantando árbores que irán medrando con eles, que deberán coidar e que dentro duns anos lles darán sombra”.

Día da Poesía

Hoxe, 21 de marzo, coincidiu a celebración do Día da Árbore e o Día da Poesía e os escolares de Barbadás tamén quixeron celebrar esta data. Os alumnos e alumnas compuxeron distintos versos que escribiron en papeliños e estes repartíronse polas cafeterías da avenida de Celanova. Cada café que se serviu esta mañá estivo acompañado de poesía.

O Paseo dos Amieiros da Valenzá, unha zona en constante crecemento de poboación, contará cunha pista multideporte ao aire libre. As instalacións, cunha superficie de 832 metros cadrados, ofrecerán á mocidade un espazo de ocio seguro e comunicado coa zona verde do paseo fluvial.

As obras, cun orzamento de 83.621 euros, avanzan a bo ritmo e hoxe mesmo procedeuse a cubrir con formigón. A actuación permitirá á mocidade practicar deporte sen ocasionar molestias ao resto dos cidadáns, xa que as instalacións presentan unhas características adecuadas dende o punto de vista da seguridade e da idoneidade das estruturas.

Tal e como se especifica no proxecto, á pista multideporte accederase dende o Paseo dos Amieiros e nesta construirase unha cancha de baloncesto 3×3 e un circuíto de calistenia. O espazo deportivo configurarase coas dimensións de 29×15 metros, coa instalacións de dúas porterías. Sinalizarase a pista para a práctica de diferentes deportes.

A cancha de baloncesto ocupará 15×15 metros, coa instalación de 3 canastras e cumprirá coas medidas regulamentarias de 3×3. O circuíto de calistenia estará composto por unha estrutura que permitirá adestramentos de forza baseados en exercicios que empregan o propio peso corporal. Ademais disporase dunha zona de sombra natural con bancos para o descanso.

A tenente de alcalde, Victoria Morenza, subliña a relevancia desta actuación, “que supón habilitar nunha zona verde un lugar para o ocio deportivo que xa viña reclamando a mocidade de Barbadás dende hai tempo”. Morenza explica que se trata dunha zona moi accesible, nun fermoso entorno ao carón do río e con espazos para o aparcamento.

Que Carmen Martín Gaite, escritora universal, gañadora do premio Príncipe de Asturias e unha das plumas máis recoñecidas en lingua española, teña o lugar que se merece en Barbadás. Este é o obxectivo que levou ao Concello a elaborar un proxecto que erixirá a Piñor na capital do universo literario e vital da escritora. A iniciativa xa conta co respaldo do Ministerio de Cultura.

O alcalde de Barbadás, Xosé Carlos Valcárcel; a tenente de alcalde, Victoria Morenza, e a concelleira de Cultura, Ana Belén Peleteiro, reuníronse esta mesma semana co secretario de Estado de Cultura, Jordi Martí, e a directora xeral do Libro, María José Gálvez. O encontro foi moi positivo, xa que o Ministerio manifestou a súa aposta por ensalzar a figura de Martín Gaite, especialmente no seu centenario, e con San Lourenzo de Piñor como epicentro.

A través de subvencións e convenios de colaboración levaríanse a cabo as seguintes actuacións: Creación dun cómic divulgativo sobre a infancia de Carmen Martín Gaite en Piñor; elaboración das unidades pedagóxicas “Piñor, o nacemento dunha escritora”; organización dunha exposición itinerante exterior e a elaboración de recursos divulgativos do espazo de recepción cun holograma no centro social do campo de Roma para contextualizar ao visitante na singularidade de Piñor na vida e obra da autora. Tamén recursos dixitais, visitas guiadas e de escolares, entre outras propostas.

No encontro, o rexedor insistiu en que “se trata dunha aposta pola cultura e por unha autora universal e feminista que foi traducida a múltiples idiomas, tendo en conta que plasmou as vivencias da súa infancia en Piñor”.

A tenente de alcalde e impulsora deste proxecto para ensalzar á escritora que cobra forza co apoio do Ministerio de Cultura, Victoria Morenza, asegurou que “dende o Ministerio mostráronse moi receptivos para colaborar con esta iniciativa do Concello de Barbadás e seguiremos traballando para que no seu centenario Carmen Martín Gaite sexa homenaxeada como merece ”.

Roteiros e cursos literarios

Paralelamente, o Concello de Barbadás sumará esforzos coa UNED para realizar roteiros e cursos literarios que erixirán a Piñor na capital do universo vital e literario dunha escritora universal e unha das plumas más recoñecidas en lingua española e, ao tempo, máis descoñecida en Ourense pese aos seus estreitos vínculos con Piñor, un lugar que ocupa un lugar central na súa vida e na súa literatura.

O segundo xoves de cada mes de marzo conmemórase o Día Mundial do Ril e coincidindo coa proximidade desta data presentouse esta mañá na Casa Consistorial de Barbadás o Festival Solidario a favor da Asociación para a Loita Contra as Enfermidades Renais (Alcer). Ao acto asistiron o alcalde, Xosé Carlos Valcárcel; a concelleira de Educación, Marga Pérez; o presidente de Alcer, Miguel Ángel Quintas; a coordinadora de Alcer, Carmen Dorado, e o director da Edcola de Música de Barbadás, Xohan Manuel Xil Páxaro.

O evento terá lugar este sábado, a partir das 19.00 horas, no Auditorio do Conservatorio de Música Profesional de Ourense. Máis dun cento de alumnos e alumnas da Escola de Música Municipal de Barbadás demostrarán o seu talento.

As entradas para asistir ao Festival Solidario a favor de Alcer poden retirarse no punto de información do centro comercial Ponte Vella por un importe de 5 euros. Aquelas persoas que queiran colaborar poderán facelo a través dunha transferencia e contarase cunha fila 0.

O alcalde, Xosé Carlos Valcárcel, insistiu na importancia de dar visibilidade ás asociacións que loitan polos enfermos e destacou o traballo que realizan en Alcer Ourense: “Foi pioneira en dar visibilidade a este tipo de enfermidades e na creación do movemento asociativo no ámbito da saúde. Deron impulso a outros colectivos para que comezasen a traballar en favor dos enfermos de diversas patoloxías”. O rexedor tamén insistiu na necesidade de transmitir os valores da solidariedade e a empatía con este tipo de iniciativas.

Precisamente para transmitir os valores da solidariedade naceu este festival solidario hai xa 9 anos e así o lembrou a concelleira de Educación, Marga Pérez, destacando o traballo de Alcer Ourense: “Leva dende 1981 axudando ás persoas con insuficiencia renal crónica. Fan un gran traballo e queremos insistir na importancia de doar órganos, porque non hai un acto de maior xenerosidade”.

O presidente desta asociación, Miguel Ángel Quintas, agradeceu ao concello a posibilidade de dar a coñecer a enfermidade renal, “que é unha gran descoñecida e é moi necesario normalizala para que os enfermos poidan facer unha vida o máis normal posible”.

O comercio local de Barbadás demostrará todo o seu potencial na Campaña do Día do Pai, na que participan unha vintena de establecementos ofrecendo produtos de gran variade e idóneos para regalar nestas datas. Así o destacou a concelleira de Comercio, Marga Pérez, no acto de presentación desta campaña que se estenderá dende hoxe ata o 19 de marzo e que repartirá 6 bonos de compra de 50 euros entre a clientela.

A concelleira animou a toda a cidadanía a participar nesta iniciativa que pretende dinamizar o sector: “Invitamos a mercar no comercio local  de Barbadás a todos os veciños e veciñas, tamén aos de concellos próximos, xa que os negocios ofertan unha gran variedade de propostas de calidade”.

Por cada 20 euros de compra os clientes recibirán unha papeleta que deberán completar cos seus datos persoais e que será introducida na urna. En cada sorteo serán os nenos e nenas que participen nos obradoiros e na animación os que escollan as  papeletas premiadas.

Na Campaña do Día do Pai de Barbadás participan os seguintes establecementos: Más que un Sueño, Galiwork, Y yo con estos pelos, Elma, Toffee Glass, Tapería Vely, MyS Lencería, La Cigüeña, Calzados Zocos, Gaia Contigo, Oren Óptica, Tapería Tarona, Ohana Baby&Deco, Esencia Zen, Ethan Estilismo, Wakanda Tapería, Bel, Libería Carlin, Donicela e Librería Moraima.

Unha aposta polo asociacionismo

O comercio representa unha gran aportación á economía de Barbadás e así o subliñou o alcalde, Xosé Carlos Valcárcel, animando aos comerciantes a unirse para ser así máis fortes: “O comercio deste concello é de gran calidade e serve para atraer poboación, por iso convido aos negocios a que aposten polo asociacionismo, para seguir mellorando e para achegarse á veciñanza e a outros mercados”. Tamén insistiu o rexedor na importancia da formación que ofrece o Concello aos comerciantes para favorecer a súa incorporación ao mundo virtual.

Como todos os anos, o Concello de Barbadás, súmase á conmemoración do 8M – Día Internacional das Mulleres, reafirmando o seu compromiso coa igualdade de xénero en todos os espazos da vida política e social local.

Dende o Concello de Barbadás asumimos a necesidade de avanzar cara unha representación paritaria de mulleres e homes nas corporacións locais e así o levamos á práctica na realidade do nosos concello. En xeral, na política local estanse a dar pasos importantes como é ter pasado nos últimos vinte anos de dezaoito a sesenta alcaldesas no ano 2023, o que supón o 22% dos concellos galegos. No caso das concelleiras, a presenza das mulleres ascende ao 40%. Estes avances non son suficientes e estas cifras teñen que seguir medrando xa que os datos reflicten que, aínda que se están dando importantes pasos nos liderados femininos, as mulleres seguen estando infrarrepresentadas nos espazos máis importantes de toma de decisións do eido local e, polo tanto, os espazos políticos en xeral seguen estando moi masculinizados.

Aínda que recoñecemos os avances, queda moita labor que desenvolver ata conseguir que a sociedade sexa un espazo onde a igualdade sexa unha realidade polo q é preciso abordar tanto as barreiras estruturais  como as actitudes e percepcións que perpetúan a discriminación e garantir que todas as persoas accedan ás mesmas oportunidades.

O compromiso do Concello de Barbadás pasa pola promoción da participación das mulleres na vida política e social local, mediante accións de sensibilización, capacitación e fomento do liderado feminino e, por suposto, pola incorporación da perspectiva de xénero de forma transversal en todas as nosas políticas, garantindo que se tomen en conta as necesidades e a realidade específicas das mulleres e das nenas nas nosas accións, pola aplicación de medidas para garantir a igualdade salarial e de oportunidades no emprego promovendo a participación equitativa de mulleres en todos os niveis e sectores sociais.

Consideramos imprescindible seguir impulsando campañas de prevención e sensibilización contra a violencia de xénero, e a través do CIM, como recurso específico do Concello de Barbadás para a promoción da igualdade e a loita fonte a violencia de xénero, continuar dando apoio integral ás mulleres vítimas e traballando na erradicación da violencia machista, xa que esta é a expresión máis miserable da desigualdade de xénero.

Dende o Concello de Barbadás amosamos o noso firme compromiso coa igualdade, a través do deseño, elaboración e apoio de todas as políticas públicas necesarias para mellorar a vida das mulleres do noso concello. Debemos seguir traballando na consolidación dos avances sociais en materia de igualdade tendo como horizonte unha sociedade máis feminista, xusta e igualitaria.

Barbadás rompeu o seu teito de poboación no 2023, acadando un total de 11.171 habitantes, a cifra máis alta dende que se rexistran no Instituto Nacional de Estatística. Este dato non sería unha realidade sen o esforzo do goberno local por implantar políticas sociais, de conciliación, deportivas e culturais. Os novos veciños e veciñas de menor idade son obxecto dunha benvida especial e así onte foron recibidos na Biblioteca Municipal os 13 nenos de 0 a 3 anos empadroados no concello dende o mes de xaneiro. A iniciativa repetirase cada dous meses.

O alcalde, Xosé Carlos Valcárcel, e a concelleira de Educación, Marga Pérez, recibiron aos cativos e cativas e entregáronlles unha caixa con agasallos de benvida que inclúe contos, entre outros agasallos, e a folla de inscrición como novo socio da biblioteca. Tamén explicaron ás familias que a iniciativa desenvólvese dende o ano pasado co obxectivo de fomentar o empadroamento en Barbadás e inculcar a paixón pola lectura entre os máis pequenos. O comercio local tamén colabora ofrecendo descontos especiais aos novos veciños e veciñas.

Preto de medio cento de caixas repartidas dende o 2023

“Os pés máis pequenos fan a pegada máis grande nos nosos corazóns. Benvido ao noso pequeno fogar”. Este é a mensaxe de benvida das caixas que o Concello de Barbadás entrega aos nenos e nenas empadroados de entre 0 e 3 anos. Dende o 2023 repartíronse case medio cento destas caixas coa que o Concello tamén fai unha aposta decidida para fomentar a lectura entre os máis novos e achegar a biblioteca a todos os fogares.

As axudas do Concello de Barbadás, a Xunta de Galicia e o Goberno Central ao transporte metropolitano contribuíron a que se producirse un aumento significativo do número de viaxes e usuarios e así se reflexa en cifras. Os descontos implantáronse en setembro de 2022 e neste ano contabilizáronse 215.492 viaxes nas liñas de autobús da zona, ascendendo o número a 308.355 no pasado ano 2023, o que supón un incremento de case 100.000 con relación ao anterior. O Concello de Barbadás, pola súa parte, bonifica este transporte co método actual desde o ano 2020. Sumadas todas (Concello, Xunta e Ministerio), a porcentaxe do billete subvencionada oscila para a veciñanza de Barbadás entre o 87 e o 100%.

Os datos déronse a coñecer esta tarde por parte da concelleira de Mobilidade e tenente alcalde, Victoria Morenza, no pleno que celebrou a Corporación de Barbadás e con motivo da moción presentada por Partido Galego para reclamar a inmediata posta en marcha do transporte metropolitano. A proposta aprobouse co voto a favor de todos os partidos, a excepción do PP.

O goberno local de Barbadás leva anos reclamando este servizo e hai seis anos que se aprobaron nun pleno extraordinario as ordenanzas que esixiu a Xunta de Galicia para instaurar o transporte metropolitano, se ben a día de hoxe non se deron pasos en firme para facer realidade esta demanda histórica dos veciños e veciñas. Así se lle trasladou ao delegado do Goberno en Galicia, Pedro Blanco, que visitou o concello a pasada semana e mostrou todo o seu apoio para lograr esta reivindicación.

Cómpre lembrar que o Concello de Barbadás gasta 100.000 euros ao ano en bonificacións para o transporte en autobús. En concreto, existe unha bonificación xeral do 37%, ao 55 % no caso dos estudantes e ao 48% para os pensionistas. A viaxe é gratuíta para as persoas en risco de exclusión social.

Na sesión plenaria tamén se trataron outros asuntos. Por unanimidade aprobouse a creación e licitación dunha praza de taxi adaptado. Tamén co apoio de todos os grupos aprobouse a moción do BNG en apoio ás reivindicacións dos colectivos feministas con motivo da celebración do 8M.

A concelleira de Igualdade, Elisabeth González, explicou que se está a traballar dende todas as áreas de goberno e con todas as políticas municipais a favor da igualdade. O Concello organizou, entre outras propostas, un programa de actos para conmemorar o Día da Muller que se estenderá ata o mes de maio e que incluirá un ciclo de educación afectivo-sexual. Tamén se celebrará a primeira edición da Carreira pola Igualdade de Barbadás.

Tamén se debateu unha proposta do PP en apoio aos agricultores e gandeiros españois. Votou a favor o Partido Popular, mentres que o BNG e Partido Galego abstivéronse e PSOE e Democracia Ourensana votaron en contra. O alcalde, Xosé Carlos Valcárcel, lamentou que “o noso país é unha potencia agroalimentaria, pero a agroindustria segue a sumar beneficios que non repercuten no produtor”. O rexedor culpou ao PP de “votar en Bruxelas uns argumentos que defenden aquí e lamentou que “as multinacionais esquilmen aos produtores”.

A primeira edición da Carreira pola Igualdade de Barbadás xa suma preto de 300 inscritos. A iniciativa, que terá carácter reivindicativo e solidario, foi presentada esta mañá no Polideportivo Municipal nun acto ao que asistiu o alcalde, Xosé Carlos Valcárcel; a tenente de alcalde, Victoria Morenza; a concelleira de Igualdade, Elisabeth González; o concelleiro de Deportes, Cristian Rodríguez; a concelleira de Cultura, Marga Pérez; o concelleiro de Emerxencias, Daniel Rey; a presidenta do Club A Cabra Tira ó Monte, Silvia Arce, e o coordinador do polideportivo municipal, Diego López.

A competición, que será o acto principal da programación do 8M, reivindicará a igualdade e contribuirá a axudar ás persoas máis necesitadas, xa que a recadación das inscricións doarase ao Banco de Alimentos. Debido ao gran éxito de participación, ampliouse o prazo de inscrición e os interesados poderán anotarse ata mañá á noite.

A Carreira pola Igualdade de Barbadás celebrarase o sábado 9 de marzo e sairá ás 11.00 horas do polideportivo municipal, pasando pola avenida de Celanova para rematar no Parque da Liberdade nun percorrido de 4 quilómetros. Na proba poderán participar todas aquelas mulleres, homes, nenas e nenos que o desexen e o percorrido poderá realizarse camiñando, correndo, en cadeira de rodas, andador, bicicleta, patíns ou patinetes.

Fernando González, veciño de Barbadás diagnosticado cun mieloma múltiple (cáncer de sangre) e que protagoniza unha gran historia de superación, será o encargado de abrir a carreira nunha bicicleta adaptada xunto a olímpica Adiaratou Iglesias. A cantante Carolina Rubirosa, que reivindica a igualdade nas súas cancións, tamén asistirá e ofrecerá, xa pola tarde, un concerto na Casa da Cultura.

O alcalde, Xosé Carlos Valcárcel, insiste na importancia desta iniciativa para reivindicar a igualdade en todos os ámbitos e, especialmente, no que se refire ás competicións deportivas, destacando os éxitos recentes de deportistas como Ana Peleteiro ou as futbolistas da Selección Española. “A muller debe participar en igualdade en todas as competicións deportivas. Esta será unha xornada para reivindicalo e tamén para mostrar a nosa solidariedade, xa que a recadación das inscricións destinarase ao Banco de Alimentos”.

A concelleira de Igualdade, Elisabeth González, insistiu en que con esta iniciativa preténdese fomentar a participación das mulleres no deporte e agradeceu a implicación “de todos aqueles traballadores do Concello e aos voluntarios e  voluntarias que dende o primeiro momento puxeron ao noso dispor a vontade e o esforzo para sacar a carreira adiante”.

O concelleiro de Deportes, Cristian Rodríguez, subliñou que non se trata de competir, xa que non é  unha proba deportiva senón unha carreira reivindicativa polo 8M. “Non haberá dorsal, nin cronometraxe, nin clasificacións, un dos obxectivos da carreira é que todos os participantes poidan facer a proba xuntos”, engadiu.

Os patrocinadores desta Carreira pola Igualdade de Barbadás son CIE Galfor, Jofisa, Inorde, Frutas Josefa, Hípica Celta, Panadería Alento, Papelga, Carnes Marabú e Froiz.

A programación do 8M estenderse en Barbadás durante tres meses. Así, para o 8 de marzo organizouse un recital de poesía na Casa da Cultura Manuel María, a partir das 20.00 horas. O día 9 de marzo, a partir das 20.00 horas, Carolina Rubirosa ofrecerá un concerto na Casa da Cultura. Para os meses de abril e maio organizouse un ciclo de educación afectivo-sexual que se levará a cabo nos colexios O Ruxidoiro, Filomena Dato, Luis Vives e no IES Ferro Couselo.

A programación do 8-M de Barbadás estenderase máis alá do mes de marzo. O Concello elaborou un completo programa de actividades que comezará o propio Día da Muller, o venres 8 de marzo, cando se ofrecerá un recital poético-musical a cargo da actriz Lucía Álvarez (voz) e José Luis Troitiña (guitarra). A través desta iniciativa farase un percorrido literario pola poesía galega, destacando obras de autoras como Paula Vázquez, Chus Pato ou Aba Cid, entre outras. Será ás 20.00 horas na Casa da Cultura Manuel María.

A Carreira pola Igualdade de Barbadás será o acto principal do programa e celebrarase o sábado 9 de marzo, con saída ás 11.00 horas do polideportivo municipal, pasando pola avenida de Celanova para rematar no Parque da Liberdade. Na proba, de 5 quilómetros, poderán participar todas aquelas mulleres, homes, nenas e nenos que o desexen e o percorrido poderá realizarse camiñando, correndo, en cadeira de rodas, andador, bicicleta, patíns ou patinetes.  Carolina Rubirosa, que reivindica a igualdade nas súas cancións, ofrecerá un concerto ás 20.00 horas na Casa da Cultura.

Para concienciar aos máis novos na loita pola igualdade organizouse, para os meses de abril e maio, un ciclo de educación afectivo-sexual nos centros de referencia do concello: CEIP Filomena Dato, CEIP O Ruxidoiro, IES Ferro Couselo e CPR Luis Vives. A concelleira de Igualdade, Elisabeth González, asegurou que “o traballo cos colexios e coa mocidade é imprescindible nesta loita” e animou a toda a veciñanza a participar no programa de actividades. Tamén insistiu en que “só coa implicación de todos e todas poderemos conseguir a igualdade plena”.

O alcalde de Barbadás, Xosé Carlos Valcárcel, subliñou o feito de que a programación elaborada polo Concello se estenda máis aló do 8M e que abranga os ámbitos culturais, deportivos e educativos. O rexedor segurou que a sociedade debe seguir reivindicando os dereitos das mulleres: “Hai que dar máis pasos en favor da igualdade, a loita debe ser ardua e continuada”. Tamén lamentou o retroceso en materia de igualdade que moitos países están levando a cabo despois de anos de loita.

Seis anos pasaron xa dende que o Concello de Barbadás aprobou nun pleno extraordinario as ordenanzas que esixiu a Xunta de Galicia para instaurar o transporte metropolitano sen que se deran pasos en firme para facer realidade esta demanda histórica dos veciños e veciñas. Así o trasladou esta mañá o alcalde, Xosé Carlos Valcárcel, nunha reunión mantida co delegado do Goberno en Galicia, Pedro Blanco, que deu todo o seu apoio a Barbadás e instou á Xunta de Galicia a cumprir “co seu compromiso cos ourensáns”. Ao encontro tamén asistiron o subdelegado do Goberno en Ourense, Emilio González; a tenente de alcalde, Victoria Morenza, e o concelleiro de Promoción Económica, José Manuel Morgade.

O rexedor agradeceu a visita do delegado do Goberno en Galicia, a segunda dende o mes de outubro, e o seu apoio para que o transporte metropolitano chegue a Barbadás: “Este servizo existe no resto de cidades pero a Xunta de Galicia ten a Ourense abandonada e mentres tanto o Concello de Barbadás gasta 100.000 euros ao ano en bonificacións para o transporte en autobús”.

Referiuse o alcalde á bonificación xeral do 37%, ao 55 % no caso dos estudantes e ao 48% para os pensionistas. A viaxe é gratuíta para as persoas en risco de exclusión social. “Esta comarca move 150.000 veciños e estamos abandonados pola Xunta de Galicia. Esiximos que dunha vez por todas nos dean unha solución definitiva. Esiximos que o novo Goberno autonómico se poña a traballar urxentemente para desbloquear esta situación”, engadiu Xosé Carlos Válcárcel. Crecemento económico, mellora da mobilidade ou o asentamento da poboación son só algunhas das vantaxes que o alcalde asegurou que tería a posta en marcha do servizo.

Pola súa banda, o delegado do Goberno en Galicia, Pedro Blanco, reclamou á Xunta de Galicia “que cumpra cos seus compromisos coa provincia de Ourense e desenvolva “un transporte metropolitano do século XXI que dea servizo ás necesidades reais da poboación”. Tamén destacou os 23 millóns de euros investidos polo Goberno para os descontos no bus metropolitano e lamentou “que a Xunta de Galicia llos negue aos ourensáns”. Insistiu en que “Barbadás forma parte dunha área metropolitana cunha gran demanda histórica, polo que pedimos á Xunta que cumpra os seus compromisos con Ourense e permita aos veciños de Barbadás e da área metropolitana contar cun servizo moi demandado”.

A obesidade é unhas das principais preocupacións da Organización Mundial da Saúde e o Concello de Barbadás tamén quere alertar á poboación sobre os riscos desta enfermidade. O 4 de marzo conmemórase do Día Mundial contra a Obesidade e, en colaboración co Servizo Galego de Saúde, ofrecerase un programa de actividades que pretende concienciar á cidadanía. “Coida os teus hábitos porque converteranse no teu destino” é o lema desta iniciativa.

Está previsto que ás 12.30 horas se leve a cabo unha andaina de 4 quilómetros pola contorna do polideportivo municipal de Barbadás. Previamente, tamén nestas instalacións deportivas, ofrecerase unha charla de concienciación sobre as consecuencias da obesidade a cargo do nutricionista Ricardo de la Fuente Cid.

O compromiso do Concello de Barbadás coa saúde dos seus veciños e veciñas queda patente cada ano con diferentes iniciativas como o Paseo da Saúde, ao que se uniron na súa última edición unha vintena de asociacións para dar a coñecer o seu traballo a favor dos enfermos de diferentes patoloxías. O pasado mes de setembro, o Paseo da Saúde de Barbadás reuniu a representantes de Afaor, Alcer, Auria, AECC, Aodemper, Por Eles TEA, Affou, Accu, Querendo, Autismo Ourense, Asociación de Celíacos de Galicia, Renacer, AFEM-Morea, Aseia Galicia e Fundación Neuroburgas.

O parque empresarial de Barbadás terá unha situación privilexiada que o converterá en reclamo para as empresas. Emprazarase ao carón da estrada OU-540, a escasos dous quilómetros da autovía e a só dúas horas de Madrid e este valor engadido trasladouse esta mañá á xerente de Suelo Empresarial del Atlántico (SEA), Beatriz Sestayo, que mantivo unha reunión na Casa Consistorial co alcalde, Xosé Carlos Valcárcel; coa tenente de alcalde, Victoria Morenza; e co concelleiro de Promoción Económica, José Manuel Morgade. Seguidamente, trasladáronse a visitar os terreos nos que se plantexa a construción do polígono.

Ademais das súas boas comunicacións, o Concello de Barbadás conta cun Plan de Urbanismo con solo dispoñible e traballarase con SEA para dar impulso a un parque industrial moi demandado e que dinamizará a economía da zona. A reunión que se celebrou esta mañá puxo en valor a actuación e así o explicou o alcalde, Xosé Carlos Valcárcel: “Con este encontro damos un paso adiante no proxecto para a construción deste polígono, que revalorizará Barbadás a nivel empresarial e reforzará a súa actividade económica”. O rexedor tamén insistiu na situación estratéxica na que se emprazarán as instalacións, moi demandadas polo sector empresarial.

Neste mesma liña pronunciouse o concelleiro de Promoción Económica, José Manuel Morgade: “Seguiremos traballando para facer realidade este proxecto do parque industrial de Barbadás, que regularizará a situación das empresas da zona e xerará solo industrial no que poderán instalarse novas firmas que dinamizarán a economía da zona”.

Espazos verdes de uso público

Tal e como se contempla no proxecto para a construción do parque empresarial, o acceso emprazarase ao sureste, nas proximidades do enlace existente da estrada OU-540 coa vía municipal. Para facilitar a mobilidade permitindo os xiros á esquerda, este enlace transformarase nunha glorieta que permitirá o acceso ao polígono. Os percorridos organizaranse, por un lado, a través da vía municipal norte e a través da vía de servizo da estrada autonómica, que se transforma nunha vía de dobre sentido.

Está previsto reservar máis dun 20 % da superficie para espazos verdes de uso público, preservando os fragmentos de frondosas existentes. Os espazos libres localízanse en dúas zonas: unha zona verde no sureste, no entorno do río. Coa vexetación da zona verde crearase unha barreira visual dende o enlace da estrada autonómica. A outra zona verde, de maior superficie, sitúase na zona noroeste. Esta última percorre todo o perímetro e este localízase nas zonas máis elevadas e con maior vexetación autóctona co fin de preservala. Conectarase coa nova vía a través de percorridos peonís.

O Concello de Barbadás premia a paixón pola lectura. Coincidindo coa celebración do Día de Rosalía de Castro, este venres 23 de febreiro, recoñecerase aos grandes lectores e lectoras da Biblioteca Municipal. Neste centro cultural desenvolverase a programación para homenaxear á poetisa galega e aquelas persoas que solicitasen máis préstamos de exemplares durante o 2023 recibirán un lote de libros, entre outros agasallos. Establécense as categorías de infantil, xuvenil e adulto.

A concelleira de Educación, Marga Pérez, asegura que o obxectivo deste recoñecemento aos grandes lectores e lectoras “é contaxiar a paixón pola lectura a todos os veciños e veciñas e animar á cidadanía a coñecer a nosa Biblioteca”.

A programación para conmemorar o Día de Rosalía de Castro arrancará mañá ás 19.00 horas coa lectura do manifesto da Asociación de Escritoras e Escritores en Lingua Galega. Seguidamente, realizarase unha lectura da obra da poetisa e procederase á entrega dos agasallos aos grandes lectores e lectoras. Tamén haberá música ao vivo.

Ademais, o Concello de Barbadás quere recoñecer o esforzo do Club de Lectura Café con Letras, formado por unha vintena de persoas e co que se colabora con exemplares destinados a completar o seu fondo de libros.

O Concello quere, un ano máis, conmemorar o Día de Rosalía de Castro, unha das datas máis sinaladas do calendario cultural galego. Ante o descoñecemento do día exacto do nacemento da escritora celebrábase o 24 de febreiro, se ben a efeméride adiantouse ao 23 de febreiro pola aparición de novos datos sobre a data do seu nacemento.

Humanizar as beirarrúas da Valenzá, eliminado os obstáculos que dificultan a circulación dos peóns é o obxectivo que levou ao Concello de Barbadás a activar un plan de obras nunha superficie de máis de 1.800 metros cadrados. Os traballos arrancaron nestes días nas rúas Areal e Bahamonde, despois de finalizar en outras zonas como Carrís e Picouto. O orzamento desta actuación ascende a un total de 65.764 euros.

As obras teñen como finalidade solucionar os problemas de pendente en moitas das rúas. Adecuaranse as beirarrúas destas vías para que sexa viable o paso de carriños de bebés ou de compra e persoas con mobilidade reducida, eliminando na medida do posible todos aqueles elementos que interrompen a circulación.

As dificultades foron resoltas nalgúns puntos, tanto polo Concello de Barbadás como por parte dos propietarios de locais e solares, pero algúns obstáculos como chanzos dificultan o paso dos peóns. Trátase de dar unha solución eficiente aos obstáculos, eliminando chanzos e dando continuidade á beirarrúas sen que se produzan cambios bruscos de pendentes.

Np proxecto inclúense tamén reparacións en puntos nos que as baldosas están deterioradas e a reparación e perfilado de acabados en arquetas que poderían causar caídas. Con este plan, que agora entra nunha nova fase nas rúas Areal e Bahamonde, o Concello de Barbadás pretende mellorar a mobilidade na Valenzá, en zonas moi transitadas e onde os peóns atopan obstáculos a diario.

A concelleira de Obras, Victoria Morenza, asegura que esta actuación “vai supoñer unha mellora considerable na accesibilidade nunha das zonas máis transitadas da Valenzá e nun dos barrios máis antigos do núcleo”. Ademais, explica que tamén se aproveitará a obra para cambiar a tubaxe nunha vía na que os veciños e veciñas sufrían avarías con frecuencia e cortes de auga.

Que os veciños, veciñas e visitantes que circulan pola OU-518, que comunica A Valenzá co resto do municipio, sexan recibidos como se merecen e cunha imaxe á altura do que representa Barbadás tanto a nivel provincial como galego, sendo unha das vilas máis puxantes da comunidade. Este é o obxectivo que levou ao Concello de Barbadás a elaborar un proxecto que mellorará a zona axardinada baixo o viaduto e que actualmente se encontra recuberto de grava, con plantas de temporada en mal estado. As letras de aceiro lacado en gris escuro co nome da Valenzá tamén se atopan deterioradas e con esta intervención daráselle máis protagonismo e visibilidade.

Tal e como se especifica no proxecto, a zona na que se actuará ten un sistema de rego por goteo e pequenas contencións de grava mediante elementos travesaños de madeira en mal estado e descolocados debido á presión da grava e á pendente. As actuacións previstas para mellorar o recinto son as seguintes:

-Retirada das letras existentes sobre o muro.

-Roce do terreo.

-Nivelación en dúas bancadas con contención de muro de bloque armado e chapa de aceiro. Debido á excesiva pendente e aos problemas que suporía para o mantemento da herba, crearanse dúas bancadas dunha altura máxima de 65 centímetro e unha lonxitude de 28 metros.

-Substitución do sistema de rego por goteo a sistema con aspersores.

-Colocación das letras existentes lacadas e soldadas a caixóns metálicos en cor granate.

-Plantación de céspede.

-Traballos de poda e xardinería con plantación de lavanda.

Cómpre destacar que o espazo sobre o que se actuará é moi visible, especialmente polo tráfico rodado da vía OU-518, que comunica A Valenzá co resto do municipio, así como a vía principal de acceso ao concello.

A concelleira de Obras, Victoria Morenza, destaca a importancia desta actuación, “que contribuirá a mellorar o entorno e a ofrecer unha nova zona verde á veciñanza nunha zona degradada moi transitada pola comunidade escolar, moi próxima á CEIP O Ruxidoiro e ao Parque da Liberdade e da Solaina” .

O alcalde de Barbadás, Xosé Carlos Valcárcel, asegura que esta actuación segue a liña doutras xa rematadas como a creación da pista da skate e a mellora do baixo viaduto. “Con estes traballos faremos máis habitable a vila da Valenzá”, engadiu o rexedor.

O Gran Desfile de Entroido de Barbadás gaña en espectacularidade cada ano que pasa e o Concello quere premiar o esforzo de todos os participantes repartindo 6.000 euros entre os gañadores. Unha vintena de comparsas e carrozas e preto dun millar de persoas desfilaron pola avenida de Celanova o pasado martes e no percorrido, moi aplaudido, destacou a creatividade e o bo humor. Fomentar, conservar, promocionar e ensalzar a tradición do Entroido é o obxectivo do Concello con este concurso.

Na categoría de comparsas estes son os premiados:

1.- OULIMPIADAS: 1.000 euros.

2.- OS CHAPUZAS DE AS LAMAS: 750 euros.

3.- O BOSQUE ENCANTADO: 550 euros.

4.- FESTA NO MUNDO MÁXICO (OS REXOUBEIROS): 550 euros.

5.- AS CORES DO OCEANO DA FINCA FIERRO: 300 euros.

6.- A COPA É NOSA: 300 euros.

As carrozas gañadoras son as seguintes:

1.- OS LOLAILOS POR EGIPTO: 1.000 euros.

2.- A TRIBÚ: 750 euros.

Na categoría de disfraces individuais e parellas/tríos os premiados son:

INDIVIDUAIS:

1.- A LAVANDEIRA: 200 euros.

PARELLAS/TRÍOS:

1.- VOANDO VOU: 300 euros.

2.- LA ERA DEL HIELO: 150 euros.

3.- 1877 PRIMER HOMBRE BALA FUE UNA MUJER ZAZEL: 100 euros.

Cómpre destacar que as asociacións que participaron no desfile do Martes de Entroido e que estiveron compostas por máis de dez persoas e debidamente inscritas no Rexistro de Asociacións do Concello de Barbadás recibirán unha axuda de 300 euros.

Ademais, organizouse un Concurso de Mecos no que se repartirán 600 euros en premios e os seguintes resultaron gañadores:

1.- ASOCIACIÓN DE VECIÑOS SAN BIEITO DE BENTRACES: 300 euros.

2.- COMUNIDAD DE PROPIETARIOS RÚA DOS CARRIS Nº5: 200 euros.

3.- Mª PILAR PIA ATANES: 100 euros.

O Concello de Barbadás vén de adxudicar unha obra que mellorará significativamente a accesibilidade no núcleo das Lamas. A actuación, que conta cun orzamento de 123.000 euros, consistirá na renovación da rede de pluviais e o pavimento do Camiño do Barro. As obras, que teñen un prazo de execución de 3 meses, tamén contemplan a ampliación do ancho desta vía en diferentes puntos.

Coa execución destes traballos, o Concello mantén a liña dos últimos anos no seu empeño de dotar aos diferentes núcleos do municipio do equipamento mínimo de infraestruturas. A intención do goberno local é aumentar a calidade de vida dos veciños e veciñas, ao mesmo tempo que se melloran as condicións de accesibilidade.

Tal e como se detalla no proxecto, as obras consistirán na demolición do pavimento asfáltico existente e a escavación en gabia para a tubaxe. Realizarase o roce, limpeza e retirada da vexetación dos bordes laterais do camiño, nunha superficie de 463 metros cadrados. Ademais, está prevista a ampliación da anchura do Camiño do Barro nunha superficie de 360 metros cadrados.

Nos traballos que se realicen na zona poranse a coto da nova rasante do pavimento as tapas de pozos de rexistro, arquetas e sumidoiros existentes. Ademais, reporanse as marcas que resulten afectadas pola execución do novo pavimento, tendo en conta a normativa vixente.

A concelleira de Vías e Obras, Victoria Morenza, asegura que a renovación de pluviais e do pavimento desta zona das Lamas era unha demanda veciñal: “Este ambicioso proxecto faise eco das inquedanzas dos residentes e soluciona un problema que vén de moitos anos atrás”. A edila explicou que As Lamas, unha zona en continuo crecemento, precisamente leva este nome pola existencia de moitos nacementos de auga e ao non facerse as urbanizacións correctamente provocáronse danos nas vías.

O alcalde, Xosé Carlos Valcárcel, asegurou que a obra do Camiño do Barro “mellorará unha situación que se deriva dunha mala xestión urbanística por parte dos gobernos anteriores e agora vémonos obrigados a levar a cabo unha actuación de gran envergadura que mellorará a calidade de vida da veciñanza”.

Proxecto para a Rúa Estrada de Piñor na Finca Fierro

O Concello de Barbadás conta con diferentes proxectos que mellorarán as infraestruturas en diferentes núcleos do municipio. É o caso das obras que porán fin ás deficiencias existentes no firme da rúa Estrada de Piñor. A vía, emprazada en Finca Fierro, presenta un estado de grave deterioro debido á carga de tráfico rodado que rexistra. Coa execución das obras, evitarase que novos danos poidan deteriorar por completo a calzada.

O Concello de Barbadás conta cun proxecto co que porá fin ás deficiencias existentes no firme da rúa Estrada de Piñor. A vía, emprazada en Finca Fierro, presenta un estado de grave deterioro debido á carga de tráfico rodado que rexistra. Coa execución das obras, evitarase que novos danos poidan deteriorar por completo a calzada.

A actuación conta cun orzamento de 22.000 euros e un prazo de execución dun mes. Coa elaboración deste proxecto, o Concello de Barbadás segue no seu empeño  de dotar a todos os núcleos do municipio do equipamento mínimo de infraestruturas ao fin de lograr unha mellora na calidade de vida dos seus veciños e veciñas e das condicións medioambientais do seu entorno.

Tal e como se detalla no proxecto, as obras consistirán no reforzo do firme na vía, que presenta deformacións e fisuras que dificultan o tráfico de vehículos. Os traballos consisten na mellora e mantemento da vía, levándose a cabo a rexeneración do pavimento coa limpeza total da calzada.

O alcalde de Barbadás, Xosé Carlos Valcárcel, asegura que unha das prioridades do goberno local para os próximos catro anos será o arranxo das vías públicas, no entorno da Finca Fierro e O Fonsillón, ademais de nas distintas parroquias do rural.

A concelleira de Vías e Obras, Victoria Morenza, explicou que se levarán a cabo traballos de rexeneración do firme en diferentes núcleos como Bentraces, Barbadás, Loiro e en varios puntos das Lamas. “Recentemente reformouse a zona infantil do Parque dos Patos e seguiranse realizando obras para mellorar a calidade de vida dos veciños e veciñas”, engadiu Morenza.

Manterase a circulación durante as obras

Durante as semanas que se leven a cabo as obras porase manter en todo momento a circulación, con paso alternativo de vehículos durante os traballos puntuais de execución da capa de rodadura. Sinalizarase convenientemente a existencia das obras, advertindo aos condutores de que deben adecuar a súa velocidade

O parque dos Patos de Barbadás loce nova imaxe. O Concello executou a reforma dun espazo de xogo moi frecuentado polos nenos e nenas e que contaba con elementos deteriorados. As obras consistiron na retirada de lousas en mal estado, o arranxo de elementos de xogo e a colocación de céspede artificial.

O alcalde, Xosé Carlos Valcárcel, visitou este espazo infantil e anunciou que tamén se levará a cabo a instalación de valado de madeira para delimitar a zona de areal. Con esta actuación, o Concello de Barbadás mellorou unha das zonas de xogo máis frecuentadas polos nenos e nenas, ofrecendo un espazo de ocio seguro para os máis pequenos. O rexedor pon en valor esta actuación por tratarse “dunha  das zonas máis emblemáticas de Barbadás, non só polo paseo fluvial senón por este espazo infantil que vén de ser recuperado”.

O Parque dos Patos, unha zona de ocio escollida a diario non só polos veciños e veciñas de Barbadás, senón tamén polos de concellos próximos, ten unha superficie de 6.423 metros cadrados e no seu interior conta co parque infantil, de 80 metros cadrados, que foi obxecto desta actuación.

Para garantir a seguridade dos usuarios, a zona de recreo infantil acondicionouse con novo pavimento de caucho e acabado en céspede artificial. Restaurouse ademais un elemento de xogo que se atopaba en mal estado, trasladándose ao taller para a substitución das madeiras deterioradas, o lixado e pintado.

A concelleira de Parques e Xardíns, Victoria Morenza, asegura que con esta actuación “mellorouse considerablemente o estado dun parque no que disfrutan moito os cativos e cativas e seguimos na liña de seguir transformando estes espazos e mellorando a súa imaxe”. A edila anunciou que o Concello de Barbadás conta con proxectos para mellorar novos espazos infantís nas parroquias e na Valenzá. Así, no parque da Rúa do Viso, por exemplo, tamén se pretende levar a cabo unha reforma integral con elementos novos e facendo as instalacións inclusivas.

Transmitir a tradición do Entroido aos máis pequenos é un dos principais obxectivos da programación que elaborou o Concello de Barbadás e así quedou demostrado esta mañá. Coa Praza Vella da Valenzá como escenario celebrouse unha Regueifa de Compadres, na que participaron preto dun cento de escolares dos CEIP O Ruxidoiro e Filomena Dato e puideron mostrar os bonecos que prepararon nestes últimos días nos obradoiros organizados dende a concellería de Educación.

Os nenos e nenas volverán a ser protagonistas do Entroido de Barbadás o 8 de febreiro, cando se celebrará a Regueifa de Comadres. Tamén no desfile infantil do 9 de febreiro, no que participarán 1.200 escolares.

Esta fin de semana, Barbadás reivindicará o Entroido máis tradicional coas Mascaradas Ancestrais. As máscaras das Señoritas e Labardeiros de Mugares (Toén) percorrerán o casco vello de Barbadás, este sábado a partir das 17.00 horas. O desfile estará acompañado do Folión Os Trebóns e rematará cunha festa no Museo da Gaita de Fole.

Esta é a programación detallada para os próximos días:

2 de febreiro: Obradoiro de Gorros de Labardeiros no Museo da Gaita. 17.00 horas.

3 de febreiro. Mascaradas Ancestrais. Dedicada ás Señoritas e Labardeiros de Mugares. Pasarrúas amenizado polo folión Os Trebóns.

7 de febreiro: Masterclass especial de Entroido. Polideportivo municipal. 20.00 horas.

8 de febreiro: Regueifa de Comadres. Praza Vella da Valenzá. 12.30 horas.

9 de febreiro: Desfile infantil e do Centro Ocupacional das Burgas pola avenida de Celanova. 12.00 horas.

Pregón con Improversados e sesión disco-móbil. 20.00 horas

Cea de comadres nos establecementos hostaleiros. 21.30 horas.

Festa con Gramola Disco. 23.00 horas.

12 de febreiro: Festa e concurso de disfraces infantil. Parque da Solaina. 16.00 horas.

Photocall especial do Entroido amenizado por DJ. Casa da Mocidade. 18.00 horas.

13 de febreiro: Gran desfile de Entroido. Avenida de Celanova. 17.00 horas.

14 de febreiro: Desfile fúnebre e queima dos Mecos. Avenida de Celanova. 20.00 horas.

Espectáculo de danza aérea con lume e fogos artificiais. Praza Vella da Valenzá. 21.00 horas.

Ademais, organizouse un Concurso de Mecos no que se repartirán 600 euros en premios e os interesados poden consultar as bases na páxina web do Concello de Barbadás.

O Concello de Barbadas denuncia que pese aos esforzos por embelecer os espazos públicos con diferentes especies de plantas, os actos vandálicos rexístranse con demasiada frecuencia. Os roubos son continuos nas xardineiras instaladas en diferentes puntos de municipio, rexistrándose os máis recentes na avenida de Celanova, onde desapareceron 5 ciclamen.

Para evitar que este tipo de incidentes se sigan rexistrando, e tendo en conta que nos últimos meses roubáronse ata 80 exemplares en diferentes puntos do concello, a Policía Local de Barbadás activa un plan co que se intensificará a vixilancia.

Ademais, o Concello empregará as súas redes sociais para informar aos veciños e veciñas dos danos que se están ocasionando co roubo das especies e para lembrar á cidadanía a importancia de coidar os espazos públicos, facendo un chamamento para frear os actos vandálicos.

A través das redes sociais municipais darase conta de cada subtracción co obxectivo de disuadir a aquelas persoas que levan a cabo este tipo de accións contra o patrimonio público e sensibilizar, ao mesmo tempo, sobre a importancia de coidar o que é de todos e todas.

O parque da antiga escola de Bentraces mellorará a súa imaxe grazas ao Obradoiro de Emprego Concellos Rurais, no que participan alumnos e alumas dos concellos de Barbadás, Toén, Castrelo de Miño e Taboadela e que facilitará a súa inserción laboral.

A reforma deste espazo de Bentraces xa comezou e está previsto que neste lugar tamén se acondicione o lavadoiro público. Ademais, acometerase a mellora paisaxística nun parque de Currás e dunha zona do parque baixo da rúa Areal, así como o mantemento de zonas verdes das distintas parroquia.

Unha vintena de alumnos e alumnas traballadoras  participan neste Obradoiro de Emprego que lles permitirá formarse nos certificados de profesionalidade “Instalación e mantemento de xardíns e zonas verdes” e “Fábricas de Albanelería”. En total serán 1.920 horas teórico-prácticas que favorecerán a inserción laboral dos participantes.

En Castrelo de Miño, realizarase o acondicionamento dos accesos ao Castro de Santa Lucía; a mellora paisaxística das zonas de lecer de Pescastrelo e melloras na nave municipal de Prado.

En Taboadela, levarase a cabo o acondicionamento do parque de Pasadán; porase en valor o lavadoiro de Vendanova e o lavadoiro e contorna de Outeiro da Mezquita; a mellora paisaxística da aira e fonte de Mingarabeiza.

E, no concello de Toén, faranse obras de mellora nas beirarrúas de Moreiras, Toén, Mugares e Xestosa e repararanse pozos de saneamento nestas mesmas parroquias; así como a limpeza viaria de vexetación de distintas zonas.

O Concello de Barbadás segue demostrando a súa aposta pola formación, a importancia da colaboración institucional entre os concellos e a relevancia deste tipo de iniciativas para fomentar o emprego e a inserción laboral.