O Concello de Barbadás reforza a súa aposta pola dinamización das zonas rurais cun amplo calendario de actividades de lecer para os próximos meses. Nos lugares de Loiro, Bentraces, Sobrado do Bispo, Barbadás, As Lamas, Finca Fierro, A Valenzá, Parada e Piñor ofreceranse dende clases de teatro para nenos, nenas e adultos e manualidades ata ximnasia de mantemento. As actividades promoverán, no tempo de lecer, o enriquecemento creativo, a expresión artística e o benestar físico e persoal.

A concelleira de Participación Veciñal, Ana Belén Peleteiro, explicou que “os obradoiros de manualidades brindarán aos veciños e veciñas a oportunidade de explorar a súa creatividade, dando unha segunda vida a obxectos cotiás creando obras únicas” mentres que a ximnasia de mantemento “permitirá aos participantes mellorar a súas condicións físicas ao mesmo tempo que se fomenta a convivencia entre a veciñanza”.

Ademais, a aula de teatro da Casa da Cultura da Valenzá busca potenciar a creatividade e a imaxinación de cada participante, desenvolver a comunicación verbal e non verbal (xestual, corporal) así como fomentar habilidades comunicativas.

Estas actividades, que se desenvolverán en case unha trintena de grupos, teñen por obxectivo achegar á veciñanza alternativas lúdicas e saudables para o tempo de lecer libre cun custo de 20€ anual (24€ para teatro) ademais de fomentar a convivencia e a socialización entre os participantes.