Arquivo da etiqueta: Piñor

09/06/2023

Barbadás investirá 33.000 euros para mellorar a rede de abastecemento de auga en San Bieito, garantindo unha presión constante á veciñanza

O Concello de Barbadás, a través da concellería de Urbanismo e Infraestructuras, pilotada pola tenente alcalde, Victoria Morenza, realizará unha importante inversión para mellorar o sistema de abastecemento de auga en San Bieito, parroquia de Piñor, dando así resposta ás queixas persistentes dos veciños sobre a baixa presión da auga que provocou que nalgúns casos varios veciños se deran de baixa do servizo de augas.

Estas melloras representan un paso importante para a mellora dos servizos públicos locais, asegurando un subministro de auga fiable e eficiente para todos os residentes de San Bieito.

A inversión será de 33.000 euros, financiada con cargo á liña 2 do fondo adicional do Fondo de Cooperación Local da Xunta de Galicia, e fará realidade un proxecto que contempla a construción dunha nova caseta que albergará un sistema de bombeo capaz de manter unha presión mínima de servizo de 3 bares en calquera punto da rede. Isto garantirá un abastecemento constante e fiable de auga potable para todas as vivendas da zona.

As características técnicas do proxecto son extensas e reflicten un compromiso claro coa mellora da infraestrutura local. A caseta, que se proxecta adosada ao depósito existente, albergará dúas electrobombas verticais de 1.15 Kw e un tanque de expansión de aceiro de 700 litros e 10 atmósferas.

A alimentación das bombas realizarase mediante unha acometida soterrada desde un poste existente fronte ao depósito regulador, garantindo así unha integración suave coa paisaxe local. No mesmo proxecto tamén se contempla a reposición do firme necesario para a instalación da tubaxe.

Alén diso, tamén se instalará unha chave de desaugue e unha boca de rego para permitir o baleirado e a limpeza da rede en caso de avaría. Ambas irán aloxadas dentro de cadanseu pozo de formigón en masa con tapa de aceiro.

Novas, , ,

CONTENT.1716936274

03/05/2023

Piñor, o lugar que inspirou a Martín Gaite, eríxese en epicentro do seu universo

O I Paseo Literario Carmen Martín Gaite en Piñor, celebrado este sábado, foi un rotundo éxito, coa participación de máis de cen persoas.  A inciativa colocou a Piñor no epicentro da obra da escritora e nun lugar relevante para a cultura española.

O obxectivo deste evento é erixir a Piñor como a capital do universo vital e literario de Carmen Martín Gaite, unha das plumas máis recoñecidas en lingua española e, ao mesmo tempo, máis descoñecida en Ourense, a pesar dos seus estreitos vínculos con Piñor.

O percorrido, no que se fixeron paradas para ler fragmentos da obra de Carmen Martín Gaite, foi conducido polo escritor e erudito na obra da escritora, David González Couso. Os participantes puideron coñecer os lugares que inspiraron Martín Gaite, mentres gozaban do aire libre e a natureza na fermosa zona de Piñor durante 4 horas.

O evento contou coa participación de nomes relevantes da cultura de Barbadás e de Ourense e a alta participación mostra o interese por este tipo de actividades culturais e o compromiso coa preservación do legado de Carmen Martín Gaite.

Está é a primeira parte dun ambicioso proxecto que inclue actuación nos ámbitos culturais, medioambientais e urbanísticos, todos eles xirando en torno ao universo literario de Carmen Martín Gaite.

Cultura, Novas, , , ,

CONTENT.1716936274

21/04/2023

Barbadás acelera a chegada da banda ancha aos barrios de Piñor que se atopaba nunha zona de sombra e sen cobertura

Tras meses de xestións coa dirección de Comunicacións e con Telefónica, solvéntanse as fallas de internet que dificultaban estudar, traballar ou a creación dunha empresa

O Concello de Barbadás tramita a licencia para a instalación de banda ancha nos barrios de Barxa e Pista de San Benito, ambos en Piñor, despois de meses de xestións iniciadas a raíz da demanda da propia veciñanza, que levaba tempo con problemas para acceder a internet e de cobertura móbil.

Para elo, o Concello mantivo conversas e negociacións tanto coa dirección xeral de Comunicacións como coa empresa de telefonía, ata que finalmente acadaron unha solución que se estivo demorando durante máis tempo do esperado, sen que tal demora poda ser atribuída ao Concello, pero pola que pide igualmente desculpas aos afectados.

Segundo lle trasladou persoalmente a tenente alcalde de Barbadás, Victoria Morenza, ao director xeral de Telefónica en Galicia, “a veciñanza do barrio da Barxa tiña transmitido en reiteradas ocasións incidencias con relación ao servizo, pois so dispoñen de liña móbil e se atopan nunha zona de sombra, sen cobertura”. Morenza advertiu, ademais, que “neste barrio residen estudantes e persoas que tele-traballan, ademais que que se vai crear un negocio telemático”. Como consecuencia destas e outras comunicacións, finalmente Telefónica elaborou o proxecto, que xa presentou no Concello e se executará en breve, para levar a banda ancha a ambos barrios e para o que será preciso a instalación de 13 postes de fibra de vidro e unha canalización soterrada de preto de 800 metros, entre ambos proxectos.

Esta actuación enmárcase dentro do Programa de Universalización de Infraestruturas Dixitais para a Cohesión (UNICO), que busca facilitar o acceso universal á banda larga ultra rápida e a extensión do 5G en todo o territorio nacional. O obxectivo do programa é lograr unha cobertura de banda larga de 100 Mbps para o 100% da poboación en 2025, como parte do Plan de Recuperación, Transformación e Resiliencia e da Axenda España Dixital. Con esta actuación nestes  barrios de Piñor, o concello de Barbadás está xa preto de esa cobertura do 100% do seu territorio.

Novas, ,

CONTENT.1716936274

29/03/2023

Barbadás eríxese na capital do universo literario e vital de Carmen Martín Gaite de cara ao centenario do seu nacemento

Xosé Carlos Valcárcel: “Trátase dun proxecto transversal que afecta á cultura, ao patrimonio material e ao urbanismo, que ten un orzamento de máis de 1.300.000 euros e xa que espertou o interese do Ministerio de Cultura”

O acalde de Barbadás, Xosé Carlos Valcárcel, xunto coa tenente alcalde, Victoria Morenza, e o escritor David González Couso, estudoso da figura e obra de Carmen Martín Gaite, presentaron esta mañá no Pazo de Lemos, en Piñor, o “Plan Director do Roteiro Carmen Martín Gaite en Piñor”.

O obxectivo é erixir a Piñor na capital do universo vital e literario dunha escritora universal, gañadora do premio Príncipe de Asturias das letras e unha das plumas más recoñecidas en lingua española e, ao tempo, máis descoñecida en Ourense pese aos seus estreitos vínculos con Piñor, un lugar que ocupa un lugar central na súa vida e na súa literatura.

A presentación deste ambicioso proxecto, que xa conta co aval inicial do Ministerio de Cultura, tivo lugar no Pazo de Lemos, no mesmo Piñor, que linda coa casa na que Martín Gaite pasou os seus veráns de nena. Uns veráns, unha casa, un pazo e una localidade que a marcaron para sempre. Por iso, tanto o alcalde como a tenente alcalde de Barbadás empezaron a presentación deste proxecto agradecendo aos propietarios e habitantes do Pazo de Lemos algo tan excepcional como que abriran as portas da súa morada para esta presentación.

Valcárcel explicou que xa se puxo en contacto co ministro de Cultura, Miquel Iceta, para trasladarlle o proxecto e que xa iniciaron contactos coa Dirección Xeral do Libro “porque están sumamente interesados neste proxecto”. “Un proxecto transversal que non so afecta á cultura se non tamén ao patrimonio material e ao urbanismo e que ten un orzamento de máis de 1.300.000 euros”, sinalou.

O alcalde tamén suliñou que se trata “dunha aposta en defensa do feminismo e do que representa Piñor na vida e obra de Martín Gaite”.

A tenente alcalde de Barbadás, Vitoria Morenza, destacou a relación entre a narrativa de Carmen Martin Gaite e o pobo de San Lourenzo de Piñor, en Barbadás. “Trátase dunha historia pouco coñecida, impulsada polo escritor David González Couso e o plan director elaborado polo periodista e investigador Luís Congil”, explicou.

O proxecto pretende dar a coñecer a figura de Carmen Martín Gaite e a súa relación con Piñor, así como os tesouros agochados da zona. “A fervenza do Pisco e o camiño dos Muíños, sobre os que xa existen proxectos de actuación, son dous dos principais tesouros de Barbadás que se queren destacar con esta proposta”, engadiu Morenza.

A tenente alcalde avanzou que “o pistoletazo de saída deste macroproxecto será en abril, co motivo do mes das letras galegas, e consistirá nunha andaina na que percorreremos por primeira vez esta ruta literaria, que é un dos obxectivos desde proxecto que hoxe presentamos”.

O centro de interpretación, no campo de Roma, será outro dos elementos máis destacados desde proxecto. Haberá unha serie de elementos con imaxes de xogos infantís e citas de Carmen Martin Gaite, así como o cilindro das letras que se instalará en Parada, na Capela de San Benito e na Cova de Lobo.

Tamén se instalarán bancos literarios en lugares estratéxicos dos itinerarios culturais, como na zona da Santa, onde está a Capela das Nieves, e á beira da casa na que Carmen Gaite pasou os seus veráns de nena. Ademais, preténdese que o roteiro literario de Carmen Martin Gaite sexa un referente nacional a nivel de turismo cultural e literario, que nos centros educativos do concello se estude á escritora con unidades pedagóxicas específicas e que se traduzan ao galego as novelas que dun ou outro xeito teñen relación con Piñor.

O plan pretende desenvolver as actuacións necesarias para poñer en valor e potenciar este roteiro literario, que se incluirá nos roteiros literarios do Ministerio de Educación e Formación Profesional.

O Plan Director establece seis obxectivos operativos que van desde a xeración dos itinerarios literarios, materializar a relación de “Carmiña” con Piñor, capitalizar en Barbadás a data de 2025, centenario da escritora, e obter o apoio das institucións académicas, especialmente da UNED.

Pola súa banda, o escritor David González Couso, manifestou a súa satisfacción pola elaboración deste proxecto para “rescatar esta ruta literaria de tanta importancia” e agradeceu ao goberno local a iniciativa e aos donos do pazo de Lemos que abriran hoxe “as portas deste espacio de liberdade e da memoria”.

Ademáis, González Couso aproveitou a ocasión para explicar que hai unha páxina web co nome de “Piñor lugar literario” e tamén contou que xa hai unidades didácticas que se están a distribuir nos centros interesados e que se están a planear rutas literarias con colexios e clubs de lectura.

Novas, , , , , ,

CONTENT.1716936274